Արթուր Ավագյան․ Այս ժամանակահատվածը ցույց տվեց՝ որքան դժվար է առանց սիրած զբաղմունքի ապրելը

Ֆուտբոլիստները Հանրապետության այն նախանձելի մարդկանց շարքերում են, որոնք քիչ-քիչ սկսում են անցնել իրենց բնականոն կյանքին։ Մասնավորապես, ապրիլի 23-ից հայկական թիմերը, ըստ Պարետատան ու ՀՖՖ-ի միջև ձեռք բերված պայմանավորվածության, կվերսկսեն մարզումները։

Այս մասին, արդեն կիսով չափ հետևում մնացած կարանտինային կյանքի, «Լոռի» տեղափոխվելու դրդապատճառների ու առաջնության վերսկսման մասին խոսել ենք վանաձորյան թիմի ֆուտբոլիստ Արթուր Ավագյանի հետ։

-Ինչպե՞ս ընդունեցիր այն լուրը, որ ապրիլի 23-ից մարզումները վերսկսվում են։
-Շատ լավ։ Ինչպես բոլորը՝ մենք նույնպես անհամբեր սպասում էինք մեր աշխատանքի վերսկսմանը։

-Դժվա՞ր էր առանց ֆուտբոլի։

-Իհարկե։ Այս ժամանակահատվածը բոլորիս ցույց տվեց, թե ինչ դժվար է առանց սիրած զբաղմունքի ապրելը։

-Իսկ ինչո՞վ էիր զբաղվում այս ընթացքում։

-Հիմնականում, ժամանակս ընտանիքիս հետ էի անցկացնում։ Դիտում էի ֆիլմեր, մարզավիճակս չկորցնելու համար տանը մարզվում։

-Կարանտինի ընթացքում տնից ընդհանրապես դուրս չե՞ս եկել։

-Միայն առավոտյան այգի եմ գնացել վազելու և գնումների։ Այնպես որ, այո՛, կարելի է ասել, որ դուրս չեմ եկել։

-Չձանձրանալու համար ի՞նչ խորհուրդ կտաս այն մարդկանց, որոնք դեռևս հնարավորություն չունեն իրենց սիրած գործով զբաղվելու։

-Կարծում եմ՝ լավագույն միջոցն ինքնակրթվելն է․ կարդալ գրքեր, ուսումնասիրել լեզուներ, լսել լավ երաժշտություն։ Օրինակ, ես նաև մասնագիտական առումով էի փորձում կատարելագործվել․ որ հանդիպումը լավ չէի անցկացրել, դիտում էի ու փորձում հասկանալ՝ որտեղ եմ սխալվել։

-Ի՞նչ գրքեր խորհուրդ կտաս կարդալ։

-Օնորե դը Բալզակ․ «Շանգրենի կաշին», Mark Twain. «Great Novels»

Ջեք Լոնդոն․ «Մարտին Իդեն»։ Սա հիմա եմ կարդում։

-Իսկ ի՞նչ ֆիլմեր։

— «La Casa De Papel», «Ford VS Ferrari», «Джентльмены», «Стажер», «Green book», «Togo»:

-Երգե՞ր։

-Bruno Mars-Grenade

Dafina Zeqiri ft Lumi B- Lule Lule

Garik ft Sona զուգերգը

Era Istrefi- Bonbon և այլն։

-Այս ընթացքում նոր հոբբիներ ձեռք բերե՞լ ես։

-Այո, խոհարարություն (ծիծաղում է՝ հեղ․)։ Կնոջս խոսքով՝ ինձ մոտ շատ լավ է ստացվում։

-Ինչպե՞ս էիր որոշել տեղափոխվել «Լոռի»։

— Քանի որ արմատներով լոռեցի եմ, առաջարկ ստանալուն պես անմիջապես համաձայնեցի։ Խոսելով ակումբի ղեկավարության և գլխավոր մարզչի հետ՝ հասկացա, որ կարող եմ օգտակար լինել այս թիմին, թիմն էլ՝ ինձ։

-Որո՞նք են քո հետագա նպատակները ֆուտբոլում։

-Ներկայումս միայն մտածում եմ «Լոռիի» համար հնարավորինս օգտակար լինելու մասին։ Հետագա նպատակներ շատ կան, բայց դեռ չեմ շտապում դրանց մասին բարձրաձայնել։ Միայն կասեմ, որ բոլորը ֆուտբոլի հետ են կապված։

-Քեզ դո՞ւր է գալիս մեր առաջնության նոր ձևաչափը։

— Ոչ, իհարկե։ Կարծում եմ՝ նախկին ձևաչափը մեր առաջնությանն ավելի հարմար էր։ Հիմա մյուս թիմերը փաստորեն ընկերական հանդիպումներ պիտի անցկացնեն։ «Երևանը» դուրս եկավ առաջնությունից ու արդեն մի թիմ դուրս մնաց։

-Ինչպիսի՞ն կլինի այս առաջնության վերջաբանը՝ ըստ քեզ։

— Տա Աստված, այս համաճարակը շուտ վերջանա և կարողանանք հանդիսականով խաղեր անցկացնել։ Մեր թիմի համար մեր երկրպագուները շատ կարևոր են։ Ամեն ինչ այս վիրուսի հետագա զարգացումից է կախված։

Ինչ վերաբերում է մրցաշարային աղյուսակի դասավորությանը, ապա պետք է ամեն ինչ անենք՝ պայքարենք չեմպիոնության համար, իսկ հետո կտեսնենք։

Նաև ուզում եմ առողջություն մաղթել բոլոր հիվանդներին, իսկ մյուսներին ասել, որ զգույշ լինեն ու մնան տանը։

Ստելլա Բաբլոյան