Սաուդյան Արաբիայի Ջիդդա քաղաքում կայացած Իսպանիայի Սուպերգավաթի խաղարկության «Ռեալ Մադրիդ» — «Մալյորկա» կիսաեզրափակիչ հանդիպման ժամանակ (3:0) սկանդալային իրավիճակ է ստեղծվել։ Այս մասին հայտնում է Bild-ը։
Աղբյուրի փոխանցմամբ՝ «Մալյորկայի» ֆուտբոլիստների կանայք դժգոհել են, որ տեղի երկրպագուներն իրենց նկատմամբ ծայրահեղ անհարգալից են վարվել։
«Մենք ճամփորդել ենք առանց անվտանգության աշխատակիցների և ենթարկվել ենք ոտնձգությունների: Տեղացի տղամարդիկ մեզ նկարում էին ու անհանգստացնում։ Մեզ պաշտպանող չկար»,- ասել է «Մալյորկայի» խաղացող Դանի Ռոդրիգեսի ընկերուհի Քրիստինա Պալավրան։
Քրիստինայի խոսքերին արձագանքել են նաև «Մայորկայի» երկրպագուները, որոնք նույնպես դժգոհել են տեղի բնակչության պահվածքից՝ հատկապես ընդգծելով կանանց նկատմամբ անհարգալից վերաբերմունքը։
«Ամենավատը խաղի ավարտից հետո էր: Տրիբունաներից ավտոբուս տանող ճանապարհին, որը տևում էր մոտ 15-20 րոպե, նրանք անընդհատ բղավում էին մեզ վրա, հարյուրավոր մարդիկ մոտեցան մեզ, առանց մեր համաձայնության նկարեցին մեզ, նույնիսկ ծեծեցին, ծիծաղեցին մեզ վրա, ու ծաղրեցին մեզ»,- ասել է Մալյորկայի երկրպագուներից մեկը:
Հիշեցնենք, որ մրցաշարի եզրափակիչում Իսպանիայի Սուպերգավաթը կվիճարկեն «Բարսելոնան» և Մադրիդի «Ռեալը»։ Խաղաը կկայանա կիրակի՝ հունվարի 12-ին, ժամը 23։00-ին։
