Հայաստանում մինչև մայիսի 14-ը՝ հանրապետությունում արտակարգ դրության ավարտը, ինչպես հայտնի է, չի անցկացվելու մարզական և ոչ մի միջոցառում: Այդուհանդերձ, ավելի վաղ հայտնել էինք, որ ՀՀ Պարետատան և Հայաստանի ֆուտբոլի ֆեդերացիայի միջև ձեռք է բերվել պայմանավորվածություն, ըստ որի ՀՀ Բարձրագույն և Առաջին խմբերի ակումբները կարող են վերսկսել մարզումները ապրիլի 23-ից:
ՀՀ կրթության, գիտության, մշակույթի և սպորտի նախարարության սպորտի բարձրագույն նվաճումների վարչության պետ Նարինե Շահբազյանի խոսքով, իրենք դեռևս մտադիր չեն դիմել Պարետատանը՝ այլ սպորտաձևերի մարզումների անցկացման շուրջ բանակցելու համար.
«Դեռևս նման հանձնարարական չկա: Սա, իհարկե, վերաբերում է նախարարության կողմից ֆինանսավորվող 35 մարզական ֆեդերացիաներին: Պետք է սպասենք մինչև մայիսի 14-ն ու տեսնենք՝ ինչ կլինի հետո: Այս պահի դրությամբ ունենք կառավարության որոշում՝ արտակարգ ռեժիմի երկարաձգման ու մասսայական միջոցառումների չանցկացման վերաբերյալ, այնպես որ շարժվում ենք այդ որոշմամբ: Թե ինչ կլինի հետո, ժամանակը ցույց կտա»,- ArmSport-ի հետ զրույցում նշում է Նարինե Շահբազյանը:
Շահբազյանի խոսքով, նախարարությունը մի շարք ֆեդերացիաների կողմից գրություն է ստացել առ այն, որ մրցաշարերը հետաձգվում կամ չեղարկվում են մինչև մայիս, իսկ ահա ամռան ու աշնան ամիսների ու այդ ընթացքում մրցաշարերի չեղարկման վերաբերյալ իրենք դեռևս ոչ մի պաշտոնական գրություն չեն ստացել:
