Չեմ զլանա այս տողերը ևս մեկ անգամ գրելուց. առաջնության մեկնարկից առաջ շաաատ-շատերը վստահ էին՝ առաջնությունում ու, ընդհանրապես, անկախ Հայաստանի պատմության մեջ ամենաուժեղ կազմն ունեցող «Արարատ-Արմենիան» առանց մեծ դժվարությունների կհռչակվի չեմպիոն: Պետք է խոստովանեմ ու մեղանչեմ, որ ես՝ նյութի հեղինակս, նույնպես կարծում էի, Մինասյանի թիմը կանի այն, ինչն օրենքով պետք է աներ կամ անի: Սակայն սպորտը սիրում է անակնկալներ մատուցել: Արժեզրկված՝ «այս առաջնությունը լավագույն առաջնությունն է անկախ Հայաստանի պատմության մեջ» արտահայտությունը չեմ ասի, բայց, իրոք, նման է:
Բոլորիս քաջ հայտնի է, որ կորոնավիրուսի համավարակով պայմանավորված նաև Հայաստանի Բարձրագույն խմբի առաջնությունն էր դադարեցվել: Դադարեցվեց առաջնության առաջին հատվածի ավարտից մեկ տուր առաջ և չնայած դրան՝ արդեն հայտնի էր լավագույն վեցնյակը:
Թե ինչպես «Շիրակը» հետ բերեց 8 միավորի դեֆիցիտը
Առաջնությունը վերսկսվեց, մեկնարկային խաղում «Լոռին» Գյումրիում ոչ մի շանս չտվեց «Շիրակին» ու հաղթեց 2-1 հաշվով: Հանդիպումից հետո թիմի խաղից չափազանց դժգոհ «Շիրակի» գլխավոր մարզիչ Վարդան Բիչախչյանը ծայրաստիճան բարկացած էր, ու այդ խաղով եթե գնահատենք Գյումրիի թիմի հնարավորությունները, մեղմ ասած, պետք է լռեինք, բայց էլ ինչ «Շիրակ», եթե հետ չգար անդունդի եզրից ու ֆուրոր չիրականացներ: «Մրրկահողմ» Կոնեն ու ընկերները աննկարագրելի «խելացի» ֆուտբոլ խաղացին, և սա, իհարկե, Բիչախչյանի ու մարզչական շտաբի շնորհիվ: Լինենք առավել անկեղծ՝ այս հաղթանակներում մեծ ներդրում ունի նաև թիմի սեփականատեր Արման Սահակյանը: Վերջինս գլխավոր մարզչին լիիրավ ազատություն է տվել իր գործողությունների տիրույթում, իսկ ավագ Բիչախչյանը չի հիասթափեցնում և ոչ մի գյումրեցու: «Լոռիի» դեմ խաղից հետո Առաջին Ալիքին տված հարցազրույցում Բիչախչյանը գնահատելով իր թիմի հնարավորությունները, նշեց, որ պանդեմիայից հետո ամեն ինչ անկանխատեսելի է, և այն թիմը կհաղթի, որն առավել շուտ ոտքի կկանգնի. Տեսանյութը՝ ստորև.
«Շիրակն» ամենաարագը ուշքի եկավ՝ հենց հաջորդ տուրում միավորներ խլելով առաջատար «Արարատ-Արմենիայից»: Այդ խաղից հետո կայացած 6 խաղից 5-ում «Շիրակը» հաղթեց, իսկ մեկ խաղում՝ ոչ-ոքի ավարտեց հանդիպումը: Հաղթեց նաև «Արարատ-Արմենիային»:
Չնշեցի, որ առաջնության վերսկսումից հետո կայացած առաջին տուրից հետո «Արարատ-Արմենիան» 8 միավորի առավելություն ուներ. «Շիրակի» նկատմամբ 3 տուր ունեցած 8 միավորի առավելությունը ի չիք դարձավ: «Շիրակը» հաղթեց 3 խաղում էլ, իսկ «Արարատ-Արմենիան» կրեց 2 պարտություն ու խաղաց մեկ ոչ-ոքի:
Իսկ հիմա, ամեն ինչ «Շիրակի» ձեռքերում է. 3 խաղ, 3 հաղթանակ և Գյումրին կթնդա:
«Արարատ-Արմենիայի» ձախողումներն ու «Շիրակի» վերելքը
Ինչու՞ «Արարատ-Արմենիան» վերջին 3 խաղում 8 միավոր կորցրեց: Ակումբում, հնարավոր է, մեղադրում են մրցավարությանը: Լինենք անաչառ՝ ճակատագրական ոչ մի սխալ մրցավարները թույլ չեն տվել գործող չեմպիոնի վերջին 3 խաղում: Ավելին, «Նոայի» դեմ խաղում ինչ-որ տեղ Մինասյանի թիմը խաղավերջում փրկվեց պարտությունից: Կրակն է կորել Մինասյանի թիմի խաղում. ձախողումներ, ձախողումներ․․․ ու արդյունքում, առաջատարության կորուստ: Գրեթե 2 համարժեք կազմ ու ռոտացիայի մեծ հնարավորություն ունեցող թիմը անշուք տեսք ունի: Պաշտպանությունում խնդիրները շատ են, միջին ու առջևի գծերի միջև փոխհամագործակցությունը կաղում է: Ինչպես նախորդ մրցաշրջանում, այս մրցաշրջանում թիմը չունի ընդգծված գոլահար, չնայած այն հանգամանքին, որ Օտուբանջոն հավակնում էր այդ «պաշտոնին»: Այնպես չէ, որ «Շիրակը» հեշտությամբ է հայտնվել առաջատարի դիրքում. «Ալաշկերտի» դեմ խաղում հաղթանակ՝ հանդիպման ամենավերջում խփած գոլի շնորհիվ, «Լոռիի» հաղթանակը «Արարատ-Արմենիայի» նկատմամբ ևս գրանցվեց բառացիորեն ամենավերջին վայրկյանին, «Լոռիի» հետ խաղում «Շիրակը» ոչ-ոքի կորզեց 88-րդ րոպեին Կոնեի գոլի շնորհիվ: Սա նշանակում է, որ «Շիրակը» պայքարում է մինչև վերջին վայրկյանը, իսկ թիմի գոլահար Կոնեն չի թուլացնում զգոնությունը, երբեք: Պատկերացնու՞մ եք, «Շիրակի» գոլերի 50 տոկոսից ավելին խփել է «դահիճ» Կոնեն:
Մի խոսքով, առջևում 9 եզրափակիչ խաղ կա: Անդրադառնանք առաջիկա տուրի 3 խաղին:
Բնականաբար, բոլորի ուշադրության կենտրոնում առաջին հերթին «Շիրակի» ու «Արարատ-Արմենիայի» մասնակցությամբ խաղերն են:
«Շիրակ»-«Լոռի». 02.07.2020, 17:30, Գյումրու քաղաքային ստադիոն
Գյումրիում «Շիրակը» կխաղա իր համար ամենաանհարմար մրցակիցներից մեկի՝ «Լոռիի» հետ: Նախորդ տուրում «Լոռին» խաղաց նաև «Շիրակի» համար՝ հաղթելով «Արարատ-Արմենիային» ու ապահովելով «Շիրակի» առաջատարությունը, սակայն այս տուրում ճակատագիրը կարող է չար կատակ խաղալ: Ի վերջո, Սանամյան-Խաշմանյան զույգը, վերջապես, զգաց հաղթանակի քաղցրությունը, «Լոռին» էլ ներգրավվեց մրցանակային տեղերի համար պայքարին: Այս մրցաշրջանում թիմերը հանդիպել են 3 անգամ: Այս մրցաշրջանում «Շիրակը» հաղթանակ չունի «Լոռիի» նկատմամբ. 3 խաղից 2-ում գրանցվել է ոչ-ոքի, մեկում հաղթել է «Լոռին»: Սակայն «Լոռիի» խնդիրն ակնառու է՝ պահեստայինների չափազանց կարճ նստարան: Հաշվի առնելով այն փաստը, որ «Շիրակը» կխաղա սեփական հարկի տակ, կարելի է մի փոքր առավելություն տալ Գյումրիի թիմին:
«Արարատ-Արմենիա»-«Ալաշկերտ». 02.07.2020, 20:00, ՀՖՖ Տ/Կ
Լուրջ փորձություն է սպասվում նաև «Արարատ-Արմենիային»: Մինասյանի թիմը կխաղա նորանշանակ գլխավոր մարզիչ Եղիշե Մելիքյանի «Ալաշկերտի» հետ: Վերջինիս սեփականատեր Բագրատ Նավոյանը դժգոհ է թիմի արդյունքներից, իսկ դրա վկայությունը՝ վերջին 2 տուրում մարզիչների փոխարեն տեխնիկական գոտում հենց Նավոյանի առկայությունն էր: Մելիքյանը Ուկրաինայում կուտակած հարուստ փորձ ունի, իսկ «Ալաշկերտի» կազմը, պետք է խոստովանենք, որ բավական զորեղ է: Վերջին 3 տուրում կրած անհաջողություններից հետո դժվար է ասել, թե ինչպես թիմը կվերականգնվի: Եթե այս տուրում ևս Մինասյանի թիմը միավորներ կորցնի, միգուցե, կարելի է սպասել մարզչական փոփոխություն ու նաև վերջնական ձախողում այս մրցաշրջանում: Գաղտնիք չէ, որ «Արարատ-Արմենիայի» գերնպատակը չեմպիոնությունն է: Այս մրցաշրջանում թիմերը խաղացել են 3 անգամ: Առաջին տուրում Մինասյանի թիմը պարտվեց, իսկ հաջորդ 2 դիմակայություններում՝ հաղթեց: Վերջին տուրում երկուսն էլ պարտվել են: Խաղում թիմերի հնարավորությունները կարելի է հավասար գնահատել:
«Նոա»-«Արարատ». 02.07.2020, 18:00, «Նաիրի» ստադիոն
Երրորդ զույգում կմրցեն «Նոան» ու «Արարատը»: «Արարատը» շարունակում է խզել պայմանագրերը խաղացողների ու թիմի ներկայացուցիչների հետ: Այնպես, որ «Նոան», չնայած կազմի սղությանը, խաղում կհամարվի ֆավորիտ: «Նոան» ու «Արարատը» այս մրցաշրջանում հանդիպել են 3 անգամ: Թիմերը տարել են մեկական հաղթանակ, մեկ խաղում էլ գրանցվել է ոչ-ոքի: Վերջին հանդիպումն ավարտվեց գոլազուրկ ոչ-ոքի: Այդ խաղում «Նոան» 12-րդ րոպեից 10 հոգով էր: Վերջին 7 խաղից 4-ում «Արարատը» պարտվել է, իսկ երեքում գրանցվել է ոչ-ոքի:
Մեծ հաշվով, «Նոան» կարող է խառնվել չեմպիոնական պայքարին, քանի որ հանդիպում ունի և՛ «Շիրակի» և «Արարատ-Արմենիայի» հետ, սակայն, կրկնում եմ, այլ հարց է, թե ինչքան կդիմանան «Նոայի» ֆուտբոլիստները, քանի որ վերջին խաղում անկառու էր, որ խաղացողներն արդեն «սպառվելու» եզրին են:
Արմեն Գարամյան
