Հայաստանի մարմնամարզության հավաքականի անդամ, 30-րդ ամառային համաշխարհային ուսանողական խաղերի չեմպիոն, Համաշխարհային բանակային խաղերի և աշխարհի գավաթի խաղարկության բրոնզե մեդալակիր (2019թ․), ինչպես նաև 2022 թ․աշխարհի գավաթի խաղարկության արծաթե մեդալակիր Արթուր Ավետիսյանը երրորդ տեղն է զբաղեցրել Գերմանիայի Կոդբուս քաղաքում այս օրերին ընթացող առանձին գործիքների աշխարհի գավաթի խաղարկության առաջին փուլում:
Օղակների վարժության եզրափակիչում հայ մարմնամարզիկը, հավաքելով 14.533 միավոր, դարձել է մրցաշարի բրոնզե մեդալակիր:
ArmSport-ի հետ զրույցում 25-ամյա մարմնամարզիկը խոսել է նոր նվաճման, թիմում տիրող մթնոլորտի և առաջիկա անելիքների մասին․
«Տարին հաջող սկսեցինք, ինչի համար շատ ուրախ ենք։ Առավել ուրախացել ենք Գագիկ Խաչիկյանի համար, որը մեծահասակների պայքարում առաջին մեդալը նվաճեց։ Այսօր էլ Դավթյան Արթուրն է մրցում։ Հուսով ենք՝ հաջող կընթանա։ Մեծ ակնկալիքներ կան։ Մենք էլ թիմով շատ ենք ուրախանում մեր բոլորի հաջողություններով։ Շատ բարդ մրցում էր, գրեթե բոլոր ուժեղագույնները մասնակցում էին։ Շատ ուրախ եմ, որ ստացվեց մեդալակիր դառնալ»,- ասում է Արթուր Ավետիսյանը։
Այն, որ թիմում իսկապես լավ մթնոլորտ է, ակնհայտ է։ Ավետիսյանն ասում է՝ հենց դա է իրենց հաջողությունների գրավականը․
«Մենք մի ընտանիքի պես ենք։ Այն, ինչի հասնում են, թիմային աշխատանքի շնորհիվ է։ Բոլորս անկեղծորեն ուրախանում ենք մյուսների հաջողություններով և տխրում անհաջողություններից»։
Աշխարհի գավաթի խաղարկության հաջորդ փուլը կանցկացվի փետրվարի 27-ից մարտի 5-ը Կատարի մայրաքաղաք Դոհայում, որին Հայաստանի ներկայացուցիչները ևս կմասնակցեն: Ավետիսյանն ասում է՝ պետք է փորձի խուսափել այն թերացումներից, որոնք թույլ է տվել Կոտբուսում․ «Այն, ինչն այստեղ լավ չկատարեցի, պետք է փորձեմ կատարելագործել արդեն Դոհայում կայանալիք մրցման ժամանակ։ Լիարժեք չկատարեցի այն, ինչ կարող էի։ Վարժությանս մեջ կային բացթողումներ, կուզեի ավելի լավ կատարել։ Այնպես որ, կփորձեմ թերացումները շտկել արդեն հաջորդ մրցումների ժամանակ»։
Աշխարհի գավաթի խաղարկությունը վարկանիշային է աշնանը Բելգիայում անցկացվելիք աշխարհի առաջնության համար, որի ընթացքում կխաղարկվեն Փարիզի Օլիմպիական խաղերի ուղեգրեր։ Արթուր Ավետիսյանը խոստովանում է՝ կանխատեսումներ անել և ժամանակից առաջ ընկել չի սիրում․
«Բնականաբար, Օլիմպիական խաղերին մասնակցելու ցանկությունը շատ մեծ է։ Կփորձեմ ամեն ինչ անել դրա համար, բայց թե ինչ կլինի մինչ այդ՝ երբեք չես իմանա։ Մեկ բան է ասել ու չանել, մեկ այլ բան է չասել, բայց անել»,- ընդգծում է Արթուր Ավետիսյանը։
Հիշեցնենք՝ Գերմանիայի Կոդբուս քաղաքում ընթացող գավաթի խաղարկության առաջին փուլում Հայաստանը դեռևս 3 մեդալ է նվաճել։ Առանձին գործիքների նժույգ-թափերի վարժության եզրափակիչում Գագիկ Խաչիկյանը հավաքել է 14.833 միավոր և զբաղեցրել երկրորդ հորիզոնականը, իսկ օղակների վարժության եզրափակիչում Հայաստանի մյուս ներկացուցիչ Վահագն Դավթյանը 4-րդ տեղն է զբաղեցրել՝ 14.500 միավորով:
Օլիմպիական խաղերի բրոնզե մեդալակիր, աշխարհի և Եվրոպայի չեմպիոն Արթուր Դավթյանը հենացատկի եզրափակիչում հանդես կգա այսօր՝ փետրվարի 26-ին: Դավթյանը առաջին տեղով է հաղթահարել հենացատկի որակավորումը՝ վաստակելով 14.949 միավոր։
