2021 թվականի հոկտեմբերին Գինեսի ռեկորդակիր Ռոման Սահրադյանը Երևանում իր հերթական ռեկորդն էր սահմանել։ Մարզիկը ուղղաթիռից կախված վիճակում մեկ րոպեում կատարել է 23 անընդմեջ ձգում դեպի վեր վարժությունը՝ գերազանցելով Գինեսի հանձնաժողովի սահմանած 20 ցուցանիշը։ Ռեկորդի սահմանումը իրականացվել է Իջևանի գինու և կոնյակի գործարանի հովանավորության ներքո։
Ռոմանը, լինելով Գինեսի վեցակի ռեկորդակիր, հանդիսանում է Գինեսի համաշխարհային ռեկորդների գրքում աշխարհում ամենաշատ ռեկորդներ գրանցած հայը։
Փետրվարի 19-ին Երևանի Դաբլ թրի Հիլթոն հյուրանոցում տեղի ունեցավ Hi-Am (Հայ_Էմ) հիմնադրամի Դյուցազնատուն մարզակենտրոնի տնօրեն, Գինեսի վեցակի, Դյուցազնագրքի բազմակի ռեկորդակիր Ռոման Սահրադյանի, Դյուցազունների ասոցացիա ՀԿ ղեկավար Վարդան Թովմասյանի և Իջևանի գինու, կոնյակի գործարանի կոմերցիոն տնօրեն Գևորգ Ասլանյանի՝ Գինեսում գրանցված երկու ռեկորդների վերաբերյալ մամուլի ասուլիսը։
Այդ ռեկորդներն են՝ պտտաձողից մեկ ձեռքով կախ դրությունից ոտնաթաթերի բարձրացում և հպում պտտաձողին մեկ րոպեում (20 անգամ), իսկ մյուսը՝ ուղղաթիռից կախ դրությունից «ծալում դեպի վեր» վարժությունը անընդմեջ մեկ րոպեում (23 անգամ)։ Ասուլիսին ներկայացվեց Ռոմանի գրանցված երկու ռեկորդների հավաստագրերը։
«Ռոմանը սահմանեց 49-րդ և 50-րդ Գինեսի ռեկորդները մեր տարեգրության մեջ»,- նշեց Դյուցազունների ասոցացիա ՀԿ ղեկավար Վարդան Թովմասյանը, ավելացնելով, որ մեկ շնչին ընկնող ռեկորդների քանակով Հայաստանն առաջատարներից մեկն է աշխարհում։
«5-րդ ռեկորդը՝ պտտաձողից մեկ ձեռքով կախ դրությունից ոտնաթաթերի բարձրացում և հպում պտտաձողին մեկ րոպեում, նվիրել եմ 44-օրյա պատերազմում նահատակված հերոսներին, ովքեր իրենց արյան գնով պաշտպանեցին մեր հայրենքը։ Այդ մասին անգլերենով նշված է նաև Գինեսի գրքում և կայքում։
Երկրորդ ռեկորդը սահմանեցի հոկտեմբերի 2-ին։ Դա արդեն 6-րդ ռեկորդն էր, որի շնորհիվ դարձա առաջին հայը, ով այդքան Գինեսի ռեկորդ է գրանցել։ «Ռեկորդների տարափն» այսքանով չի սահմանափակվում, որովհետև ունենք շարունակություն՝ իմ և ապագա սաներիս կողմից, ովքեր իրենց պատրաստավածությունը ստանում են Hi-Am (Հայ_Էմ) հիմնադրամի մարզակենրոնում, որը բացվել է երեք ամիս առաջ»,- ասաց Ռոման Սահրադյանը, շնորհակալություն հայտնելով Իջևանի գինու և կոնյակի գործարանի հիմնադիր Էմին Եղիազարյանին և Hi-Am (Հայ_Էմ) հիմնադրամի ղեկավար Նշան Աճեմյանին, Դյուցազունների ասոցացիա ՀԿ ղեկավար Վարդան Թովմասյանին։ «Իմ 5-րդ և 6-րդ ռեկորդներն անմիջապես կապված են պարոն Եղիազարյանի հովանավորչական գործունեության հետ»,-ավելացրել է Սահրադյանը։
«Շնորհավորում ենք Ռոմանին և հայ ազգին՝ հերթական ռեկորդների կապակցությամբ։ Իջևանի գինու և կոնյակի գործարանը, հանձինս սեփականատեր Էմին Եղիազարյանի, տարբեր ոլորտներում իր աջակցությունն է միշտ ցուցաբերում, այդ թվում՝ մարզաշխարհում։ Ցանկացած հայորդու հաղթանակը մեզ հպարտություն է բերում։ Մեզ համար շատ կարևոր է «հաղթանակ հասկացողությունը»։ Մենք տալիս ենք աջակցություն, որպեսզի ամբողջ աշխարհը տեսնի, թե հայորդին ոնց կարող է հաղթել և ստանում ենք մի քանի անագամ ավել տվյալ հայորդուց, երբ նա հաղթանակ է բերում։ Դրանից ավել գնահատական Իջևանի գինու, կոնյակի գործարանին և սեփականատեր Էմին Եղիազարյանին պետք չէ, դա լիովին բավարում է։ Մենք հպարտանում ենք այն բոլոր մարզիկներով, հանձինս Ռոմանի, ովքեր կարողանում են հաղթել, որովհետև մեզ համար հաղթանակը ամենաբարձր ցուցանիշներից մեկն է։ Մենք ինքներս էլ միշտ կանգնած են հաղթանակի ճանապարհին․ վերջին հաղթանակը Մոսկվայի ProdExpo2022-ի ժամանակ տարած հաղթանակներն են՝ 4 մեդալի տեսքով։ Մենք շարունակելու ենք աջակցել Ռոմանին և մյուս մարզիկներին, ովքեր պատրաստվում են ՀՀ անունը և դրոշը միշտ պարզել, ծածանել և հպարատացնել հայ ազգին»,- ասաց Իջևանի գինու, կոնյակի գործարանի կոմերցիոն տնօրեն Գևորգ Ասլանյանը։
ArmSport-ի հետ զրույցում Ռոման Սահրադյանը նշեց, որ իր վերջին ռեկորդների սահմանումը իրականացվել է Իջևանի գինու և կոնյակի գործարանի հովանավորության ներքո։ Մարզիկն իր ռեկորդը նվիրել է վերջինիս հիմադրման 70-ամյակին։
«Երեք ամիս առաջ Թալինում տեղի ունեցավ Hi-Am (Հայ_Էմ) հիմնադրամի Դյուցազնատուն մարզակենտրոնի բացումը՝ Իջևանի գինու և կոնյակի գործարանի հիմնադիր, բարերար պարոն Էմին Եղիազարյանի հովանավորչությամբ և Hi-Am (Հայ_Էմ) հիմնադրամի ղեկավար Նշան Աճեմյանի աջակցությամբ։ Ունեմ 15-ից ավել սան, որոնցից երկու հոգին արդեն պատրաստ են գրանցելու ռեկորդներ»,- ArmSport-ին ասաց Ռոմանը։
Սահրադյանն ավելացրեց, որ մայիսին Դյուցազնատանը միջոցառում կկազմակերպվի, որի ժամանակ Ռոմանը նոր՝ 7-րդ ռեկորդը կսահմանի, ինչպես նաև նոր ռեկորդներ կձևակերպեն նրա սաները։
Վար Բաբայան
Ռոմանի՝ հոկտեմբերին գրանցված 6-րդ ռեկորդի տեսանյութը՝ ստորև․
GALLERY
