«Լիդսը» նվաճել է ԱՊԼ-ի հաջորդ մրցաշրջանում հանդես գալու իրավունք: Մարսելո Բիելսայի թիմը 16 տարի անց հանդես կգա ուժեղագույնների խմբում: Սա երկար սպասված իրադարձություն էր թե՛ ակումբի երկրպագուների, թե՛ ընդհանրապես ԱՊԼ-ին հետևող ֆուտբոլասերների համար։
Լիդս քաղաքի համանուն թիմը ոչ վաղ անցյալում Անգլիայի ամենահզոր ակումբներից մեկն էր համարվում, բայց արդեն 16 տարի շարունակ նրանք կտրված էին ֆուտբոլային էլիտայից, իսկ Բիելսայի նշանակումը քաղաքում դիտվում էր որպես ակումբի «ռենեսանս»: Մարսելոն կարող էր դեռ մեկ տարի առաջ թիմին դուրս Պրեմիեր լիգա. թիմը Չեմպիոնշիփում ցույց էր տալիս ամենադիտարժան ֆուտբոլը և առաջատարի դիրքում էր մեկ խաղի հաշվարկով գնդակի տիրապետման և հարվածների քանակով: Բայց փլեյ-օֆֆի կիսաեզրափակչում «Լիդսը» պարտվեց «Դերբիին»․․․ Թվում էր, որ Բիելսան հեռանալու է:
Բայց Մարսելոն հավատում էր, որ իր թիմը լավագույնն է լիգայում: Արդյունքում նա մնաց և երկրորդ փորձից արդեն «Լիդսը» ցատկեց Չեմպիոնշիփի ցանկապատի վրայով և հանդես կգա Պրեմիեր լիգայում:
✅ Մարսելո Բիելսա
Բիելսային ֆուտբոլային աշխարհում անվանում են «խենթ»։ Դուք առանց դժվարությունների կգտնեք բազմաթիվ պատմություններ կապված արգենտինացի մասնագետի հետ։ Սակայն, չնայած այդ ամենին, նա իր գործի նվիրյալն է, ով օրվա 24 ժամից 25-ը նվիրում է ֆուտբոլին․․․ Լավ, մի փոքր չափազանցրեցի, սակայն, նրա հետ աշխատող մարզիչները, ֆուտբոլիստները պատմում են, որ նա օրական 14 ժամ դիտում է առաջիկա մրցակցի խաղերի տեսաձայնագրությունները, անդադար աշխատում է խաղային նոր սխեմաներ մշակելու վրա, գրեթե չի օգտվում բջջային հեռախոսներից կամ սմարթֆոններից, իսկ երբեմն էլ գաղտնի հետևում է մրցակիցների մարզումներին․․․
Բիելսայի թիմերը այնպիսի մեքենաներ են, որոնցում կարգավորված է յուրաքանչյուր մեխանիզմ: Եվ դրա համար մարզչին անհրաժեշտ է ֆուտբոլիստների հարյուր տոկոսանոց ֆիզիկական պատրաստվածություն: Եթե խաղացողները կշռում են ավելի շատ, քան պետք է կամ չեն լրացնում Բիելսայի ստանդարտները մարզման ընթացքում, նրանք դուրս են մնում թիմից՝ անկախ նրանից, թե ինչ խաղամակարդակի ֆուտբոլիստ են: Միայն 35-ամյա վետերան Պաբլո Էրնանդեսի համար է զիջումներ կատարում Մարսելոն: Բիելսայի մարզումների պրոցեսներին հարմարվելը շատ դժվար է. ձմռանը «Լիդսը» վարձակալեց Ժան-Կևին Օգյուստինին: Հարձակվողը վնասվածք էր ստացել հենց առաջին մարզման ընթացքում և կես մրցաշրջանում խաղացել է ընդամենը երեք խաղում:
Բիելսան թիմում պահում է երկու դիետոլոգների, ովքեր հետևում են ֆուտբոլիստների ամենօրյա սննդակարգին և ամեն առավոտ ստիպում ֆուտբոլիստներին կշռվել։ Թիմի ֆուտբոլիստները մարզաբազայում սնվում են միաժամանակ և անպայման բժիշկների և դիետոլոգների ներկայությամբ․․․ ավել չափաբաժին ոչ ոք չի ստանում։
Բիելսան նաև շատ սկզբունքային անձնավորություն է․․․ նախորդ մրցաշրջանն էր, «Ասթոն Վիլայի» հետ ապրիլյան վճռական խաղում «Լիդսը» բացեց խաղի հաշիվը բավականին վիճարկելի գոլով: Հաջորդ դրվագում Բիելսան ստիպեց, որ իր խաղացողները գնդակ բաց թողնեն: Արդյունքում, «Լիդսի» խաղացողները պարզապես թույլ տվեցին մրցակցին գոլ խփել: Միայն մեկ պաշտպան չհնազանդվեց՝ փորձելով խափանել մրցակցի գրոհը, որի պատճառով Բիելսան գրեթե բռունցքներով հարձակվեց նրա վրա: Հանդիպումն ավարտվեց 1-1 հաշվով, բայց Մարսելոյի համար դա այդքան էլ կարևոր չէր․․․ կարևորը ջենթլմենական քայլն էր։
Լիդս քաղաքում փողոցներց մեկը անվանակոչվել է համանուն թիմի գլխավոր մարզիչ Մարսելո Բիելսայի պատվին։ Այդ փողոցը կոչվելու է Marcelo Bielsa Way։
✅ Թիմը
«Լիդսի» կազմը հիմնականում համալրված է փորձառու և մի քանի տաղանդավոր երիտասարդ ֆուտբոլիստներով։ Դարպասի պահապանն իսպանացի դարպասպահ Կիկո Կասիլյան է։ Պաշտպանական քառյակը կազմում են շոտլանդացիներ Լիամ Կուպերը (թիմի ավագ) և Բարի Դուգլասը, ինչպես նաև անգլիացի պաշտպաններ 22-ամյա Բեն Ուայթը և փորձառու Լյուկ Էյլինգը։
Կիսապաշտպանությունում հանդես են գալիս հյուսիսիռլանդացի Ստյուարտ Դալլասը, վերը նշված իսպանացի վետերան Պաբլո Էրնանդեսը, լեհ կիսապաշտպան Մատեուշ Կլիշը, ինչպես նաև թիմի երիտասարդ տաղանդներ հանդիսացող Կելվին Ֆիլիփսը և Ջեք Հարիսոնը, ով վարձավճարով է հանդես գալիս ակումբում։ Նրա տրանսֆերային իրավունքները պատկանում են «Մանչեսթեր Սիթիին» և ամենայն հավանականությամբ նա չի մնա «Լիդսում»։ Թիմում ունիվերսալ դեր է կատարում մակեդոնացի ֆուտբոլիստ Ալիոսկին, ով փակում է ամբողջ ձախ եզրը՝ խաղալով թե՛ պաշտպանությունում, թե՛ կիսապաշտպանությունում, իսկ հարկ եղած դեպքում նաև հարձակման ձախ եզրում։
Կելվին Ֆիլիփս
Թիմի հարձակման դուետը կազմում են անգլիացի Պատրիկ Բամֆորդը, ով թիմի գլխավոր ռմբարկուն էր այս մրցաշրջանում (16 գոլ) և պորտուգալացի Հելդեր Կոշտան։
Պարբերաբար խաղաժամանակ են ստանում նաև անգլիացի երիտասարդ կենտրոնական կիսապաշտպան Ջեյմի Շեքելթոնը և վալիացի հարձակվողական ոճի կիսապաշտպան Թայլեր Ռոբերտսը։
«Լիդսի» սեփականատեր Անդրեա Ռադրիցանին հաստատել է լուրերը, որ ակումբը հետաքրքրություն է ցուցաբերել «Միլանի» հարձակվող Զլատան Իբրահիմովիչի և ազատ գործակալի կարգավիճակ ունեցող հարձակվող Էդինսոն Կավանիի նկատմամբ: Իսկ «Լիդսի» գլխավոր տնօրեն Անգուս Կիները խոսել է ակումբի ծրագրերի մասին Պրեմիեր լիգա մտնելուց հետո․
«Մենք վերադառնում ենք այնտեղ, որտեղ պետք է լինենք: «Լիդսը» Պրեմիեր լիգայում է, ոչ թե Չեմպիոնշիփում: Այժմ մենք պետք է մտածենք համապատասխան մակարդակի հասնելու մասին: Ի վերջո, մենք ակնկալում ենք, որ լավագույն վեցնյակում կլինենք՝ խաղալով եվրագավաթներում: Սա միշտ եղել է մեր նպատակը:Բիելսա՞: Կարծում եմ, որ նա սիրահարվեց մեր ակումբին: Նա նվիրված է ակումբին», – մեջբերում է Կիներին Sky Sports-ը:
Եվ իսկապես, Բիելսայի դերը շատ մեծ է «Լիդսի» հաջողություններում, սակայն ԱՊԼ-ում ամրապնդվելու և նամանավանդ եվրագավաթներին մասնակցելու համար, կարծում ենք, թիմին մի քանի բարձրակարգ նորեկներ չէին խանգարի։ Դե ինչ, շուտով իր փեղկերը կբացի տրանսֆերային պատուհանը և ինքներս ականատես կլինենք, թե ովքեր կհամալրեն անգլիական լեգենդար ակումբի կազմը։ Անկախ ամեն ինչից, հաջորդ մրցաշրջանում Բիելսայի թիմն արդեն ԱՊԼ-ում է և նա կատարել է իր առջև դրված առաջին առաջադրանքը։ Առջևում նոր մարտահրավերներ են, նոր փորձություններ՝ կարգով ավելի բարձր լիգայում, և հետաքրքիր կլինի հետևել «Լիդսի» նոր արկածներին՝ Բիելսայի գլխավորությամբ․․․
