«Արսենալի» գլխավոր մարզիչ Միկել Արտետան Sky Sports-ին տված հարցազրույցի ժամանակ խոսել է թիմի ընթացիկ մրցաշրջանի, ձախողման հիմնական պատճառների և ամառային տրանսֆերային պլանների մասին՝ ընդգծելով, որ առաջիկա ամառը կլինի «շատ հետաքրքիր»։
Արտետան խոստովանել է, որ մրցաշրջանի մեկնարկին պատկերացրել էր, թե վերջին տնային խաղում կբարձրացնի Պրեմիեր լիգայի գավաթը։ Սակայն «Արսենալը» ներկայում 15 միավորով հետ է մնում նոր չեմպիոն «Լիվերպուլից» և վտանգի տակ է երկրորդ տեղը։
«Եթե մրցաշրջանի սկզբում պատկերացնեի այդ պահը, դա կլիներ վերջին խաղում գավաթը բարձրացնելը։ Դա էր մտքումս։ Անցած 11 ամսվա փորձից հետո մենք հպարտ ենք, բայց նաև ցավ ենք զգում, քանի որ մոտ էինք նպատակին», — ասել է Արտետան։
Որպես հիմնական խոչընդոտներ՝ Արտետան նշել է վնասվածքներն ու կարմիր քարտերը։ «Արսենալն» այս մրցաշրջանում Պրեմիեր լիգայում ունեցել է ամենաշատ վնասվածքներն ու կարմիր քարտերը։
Անդրադառնալով ամառային տրանսֆերային պլաններին՝ Արտետան ընդգծել է, որ թիմին անհրաժեշտ է խորացված կազմ՝ մրցունակ լինելու համար։
«Սկզբում մեծ թվով խաղացողներ կլինեն բացակա՝ վնասվածքների կամ պայմանագրերի ավարտի պատճառով։ Պետք է համալրենք կազմը։ Մենք ունենք ակադեմիայի պատանիներ, բայց եթե դա բավարար չլինի, գիտենք, թե ինչ է պետք անել», — նշել է Արտետան։
Ըստ նրա, թիմը հատկապես պետք է ուժեղացնի խաղադաշտի երկու անկյունները՝ հարձակման և պաշտպանության գծերը։
Արտետան նաև նշել է, որ իր և նոր մարզական տնօրեն Անդրեա Բերտայի տեսլականները լիովին համընկնում են․
«Նա հսկայական փորձ ունի, հաղթել է խոշոր տիտղոսներ։ Նա հստակ պատկերացնում է, թե ինչ է պետք անել»։
