Հունահռոմեական ոճի ըմբիշ, Օլիմպիական խաղերի արծաթե մեդալակիր, աշխարհի ու Եվրոպայի չեմպիոն Արսեն Ջուլֆալակյանը լրագրողների հետ զրույցում ներկայացրել է, թե ինչ պայմանավորվածություն է եղել իր, Կարապետ Չալյանի, Հայաստանի ըմբշամարտի ֆեդերացիայի ու ՀԱՕԿ նախագահ Գագիկ Ծառուկյանի միջև, և ինչպես է այն խախտվել.
«2019 թվականի Աշխարհի առաջնությունից մոտ մեկ ամիս առաջ տեղի ունեցավ հանդիպում, ոչ իմ նախաձեռնությամբ, ՀԱՕԿ նախագահի, ըմբշամարտի ֆեդերացիայի նախագահի, իմ քաշային կարգում հանդես եկող մյուս մարզիկի ու իմ մասնակցությամբ` 4-ով էինք։ Պետք է որոշեինք, թե ինչ ենք անելու աշխարհի առաջնությունից հետո`ես հույս ունե՞մ Օլիմպիական խաղերին մասնակցելու, թե՞ արդեն սեպտեմբերից ավարտեմ կարիերաս, գիտեք իմ զբաղվածությունն ու այն, որ անմարդկային պայմաններում եմ մարզվում:
Ընդհանուր հայտարարի եկանք, ՀԱՕԿ նախագահն ու ըմբշամարտի ֆեդերացիայի նախագահը հետևյալ սխեման առաջարկեցին՝ եթե տվյալ մարզիկը (խմբ.- Կարապետ Չալյանը) գնում է ԱԱ, հասնում է եզրափակիչ, նվաճում է ոսկե կամ արծաթե մեդալ, ապա պայքարը դադարում եմ, ես այլևս չեմ պայքարում Օլիմպիական խաղերի համար: Մնացած բոլոր դեպքերում`3-րդից 37-րդ տեղը զբաղեցնելու պարագայում, ստեղծվում են հավասար պայմաններ, 2020 թվականի գարնանը լինելու է միջազգային մրցաշար ու իրար մեջ պայքարում ով ավելի լավ հանդես գա, մեկնում է Օլիմպիական խաղերին։ Ես, չվստահելով այդ մարդուն, կրկնակի հարց եմ տալիս` եթե այնպես ստացվի, որ մարզիկը բրոնզե մեդալ նվաճի, այս նույն պայմանը տարածվո՞ւմ է, թե ես ուղղակի թողնեմ սպորտը: Ասվել է` ոչ, պայմանավորվածությունը վերաբերում է միայն առաջին ու երկրորդ տեղին: Համաձայնության ենք եկել, ձեռք ենք սեղմել ու բաժանվել ենք։
ԱԱ-ին մասնակցեց`գրավելով 5-րդ տեղը: Չեմ կարող պատկերացնել, թե ինչ հրաշալի վիճակահանություն էր։ Մեկ շրջան ազատ էր, հաջորդ շրջանում մրցեց վենեսուելացու հետ. այնտեղ չկա հունահռոմեական ըմբշամարտ, երրորդ շրջանում մրցեց ճապոնացու հետ, որը ոչ մի տիտղոս չունի, չորրորդ շրջանում` արդեն վարկանիշի համար, հաղթել է մեկ քաշային կարգ ներքև հանդես եկող բելառուսցի մարզիկին 4:3 հաշվով, դրանից հետո պարտվել է շվեդին, որին ես անցած տարի 8:0 եմ հաղթել, ու պարտվել է պարսիկին: Խնդրեմ աշխարհի առաջնության իրենց այդքան չարչարված ու բարձր անվանած վարկանիշը. այո նվաճվել է, բայց ինչ ճանապարհով:
Անցնում է ժամանակ, նոյեմբերին, քանի որ պետք է արդեն մեր ծրագիրը կազմեինք, թե ինչպես ենք անցկացնելու նախապատրաստությունը մյուս տարվա գարնան մրցաշարին, հանդիպում է եղել ՀԱՕԿ նախագահի, ֆեդերացիայի նախագահի, իմ և Լևոն Ջուլֆալակյանի մասնակցությամբ, որպեսզի հասկանանք՝ որ մրցաշարով է այդ հարցը լուծվելու: Լևոն Ջուլֆալակյանին առաջարկ եղավ, որ ինքը առաջարկի, թե որ մրցաշարով որոշվի:
Լևոն Ջուլֆալակյանն ասել է, որ մեզ համար բացարձակ սկզբունքային չէ, թե որ մրցաշարին կմեկնենք, հիմա էլ ենք կրկնում: Լևոն Ջուլֆալակյանն ասաց, որ ճիշտը 4 ամիս առաջ միջազգային մրցաշարի մասնակցելն է՝ հիմնավորելով իր առաջարկը:
Ի դեպ, շատ երկրներ որտեղ կա մրցակցություն, Տոկիո մեկնող կազմը որոշելու են հունիսի 15-ին Դորտմունդում կայանալիք մրցաշարում: Շատ են խոսում Հունգարիայից, բայց իմ քաշային կարգում այդ երկրի ներկայացուցիչը, որը դարձավ աշխարհի չեմպիոն, դեռ իր տեղը չունի Օլիմպիական խաղերում, քանի որ այդ քաշում կա մրցակցություն»,- ասել է Արսեն Ջուլֆալակյանն ու պատմել, թե ինչպես ու ինչ հանգամանքներում է խախտվել նախապես ձեռքբերված պայմանավորվածությունը.
«Դրանից հետո ես իմ հաշվին, իմ ծախսերով մեկնում եմ ԱՄՆ հավաքների, բայց մինչ այդ, երբ բոլոր ծախսերն իմ կողմից արդեն արված էին, մարզիչների կողմից որոշման փոփոխություն է լինում, որ Տոկիո-2020-ին մեկնող մարզիկը վճռվելու է հունվարի 17-ին Նիցում մեկնարկող մրցաշարի արդյունքում։ Լևոն Ջուլֆալակյանը հանդիպում է մարզիչներին ու բացատրում, թե ինչու է սխալ Տոկիո-2020-ից 8 ամիս առաջ ընտրել մասնակցին … երբ մարզիկներից մեկն այդ ժամանակ սար է բարձրանում, մյուսը դահուկ է քշում, մյուսը ծանրաձող է բարձրացնում, տվյալ ֆիզիկական վիճակում տանել և ընտրել ՕԽ-ի մասնակից, քանի որ նման մարզավիճակում չի կարող օբյեկտիվ լինել ընտրությունը: Դա կլինի ուղղակի հարցի փակում` ով հաղթի, հաղթի:
Հիմնավորվում է, որ ԵԱ-ից առաջ օլիմպիական կազմ որոշելը սխալ է, սխալ է այդ մասին 8 ամիս առաջ հայտնելը, քանի որ երկրորդ մարզիկը «կհանձնվի», իմաստ չի ունենա նրա պայքարը, եթե այդ հարցը փակում ենք: Այս ամենը նրանք չեն ընդունում, ասում են, որ ո՛չ, հունվարի 17-ի մրցաշարն է լինելու որոշիչ։ Մենք էլ, հիմք ունենալով սեպտեմբերին ունեցած պայմանավորվածությունը, չենք համաձայնվում նրանց հետ:
Դեկտեմբերի 25-ին, երբ արդեն ԱՄՆ-ում էի, Լևոն Ջուլֆալակյանն ինձ զանգահարում է և ասում, որ մարզիչները ՀԱՕԿ նախագահին վերջնական փոխանցել են, որ բացի Նիցի մրցաշարից, չեն մասնակցելու որևէ մրցաշարի։ Ի դեպ, միտք հնչեց, թե հայրս ասել է, որ Արսենը պատրաստ չէ Նիցայի մրցաշարում պայքարել տվյալ մարզիկի հետ. երբեք նման բան չի եղել, որ ես պատրաստ չլինեմ որևէ մարզիկի հետ պայքարել: Իսկ հիմա մեր պահանջը ո՞րն է, պայքար տվյալ մարզիկի հետ: Նման հայտարարություն ո’չ իմ, ո’չ Լևոն Ջուլֆալակյանի կողմից երբեք չի եղել: Լևոն Ջուլֆալակյանի կողմից միայն ասվել է, որ սխալ է տվյալ մարզավիճակում ու տվյալ ժամանակահատվածում առհասարակ որոշում կայացնել, թե որ մարզիկն է ավելի ուժեղ: Եկեք մրցաշարի մասնակցենք գարնանը. ով կհաղթի, նա կմեկնի Օլիմպիական խաղեր, ինչին նրանք չեն համաձայնվել»:
Հունվարին Արսեն Ջուլֆալակյանը միջազգային մրցաշարի մասնակցեց Դանիայում ու ոսկե մեդալ նվաճեց: Գևորգ Ալեքսանյանն ու հավաքականի մարզիչներն իրենց զարմանքն էին արտահայտել, թե ինչպես է հնարավոր Դանիայում պատրաստ լինել մրցաշարի մասնակցել, բայց Նիցայում` ոչ: Արսեն Ջուլֆալակյանը սա հետևյալ կերպ է բացատրում.
«Դանիայի մրցաշարը եղել է իմ նախապատրաստության փուլերից մեկը, ու նույնիսկ եթե այնտեղ պարտվեի, ինձ ոչ ոք չէր կարող մեղադրել, որովհետև գիտեին, թե ֆիզիկական ինչ վիճակում եմ մոտենում: Մտքեր հնչեցին, թե Դանիայի մրցաշարը թույլ է. կարող եք նայել և տեսնել, թե ովքեր են մասնակցել այդ մրցաշարին, Դանիայում 7 գոտեմարտ եմ անցկացրել, բոլոր երկրները մասնակցել են իրենց առաջին թիմերով։ Նա Նիցում 4 գոտեմարտ է անցկացրել, 3-ում հաղթել է, մեկում պարտվել»:
Ջուլֆալակյանն ընդգծում է` թե’ ՀԱՕԿ-ը, թե’ Սպորտի նախարարությունը չեն ցանկանում միջամտել ու խառնվել մարզչական խորհրդի գործերին` հետագա պատասխանատվությունը թողնելով մարզչական խորհրդի վրա, բայց երբ անարդարություն է եղել, պետք է այդ մասին բարձրաձայնել.
«Մեր խնդիրը հետևյալն է. մենք չենք ասում` ով է ուժեղ, մենք ասում ենք`տվեք հնարավորություն ստուգելու ով է ուժեղ: Թող մեկ անգամ ևս մեկնումեկը հաղթի ու գնա Օլիմպիական խաղեր: Սա ոչ թե Օլիմպիական ուղեգրի համար է, այլ որոշելու, թե երկուսիցս ով է ուժեղ: Խոստացված, պայմանավորված մրցաշարը կազմակերպեք, գնանք կպնենք, ով հաղթեց`անկախ նրանից, թե ինչպես է հաղթել` դատավորն է վատը եղել, հիվանդ է եղել, կաղ է եղել, կամ արգելված հնարք է արել, կապ չունի`ում ձեռքը բարձրացվեց, նա պետք է գնա Տոկիո: Դա է եղել մեր պայմանավորվածությունը սեպտեմբերին, նոյեմբերին ու այդպես է կառուցվել մեր ամբողջ աշխատանքը»,- եզրափակում է իր խոսքը Արսեն Ջուլֆալակյանը: