Հայ պրոֆեսիոնալ բռնցքամարտիկ, WBO վարկածով մինչեւ 23 տարեկանների Աշխարհի չեմպիոն Գոռ Երիցյանը արդեն 2,5 ամիս ամիս է՝ Հայաստանում է: Punch Boxing Promotions-ը ներկայացնող Երիցյանն ու Նարեկ Աբգարյանը մարզվում են Հոլիվուդի Wild card boxing club-ում և իրենց վերջին մենամաարտերն անցկացնում են հենց ԱՄՆ-ում:
Գոռ Երիցյանը պրոֆեսիոնալ ռինգում անցկացրած 13 մենամարտում ունի նույնքան հաղթանակ: Ապրիլի վերջին հայ բռնցքամարտիկը պետք է անցկացներ հերթական մենամարտը, սակայն կորոնավիրուսի պանդեմիայով պայմանավորված բռնցքամարտի շոուն չեղարկվեց. «Ես պետք է մենամարտ անցկացնեի ապրիլի 25-ին: Մեծ շոու էր տեղի ունենալու: Մրցակիցս աֆրիկացի բռնցքամարտիկ էր լինելու, որին հաղթելու դեպքում հնարավորություն կունենայի մենամարտելու աշխարհի գոտու համար: Դա մեծ շանս էր: Նույն իրավիճակը նաև Նարեկ Աբգարյանի մոտ էր: Կորոնավիրուսի հետ պայմանավորված վիճակը շատ խանգարեց, բայց ինձ թվում է ամեն ինչ իր տեղը կընկնի: Հիմա սպասում ենք սահմանները բացվելուն, որպեսզի նորից վերադառնանք ԱՄՆ»:
Երիցյանի խոսքով Միացյալ Նահանգներում մարզումներն իրենց շատ բան են տալիս. «Ամեն անգամ Ամերիկա գնալով՝ զգում ենք, որ մի աստիճան բարձրացել ենք: Մենամարտերից առաջ մարզվում ենք աշխարհի ամենահայտնի ու տիտղոսակիր մարզիկների հետ: Մարզումների ընթացքում ամեն օր անցկացնում ենք սպարինգ մենամարտեր, ինչը մեծ աճ է տալիս»:
Գոռ Երիցյանն ու Նարեկ Աբգարյանն այս օրերին մարզումներն անցկացնում են բացօթյա․ «Մարզվում ենք հիմնականում Հրազդանի կիրճում: Սպարինգային մենամարտեր դեռ չենք կարողանում անցկացնել, քանի որ դահլիճները փակ են, բայց փորձում ենք մնալ մարզավիճակի մեջ, որ հետագայում շատ դժվարություններ չունենանք: Ինչքանով կստացվի՝ դա հետագայում կերևա: Մշտական կապ մեջ ենք Punch Boxing-ի հիմնադիր, մեր մենեջեր Արամ Դավթյանի հետ, ինչպես նաև Top Rank Promotion-ի և մեր մարզիչների հետ: Բոլորս մեծ ոգևորությամբ ու կարոտով սպասում ենք մենամարտեր անցկացնելուն: Այս դադարից հետո երևի ավելի ոգևորված կսկսենք լիարժեք մարզումները ու կվերադառնամ ավելի ուժեղ: ԱՄՆ-ում նույնպես բոլոր մարզադպրոցները փակ են: Այնտեղից վերադառնալու հիմնական պատճառը հենց դա էր, եթե բաց լիներ՝ կմնայինք և կմարզվեինք այնտեղ»:
Գոռ Երիցյանը նշեց, որ իր և Նարեկ Աբգարյանի նախաձեռնությամբ մոտ օրերս Երևանում կբացվի բռնցքամարտի նոր ակումբ-մարզադահլիճ, որտեղ հնարավորություն կունենան մարզվել և՛ սիրողական, և՛ պրոֆեսիոնալ բռնցքամարտիկները.
«Բռնցքամարտի նոր մարզադահլիճ ստեղծելը իմ, Նարեկ Աբգարյանի և մեր ընկերոջ՝ ռուսաստանաբնակ բիզնեսմեն Հովհաննես Քերոբյանի նախաձեռնությունն է: Տարածքը հենց նրանն է: Ֆինանսավորումն ու ներդրումներն անում ենք երեքով: Լինելու է բարձր կարգի մարզադահլիճ: Այստեղ լինելու են մարզումներ բոլորի համար՝ երեխաների, սիրողական և պրոֆեսիոնալ բռնցքամարտիկների, ինչպես նաև աղջիկների խմբակային և անհատական մարզումներ: Բացի այդ մենք էլ կունենանք մեր մարզադահլիճը ու միշտ կմարզվենք այստեղ: Երեխաների համար սա շատ լավ հնարավորություն է, որ հասնեն այն կետին, որտեղ ցանկանում են: Ցանկանում ենք եկող բռնցքամարտիկների համար դժվարություններ չլինեն առաջ գնալու համար: Հետագայում մեծ պլաններ ունենք կապված մարզադահլիճի հետ․ ԱՄՆ-ում բռնցքամարտի մոտեցումը ամբողջությամբ տարբեր է, և մենք ցանկանում ենք, որ մեր մարզադահլիճում ամեն ինչ լինի ավելի շատ ամերիկյան ոճի: Հաճախակի անցկացվելու են սպարինգ մենամարտեր, մնացած օրերին լինելու են անհատական և խմբակային մարզումներ»:
Սկզբնական շրջանում մարզադահլիճում մարզումներ անցկացնելու են Գոռ Երիցյանն ու Նարեկ Աբգարյանը.
«Մարզիչներ լինելու ենք ես ու Նարեկ Աբգարյանը: Հիմքը դրվելու է մեզանով ու մենք ենք մարզումներ անցկացնելու: Չէի ասի, թե սա մարզչական կարիերա է, պարզապես ցանկանում ենք այն, ինչ տեսել և սովորել ենք ԱՄՆ-ում, փոխանցել մեր բռնցքամարտիկներին: Քանի որ այս շրջանում երկրից չենք կարող դուրս գալ, մենք այստեղ կմարզենք ու կմարզվենք: Հետագայում երբ մեկնենք ԱՄՆ՝ մենամարտի նախապատրաստվելու, կնշանակենք մարզական բարձր որակավորում ունեցող մարզիչների: Ով կընդունի մեր գաղափարները, նա էլ կմիանա մեր թիմին»,-եզրափակեց Երիցյանը:
Երվանդ ՀԱԿՈԲՅԱՆ
