Երկու շաբաթում ամեն բան հօդս ցնդեց ֆուտբոլային Եվրոպայում։ Չկա ոչինչ՝ խաղեր, մարզումներ, առաջնություններ, էմոցիաներ։ Ամեն բան կանգ է առել։ Մարդկությունը պայքարում է աշխարհը ցնցած կորոնավիրուսի դեմ։ Թե ինչքան է տևելու այս ամենը, ոչ ոք չգիտի։
Ընդամենը երկու շաբաթ առաջ դեռ ֆուտբոլ կար՝ մեզ ու ձեզ ծանոթ ֆուտբոլը։ Իսկ հիմա այն կանգ է առել անորոշ ժամանակով։
Մեկ բան ակնհայտ է․ մրցաշրջանը, որը չափազանց հետաքրքիր էր բոլորիս համար, այլևս տապալված է։ Գուցե մեկ ամսից այն վերսկսվի, գուցե երկու ամսից, բայց այլևս երբեք չի լինի այնպիսին, ինչպիսին որ կար։
Որոշ հաշվարկներով ազգային առաջնությունները Եվրոպայում կարող են վերսկսվել մայիսի սկզբին։ Սա լավագույն դեպքում։ Այս օրերին շատ են այս տողերը, «պատրաստ եղե՛ք վատագույնին»։ Այնպես որ պետք է դիտարկել վատագույն սցենարները։
«Ի Ն Չ ՈՒ»
Մայիսի վերջին, երբ մրցաշրջանն ավարտվում է, ֆուտբոլիստները գնում են հանգստի։ Այդ օրերին նրանք պահում են մարզավիճակը՝ համատեղելով իրենց հանգստի հետ։ Մեծ մասամբ՝ թիմերը վերսկսում են մարզումները հուլիսի կեսերին։ Կարծում եմ՝ հասկացաք, թե ուր եմ տանում խոսքս։
Այս դադարը կարող է ավելի երկար ձգվել, քան ֆուտբոլիստի հերթական արձակուրդն է մրցաշրջանի ավարտից հետո։
Այնպես որ, դաշտ վերադառնալու համար մարզվել է պետք ուրիշ ծավալով։ Էլ չեմ ասում, որ մրցաշրջանից առաջ թիմերը մինչմրցաշրջանային հավաքներ են անցկացնում մարզավիճակ հավաքելու համար։ Այս իրավիճակը խնդիր է լինելու ֆուտբոլիստների համար նաև այն ժամանակ, երբ ավարտվի։
«Լիվերպուլի» «մուրազը փորու՞մ կմնա»
Տարվա սկզբում, երբ լարվեցին ԱՄՆ-Իրան հարաբերությունները, ֆուտբոլային մեմերի «հսկաները» կատակում էին, թե երրորդ համաշխարհայինն է այն միակ բանը, որը կարող է զրկել «Լիվերպուլին» չեմպիոնությունից։ Բայց արի ու տես, որ նման կանխատեսումները գրեթե իրականություն են դառնում։ Յուրգեն Կլոպի թիմը կարող էր արդեն չեմպիոն հռչակված լինել, եթե առաջնությունը մինչև այս պահը շարունակվեր, բայց․․․Ջերարդի սահանկումից, Քայլ Ուոքերի փրկությունից հետո «Լիվերպուլին» չեմպիոն դառնալու ճանապարհին հիմա էլ խանգարում է կորոնավիրուսը։
Կարծիքները շատ են։ Մեկն ասում է, որ ամեն դեպքում պետք է տալ տիտղոսը «մերսիսայդցիներին»։ Մյուսն ասում է, որ եթե անգամ մրցաշրջանը ավարտին չհասցնեն ու տիտղոսը տան «Լիվերպուլին», մարդիկ միշտ հիշելու են, որ մի բան այն չէ։ Սա Ջեյմի Քարագերի խոսքն էր։ Կշարունակվի՞ ԱՊԼ-ն։ Դժվար է ասել։ Միացյալ Թագավորությունը ամբողջությամբ կարանտինի մեջ է։ Բորիս Ջոնսոնն էլ իր համերկրացիներին կոչ է անում պատրաստ լինել վատագույնին։ ԱՊԼ-ի մրցաշրջանի հետագա ընթացքի վերաբերյալ որոշում կարող է կայացվել ապրիլի 3-ին, երբ Պրեմիեր լիգան նախատեսում է խորհրդակցություն անցկացնել ակումբների ներկայացուցիչների հետ։
Խիստ չեն լինի․․․
Օրեր առաջ իսպանական պարբերականներից մեկը տեղեկություն տարածեց, որի համաձայն Մադրիդի «Ռեալը» մրցաշրջանի ավարտից հետո չի հեռացնի Զինեդին Զիդանին։ Ինչու՞ հենց այս օրինակը։ Տեսե՛ք․ ակնհայտ է, որ հետաձգումներն ու մրցաշրջանի սպասվելիք տարօրինակ ավարտը չեն կարող մեծ ազդեցություն ունենալ մի շարք ակումբների հետագա որոշումների վրա։
Օրինակ, բարդ է պատկերացնելը, որ մեծ ակումբներից ինչ-որ մեկը կհեռացնի իր մարզչին այն պատճառով, որ նա ձախողել է մրցաշրջանը այս դադարից հետո։ Այո՛, կարող են լինել դեպքեր, երբ ամբողջությամբ ձախողած մրցաշրջանի արդյունքում մարզչին կհեռացնեն, բայց դժվար թե դա լինի մեծ ակումբների հետ։
Կա նաև հարցի մյուս կողմը։ Թիմեր կան, որոնք գալիք մրցաշրջանից նախատեսել են որևէ նոր ծրագիր սկսել։ Այս դեպքում մարզչի հեռացումը չի կարող կապ ունենալ մրցաշրջանի՝ առհասարակ լավ կամ վատ լինելու հետ։ Օրեր առաջ տեղեկություն կար Մասիմիլիանո Ալեգրիի՝ «Պարի Սեն Ժերմենը» գլխավորելու հավանականության մասին։ Սա այդպիսի ծրագրի ցայտուն օրինակ է։
Ե՞րբ սպասել մեր սիրելի խաղի վերադարձին
Այստեղ ևս պետք է իրատես լինել։ Իտալական մամուլը երեկ գրեց, որ Լոմբարդիայի գլխավոր քաղաքում՝ Միլանում, կորոնավիրուսի լայն տարածմանը նպաստել է Չեմպիոնների լիգայի 1/8-րդ եզրափակչի «Ատալանտա» — «Միլան» հանդիպումը։ Փետրվարի 19-ին կայացած խաղին ներկա գտնվելու համար Բերգամոյից 45 հազար հանդիսական եկել էր Միլան։ Հավանական է, որ մեծ քանակությամբ վարակի դեպքեր գրանցվել են հենց այս խաղից հետո։
Կարծում եմ՝ հիմա ևս հասկացաք, թե ուր եմ տանում խոսքս։ Դժվար է պատկերացնել, որ օր օրի աճող թվերի հետ Իսպանիայում, Իտալիայում, Գերմանիայում, Անգլիայում կամ էլ Ֆրանսիայում մարդիկ դարձյալ կսկսեն ֆուտբոլ խաղալ, այն էլ երկրպագուներով։ Այո՛, բացառված չէ, որ մրցաշրջանը փրկելու համար մայիսի սկզբից խաղերը վերսկսվեն։ Դա գուցե արվի անձնակազմի 14-օրյա կարանտինից հետո՝ վտանգները մաքսիմալ նվազեցնելու նպատակով։ Բայց դժվար է պատկերացնել, որ այդ խաղերում հանդիսականներ կլինեն։
Ի՞նչ սցենարների սպասել
Առողջապահության համաշխարհային կազմակերպությունը հայտարարում է, որ կորոնավիրուսը չի նահանջում։ Ավելին, այն սկսում է նոր թափով տարածվել Եվրոպայում և ողջ աշխարհում։ Նման համաճարակային իրավիճակում բացառված չէ, որ մրցաշրջանը անավարտ մնա։ Իրադարձությունների այսպիսի զարգացման դեպքում կան մի քանի սցենարներ։ Այդ մասին արդեն բազմիցս խոսվել է։ Դժվար է պատկերացնելը, որ, օրինակ, Իսպանիայում չեմպիոնի կոչումը կարելի է տալ «Բարսելոնային», բայց միևնույն ժամանակ բարդ է ընկալելը՝ ինչպես կարող է «Լիվերպուլը» չհռչակվել չեմպիոն նման ֆանտասիկ մրցաշրջանից հետո՝ թեկուզ և ընդհատված։
Բարդ է, շատ բարդ է։ Այս հարցը քննելու համար ՈՒԵՖԱ-ն երկու աշխատանքային խումբ է ստեղծել։ Իհարկե, նրանք ամեն ինչ անելու են, որ մրցաշրջանը ավարտին հասցնեն, բայց․․․Չգիտեմ, իսկապես չգիտեմ։
Առողջություն բոլորիս և ուժ այս բարդ օրերում։ Հուսանք, որ կորոնավիրուսը շուտով կնահանջի ինչպես աշխարհում, այնպես էլ Հայաստանում՝ բոլորիս վերադարձնելով մեր՝ այդքան մոտ ու այդքան հեռու գտնվող բնականոն կյանքը։
Արամ Սահակյան
