Ֆուտբոլի Հայաստանի Բարձրագույն խմբի առաջնության հանգուցալուծումն առավել քան մոտ է: Առաջնության ավարտին 2 տուր է մնացել, սակայն լարված մթնոլորտը մինչև վերջին պահը պահպանված կլինի:
Եթե 2 տուր առաջ փաստում էինք, որ չեմպիոնական պայքարին միացել է միայն Գյումրիի «Շիրակը», ապա հիմա հաճելիորեն արձանագրում ենք, որ «Նոան» ևս այդ պայքարում է: Ինչն է հետաքրքիր, որ թե՛ «Շիրակը» և թե՛ «Նոան» 2 տուրում էլ հաղթելու դեպքում կհռչակվեն չեմպիոն: Ո՛չ, երկուսն էլ չեն կարող, իհարկե, սակայն այնպես է ստացվել, որ առաջիկա տուրում նրանք միմյանց դեմ են խաղալու: Վերջին տուրում «Նոան» խաղալու է «Արարարտ-Արմենիայի» դեմ և, այսպիսով, 2 տուրում հաղթանակի դեպքում, Հայաստանը կունենա նոր չեմպիոն: «Շիրակը» վերջին տուրում խաղալու է «Ալաշկերտի» դեմ և 2 տուրում էլ հաղթանակի դեպքում կնվաճի չեմպիոնի կոչումը: Նույնը չենք կարող ասել «Արարատ-Արմենիայի» դեպքում, քանի որ գործող չեմպիոնի ճակատագիրը կախված է նաև «Շիրակի» ելույթներից: Այս պահին նրանք հավասար միավորներ ունեն, որի դեպքում առավելությունը տրվում է Գյումրիի թիմին, քանի որ անձնական խաղերում Բիչախչյանն առավելություն ունի Մինասյանի նկատմամբ:
Իրականում, այսօր մեկնարկող տուրը կտա շատ հարցերի պատասխաններ:
«Նոա»-«Շիրակ». «Նաիրի» մարզադաշտ, 06.07.2020, 18:00
«Նոան» սեփական հարկի տակ ընդունելու է «Շիրակին»: Ընթացիկ առաջնությունում թիմերը հանդիպել են 3 անգամ: Բիչախչյանի թիմի առավելությունն ակնհայտ է: 3 խաղում «Շիրակը» հաղթել է 2 անգամ, 1 խաղում գրանցվել է ոչ-ոքի: «Շիրակը» 5 գնդակ է ուղարկել մրցակցի դարպասը, իսկ «Նոան» ոչ մի գնդակ չի կարողացել ուղարկել Երմակովի պաշտպանած դարպասը: «Շիրակի» կազմ՝ որակազրկումից հետո կվերադառնա Արտեմ Գևորգյանը, ում բացակայությունը «Լոռիի» դեմ խաղում, ինչպես նշեց Վարդան Բիչախչյանը, մեծ կորուստ էր: Վերջին 7 խաղից 5-ում «Շիրակը» հաղթել է, մեկ խաղ ավարտել ոչ-ոքի, իսկ «Նոան» վերջին 7 խաղից 4-ում հաղթել է, մեկում՝ պարտվել, մեկ խաղում էլ գրանցվել է խաղաղ արդյունք: Չնայած «Նոայի» անհաջող ելույթների շարքին «Շիրակի» դեմ խաղում, թիմերի հնարավորությունները կարելի հավասար գնահատել: «Նոան» պահեստայինների երկար նստարան չունի, ինչի մասին բազմիզս խոսվել է: Նույնը կարող ենք ասել «Շիրակի» դեպքում, սակայն ի տարբերություն «Նոայի», Բիչախչյանի թիմում խաղացողները ավելի շատ են, սակայն համապատասխան փոխարինողներն են քիչ:
«Արարատ»-«Արարատ-Արմենիա». Ավան ակադեմիա, 06.07.2020, 20:00
«Արարատ-Արմենիան» վերջին 4 տուրում հաղթանակ չունի: Թիմում խորը ճգնաժամ է: Գործող չեմպիոնը հասկանում է, որ ձեռքից կարող է բաց թողնել այդքան մոտ թվացող հերթական չեմպիոնությունը: Դա էլ, իր հերթին, հոգեբանական դժվարություններ է առաջացնում: Այս տուրում բոլոր առումներով հարմար մրցակից ունի գործող չեմպիոնը: Երևանի «Արարատում» անհասկանալի իրավիճակ է, իսկ սա Մինասյանի թիմի համար հիանալի հնարավորություն է հոգեբանական վիճակը կայունացնելու համար: Վերջին անգամ առաջնությունում «Արարատ-Արմենիան» հաղթել է հենց «Արարատին»: «Արարատը» վերջին 8 տուրում հաղթանակ չունի: Ընթացիկ առաջնությունում թիմերը հանդիպել են 3 անգամ: 3 խաղում էլ հաղթել է «Արարատ-Արմենիան»: Բոլոր փաստերը հաշվի առնելով, խաղի բացահայտ ֆավորիտը «Արարատ-Արմենիան» է:
«Ալաշկերտ»-«Լոռի». «Նաիրի» ստադիոն, 07.07.2020, 18:00
Չեմպիոնական պայքարից զատ, հետաքրքիր պայքար է նաև մրցանակային տեղերի համար: «Լոռին» փորձում է բարձրանալ երրորդ հորիզոնական, որպեսզի հնարավորության դեպքում նվաճի ԵԼ-ի ուղեգիր, իսկ դա կախված է նաև Գավաթի խաղարկության եզրափակչից: «Ալաշկերտն» էլ նոր մարզչի գլխավորությամբ փորձում է ամրապնդել չորրորդ հորիզոնականը, հնարավորության դեպքում բարձրանալ երրորդ հորիզոնական, իսկ դրա համար առաջիկա 2 խաղում հաղթանակ է անհրաժեշտ: Եղիշե Մելիքյանի անդրանիկ խաղում «Ալաշկերտը» կարող էր հաղթել, սակայն բավարարվեց ոչ-ոքիով: Իսկ «Լոռին» վերջին 2 տուրում առաջատարներից միավորներ է խլում՝ թեկուզ և սուղ ֆուտբոլիստներով ցուցադրելով դիտարժան ֆուտբոլ: Խաղի ինտրիգներից մեկն էլ այն է, որ Խաշմանյանը կխաղա իր հարազատ «Ալաշկերտի» դեմ: Թիմերն ընթացիկ առաջնությունում հանդիպել են 3 անգամ. 2 անգամ հաղթել է «Լոռին», մեկ անգամ՝ «Ալաշկերտը»: Խաղում որոշակի առավելություն կարելի է տալ «Ալաշկերտին:
Արմեն Գարամյան
