Սովորաբար, երբ ֆուտբոլային առաջնությունները մոտենում են ավարտին, որոշակի պատկերացում հնարավոր է լինում կազմել վերջնական աղյուսակի վերաբերյալ, սակայն ֆուտբոլի Հայաստանի Բարձրագույն խմբի առաջնությունը որքան մոտենում է ավարտին, այնքան ավելի անկանխատեսելի են դառնում վերջնական արդյունքները:
Առաջնության ավարտին 4 տուր է մնացել: Եվ եթե մի քանի տուր առաջ շատերը չեմպիոնական մրցավազքում «Արարատ-Արմենիային» մրցակից չէին տեսնում, ապա այս պահին Գյումրին ներկայացնող ակումբը «փակել» է բոլորի բերանները: Այո՛, փակեց՝ վերջին 2 տուրում 2 խելահեղ հաղթանակ տոնելով «Ալաշկերտի» ու «Արարատ-Արմենիայի» նկատմամբ: «Նոան» տևական դադարից հետո հաղթեց ու միացավ մրցանակային տեղերի համար պայքարին: «Լոռին» շարունակում է գլորվել անդունդը, իսկ «Արարատը» շարունակում է բացասական ելույթների շարքը: «Ալաշկերտն» էլ Բագրատ Նավոյանի գլխավորությամբ որոշակիորեն վերականգնեց հոգեբանական վիճակը՝ վերջին տուրում 10 հոգով «Արարատի» նկատմամբ կամային հաղթանակ տանելուց հետո:
Այս տուրն առավել քան կարևոր է: Ինչու՞:
«Արարատ»-«Շիրակ». 27.06.2020 ՀՖՖ Տ/Կ, 19:00
«Շիրակն» այս տուրում մրցելու է վեցնյակի հետնապահ «Արարատի» հետ: «Արարատը», ինչպես բազմիցս նշել ենք, ծանր իրավիճակում է: Վերջին 6 տուրում հայկական լեգենդար ակումբը հաղթանակ չունի, իսկ «Շիրակը» վերջին 6 խաղում 4 անգամ հաղթել է, երկուսում՝ ոչ-ոքի խաղացել: Մեծ հաշվով, «Արարատը» գործնականում քիչ հնարավորություններ ունի Եվրոպա լիգայի ուղեգիր նվաճելու, իսկ «Շիրակի» մոտ շարժառիթն առավել քան մեծ է: Գյումրիի թիմի գոլահարը չի խնայում ոչ մի մրցակցի. Կոնեն ընթացիկ մրցաշրջանում արդեն 19 գոլ է խփել: Թիմային խաղն, ինչպես միշտ, «Շիրակում» ամենաբարձր մակարդակի վրա է, ինչն առաջին հերթին գալիս է մարզչական շտաբից, որը, փաստացի, «Արարատում» բացակայում է: Ընթացիկ մրցաշրջանում թիմերը հանդիպել են 3 անգամ. Գյումրիում կայացած 2 խաղում էլ հաղթել է «Շիրակը», իսկ երևանյան խաղում հաղթել է «Արարատը»: Հաշվի առնելով բոլոր հանգամանքները, կարելի է մեծ վստահությամբ հայտնել, որ այս խաղում կհաղթի «Շիրակը»:
«Լոռի»-«Արարատ-Արմենիա». ՎՖԱ, 28.06.2020 17:30
Առաջատար «Արարատ-Արմենիան» կհյուրընկալվի Վանաձորի «Լոռիին»: Դադարից հետո Մինասյանի թիմը ոչ մի մրցակցի հետ դիմակայությունում մեծ առավելություն չունի: Սա, իրոք, տարօրինակ է՝ հաշվի առնելով թիմի ներուժն ու կազմը: Մինասյանը 2 հավասարազոր կազմ ունի, սակայն թիմը չի ցուցադրում այն ֆուտբոլը, որը տրամաբանության սահմաններում սպասելի էր: Պահերի իրացումը կաղում է, պաշտպանությունում ճեղքեր հաճախ են առաջանում: Եթե փնովում ենք «Արարատ-Արմենիայի» խաղը, ապա բառեր դժվար է գտնել «Լոռիի» պարագայում: Թիմը վերջին 6 խաղում հաղթանակ չունի: Սանամյանն ու Խաշմանյանը չեն կարողանում իրենց ֆուտբոլը ներարկել «Լոռիի» ֆուտբոլիստների արյան մեջ: Սակայն, լինենք արդար ու նշենք, որ վանաձորյան թիմն ունի նաև ֆուտբոլիստների խնդիր. պահեստայինների նստարանը չափազանց կարճ է, և ամեն խաղում դաշտում նույն ֆուտբոլիստներն են: Այդ պայմաններում 4 օրը մեկ խաղ անցկացնելը սարսափելի դժվար է: Հաշվի առնենք նաև, որ «Լոռին» ավելի շատ է հանգստացել, քանի որ գործող չեմպիոնը գավաթային խաղ է անցկացրել, որում 2-0 հաշվով հաղթել է «Գանձասար-Կապանին»: Ամեն դեպքուն, խաղում որոշակի առավելություն կարելի է տալ «Արարատ-Արմենիային»:
«Ալաշկերտ»-«Նոա». 28.06.2020. Նաիրի մարզադաշտ, 17:30
«Ալաշկերտն» ու «Նոան» կրկին բախվում են մեկմեկու: Վերջին մեկ ամսում թիմերը հանդիպում են արդեն երրորդ անգամ: Նախորդ երկու խաղում հաղթել է «Նոան». 2 դեպքում էլ նույն ՝ 1-0 հաշվով: Մրցաշրջանի առաջին հատվածի վերջին՝ 9-րդ տուրում էլ հաղթել էր «Ալաշկերտը»՝ 2-1 հաշվով: Նախորդ տուրում երկու թիմն էլ հաղթանակ է տոնել: Երկուսն էլ հաղթել են ծանր պայքարում: Ճիշտ է, «Ալաշկերտը» մի փոքր հեշտությամբ հաղթեց, սակայն թիմը գրեթե 80 րոպե խաղում էր 10 հոգով, և այս տեսանկյունից ֆուտբոլիստները ֆիզիկապես վերականգնվելու խնդիր կարող են ունենալ, չնայած, ի տարբերություն «Նոայի»՝ «Ալաշկերտի» խաղացողներն ավելի շատ ժամանակ են ունեցել վերականգնվելու համար: Հիշեցնենք, որ «Նոան» 4 օր առաջ գավաթային հանդիպում է անցկացրել: Խաղը ծանրագույն էր, քանի որ «Նոան» մոտ 80 րոպե խաղաց 10 ֆուտբոլիստով, և այս պարագայում մեկ օր ավել հանգստանալն էր մեծ նշանակություն կարող է ունենալ: Նախորդ խաղում տեխնիկական գոտուց «Ալաշկերտի» գործողությունները ղեկավարում էր թիմի սեփականատեր Բագրատ Նավոյանը: Այս խաղում ևս Նավոյանն, ամենայն հավանականությամբ, կլինի տեխնիկական գոտում:
Միգուցե, սա ևս ազդեցություն ունեցավ «Ալաշկերտի» խաղի վրա: Եվս մեկ անգամ հարկ եմ համարում նշել, որ թիմը հզոր կազմ ու ներուժ ունի: Վերջին տուրերում ցուցադրած ֆուտբոլը չի համապաստասխանում թիմի ցուցադրած արդյունքներին: «Նոայի» մոտ էլ նույն խնդիրն է, ինչ՝ «Լոռիի». համարժեք փոխարինող ֆուտբոլիստները քիչ են: Խաղում թիմերի շանսերը գնահատելիս, առավելությունը կարելի է տալ «Ալաշկերտին»:
Արմեն Գարամյան
