ՈւԵՖԱ-ն հարցումներ է անցկացնում մրցաշարին մասնակցող ակումբներում Չեմպիոնների լիգայի կանոնակարգում հնարավոր փոփոխությունների վերաբերյալ: Այս մասին հայտնում է Bild-ը։
Աղբյուրի փոխանցմամբ՝ դիտարկվում է մրցաշարի փլեյ-օֆֆի փուլում լրացուցիչ ժամանակի չեղարկման տարբերակը։ Առաջարկվում է խաղի հիմնական ժամանակի ավարտից անմիջապես հետո անցկացնել 11 մետրանոց հարվածաշար՝ երկու խաղերի ընդհանուր հաշիվը ոչ-ոքի լինելու պարագայում։ Այս միջոցը պետք է օգնի նվազեցնել ֆուտբոլիստների ծանրաբեռնվածությունը։
Նաև նույն երկիրը ներկայացնող ակումբները կարող են բացառվել մինչև Չեմպիոնների լիգայի քառորդ եզրափակիչ փուլը։ Ընդգծվում է, որ վաղ փուլերում նույն երկրի թիմերի մասնակցությամբ հանդիպումները հետաքրքրություն չեն առաջացնում երկրպագուների և հեռարձակողների շրջանում։
Բացի այդ, հնարավոր է ներդնել կանոն, ըստ որի՝ մրցաշարի ընդհանուր փուլի լավագույն ութնյակի ակումբները, ուղղակիորեն դուրս գալով 1/8-րդ եզրափակիչ, փլեյ-օֆֆի բոլոր փուլերի պատասխան հանդիպումները տանը կանցկացնեն ավելի ցածր տեղ գրաված թիմերի հետ։
Գործող կանոնակարգում փոփոխություններ կատարելու մասին որոշումը կարող է ընդունվել մայիսի 30-ին Մյունխենում կայանալիք ՈՒԵՖԱ-ի ասամբլեայում։
