Առաջին խմբում հանդես եկող «Վան» ակումբն այս պահի դրությամբ ՀՖՖ նախագահի պաշտոնում թեկնածու չի առաջադրի, իսկ որպես գործադիր կոմիտեի անդամ՝ կառաջադրի Սլավա Սարգսյանի թեկնածությունը։
Այս մասին ArmSport-ի թղթակցի հետ զրույցում հայտնեց Չարենցավանը ներկայացնող ակումբի փոխնախագահ ու գլխավոր մարզիչ Կարեն Բարսեղյանը․
«Գործկոմի անդամակցության համար կառաջարկենք հարգարժան Սլավա Սարգսյանի թեկնածությունը, քանի որ կարծում եմ՝ նա շատ բան է տվել ֆուտբոլին ու դեռ ունի տալու։ Ինչ վերաբերում է ՀՖՖ նախագահի թեկնածությանը, կասեմ հետևյալը՝
Մեր ակումբը չի գնալու անձերի հետևից։ Գնալու ենք ծրագրերի հետևից։ Ֆուտբոլի զարգացման կոնկրետ տեսլական ունենք, կներկայացնենք այն ու ով կընդունի ու կհասկանա այն, կպատկերացնի՝ ինչի մասին է խոսքը, կփորձենք աջակցել այդ թեկնածուին։ Այսօրվա դրությամբ չունենք նախագահի թեկնածու, ու ոչ էլ մտադիր ենք մեզնից մեկին առաջադրել։ Գնալու ենք ծրագրի, և ոչ՝ անձերի հետևից»։
Կարեն Բարսեղյան
Կարեն Բարսեղյանի խոսքով իրենք ֆուտբոլի զարգացման կոնկրետ առաջարկներ ու կոնկրետ խնդիրներ ունեն․
«Առանձնացրել ենք կոնկրետ կետեր առանց որոնց չենք պատկերացնում հայկական ֆուտբոլի զարգացումը։ Եթե ՀՖՖ նախագահի թեկնածուները չաջակցեն այդ կետերի լուծմանը, հնարավոր է՝ մենք նույնիսկ չմասնակցենք քվեարկությանը։
Ո՞րոնք են այդ կետերը՝
- Առաջարկելու ենք՝ հաջորդ մրցաշրջանից գոնե Առաջին խմբի թիմերում լեգեոներ ֆուտբոլիստների թվի սահմանափակում լինի
- Նաև կարծում եմ՝ պարտադիր պայման է՝ ՀՀ Առաջին խմբում աշխատեն միայն հայ մարզիչները՝ կլինի երիտասարդ, թե՝ փորձառու
Ֆուտբոլում այսօր որքան կեղտ տեսնում ենք, կապված են արտասահմանցի մարզիչների հետ։ Կան մարզիչներ, ովքեր չունեն ծագում, գալիս ներխուժում են մեր ֆուտբոլային ընտանիք՝ դրանով իսկ խնդիրներ առաջացնելով։ Սա շատ կարևոր խնդիր է, որը պետք է լուծվի։ Պետք է սկսենք Առաջին խմբից, քանի որ Բարձրագույն խմբում նման փոփոխություններ մտցնելը որոշակի ժամանակի հետ է կապված։
Թող որևէ մեկին չթվա, թե ես վախենում եմ որևէ մարզչի հետ մրցակցությունից, կամ մտածում եմ՝ այդ մրցակցությունն օգուտ չի տա, բայց փորձը ցույց է տալիս, որ Առաջին խմբի թիմերը գլխավորող արտասահմանցի մարզիչներից շատ քչերն են, որ ունեն բավարար մակարդակ ու շատ քչերին է, որ կարող է հետաքրքրել հայկական ֆուտբոլը։
Մյուս կարևորագույն խնդիրը հայկական ֆուտբոլում, ինչպես ես եմ ասում, չարորակ ուռուցքը վերացնելու գաղափարն է, ու դրա համար մենք բոլորս ենք պատասխանատու։ Խոսքը պայմանավորված խաղերի ու խաղադրույքների մասին է։ Պետք է բոլորս ցանկացած լծակներով պայքարենք դրանց դեմ ու փորձենք վերացնել դրանք։ Թե ինչ միջոցներով, չգիտեմ։ Ամենավերջին, ամենածայրահեղ միջոցներով ․․․ նույնիսկ կարելի է հանդես գալ հայտարարությամբ, որ հայկական թիմերի խաղերի վրա առհասարակ ոչ մի խաղադրույք չընդունվի։ Հասկանում եմ, որ սա այնքան էլ իրատեսական չէ, ու գուցե ես կտրվում եմ իրականությունից, բայց մենք ինքներս պետք է մաքրենք մեր ֆուտբոլը՝ ստեղծելով առողջ մթնոլորտ ու առողջ մրցակցություն։
Թե որքանով է ֆեդերացիան այս ընթացքում պայքարել պայմանավորված խաղերի ու բուքմեյքերական գործունեությունների դեմ, չեմ կարող ասել, քանի որ չեմ հանդիսանում ֆեդերացիայի աշխատող։ Գիտեմ, որ փորձեր եղել են ․․․ բայց պետք են կոնկրետ քայլեր ու գործողություն դրա դեմ։ Ով մեղավոր է, պետք է պատժվի․․․ ամենախիստ պատժով։ Դա դաս կլինի մյուսների համար։
Ես պաշտոնապես կարող եմ խոսել միայն մեր ակումբի մասին։ Մեր ակումբն իր ստեղծման օրից եղել է արդար մրցակցության կողմնակից ու շարունակում է այդպիսին մնալ։ Մենք մտածում ենք միայն հայկական ֆուտբոլը զարգացնելու մասին»,- ասում է Կարեն Բարսեղյանը։
Կարեն Բարսեղյանի խոսքով իրենք դեռևս չեն մտածում ՀՖՖ նախագահի պաշտոնում թեկնածուի առաջադրման մասին․
«Դեռևս կմտածենք գործկոմի անդամի թեկնածության մասին։ Բայց հնարավոր է՝ ակումբի նախագահի, հովանավորի հետ խոսելուց հետո մենք էլ ունենանք մեր թեկնածուն։ Մենք ունենք մեր տեսլականը, ծրագիրը։ Գուցե հայտնվի մարդ, որը թե՛ գաղափարապես, թե՛ ֆուտբոլային մոտեցումներով, մտածելակերպով մեզ շատ հոգեհարազատ կլինի, ու այս ծրագրերի կյանքի կոչելու դեպքում մենք մեր ձայնը կտանք նրան»,- ասում է Կարեն Բարսեղյանը։
Հայկական ակումբներից երեքը՝ «Փյունիկը», «Արարատը» և «Շիրակը» համատեղ հայտարարությամբ հանդես եկան՝ իրենց աջակցությունը հայտնելով ՀՖՖ անդամների կազմի առողջացման գործընթացի գաղափարին։
«Եթե կա ֆեյք, կեղծիք, ես դեմ եմ։ Համամիտ եմ այդ ակումբների դիրքորոշման հետ, բայց այստեղ շատ դժվար է պարզել՝ որտեղ է ֆեյքն ու կեղծիքը։ Եթե դա պարզվի, իհարկե մենք պետք է դրանից հեռու մնանք։ Եկել է մի պահ, երբ մենք այլևս սխալվելու իրավունք չունենք։ Այսօր կարող ենք ճանապարհ հարթել դեպի նրան, ինչին ձգտում ենք ամբողջ ազգով ու մտածում ենք այս 30 տարվա ընթացքում։ Պետք է լինեն արդար, ճիշտ ու սկզբունքային ընտրություններ, ինչից հետո կմտածենք հետագա զարգացումների մասին։
Մենք բոլորս միասին պետք է ոչ թե մեղավորներին փնտրենք, այլ՝ լուծումներ գտնենք։ Եղածը չենք կարող հետ բերել, մենք պետք է մտածենք մեր ապագայի մասին, մեր ֆուտբոլի առողջացման ու զարգացման, մեր մատաղ սերնդի մասին։ Դժվարություններ անպայման լինելու են, ու սրանից ավելի դժվար օրեր էլ են լինելու։ Բայց միայն դրանք հաղթահարելով ու ճիշտ լուծումներ գտնելով կարող ենք շարժվել առաջ։ Եվ իհարկե, կարևոր է՝ բոլորս միասին լինենք՝ մեկ գաղափարի շուրջ։ Սկզբունքը պետք է լինի մեկը՝ ամեն ինչ հանուն ֆուտբոլի, և ոչ՝ ընդդեմ»,- եզրափակեց իր խոսքը Կարեն Բարսեղյանը։
Նարե Հովհաննիսյան
