30-ամյա նիգերիացի հարձակվող Օդիոն Իգալոն, որը չինական «Շանհայ Շենհուայից» տեղափոխվել է անգլիական «Մանչեսթեր Յունայթեդ», խոստովանել է, որ 1 մլն ֆունտ է տրամադրել հայրենիքում մանկատուն կառուցելու համար:
«Ես երազում եմ այլ մարդկանց կյանքերի վրա ազդեցություն ունենալու մասին, ու սա քայլ է ճիշտ ուղղությամբ: Հուսով եմ` կյանքը կփոխվի դեպի լավը, կկարողանանք հասնել մանկատան առջև դրված բոլոր խնդիրներին, իսկ երեխաները հաջողակ կլինեն կյանքում»,- Օդիոնի խոսքերն է փոխանցում The Sun-ը:
2015 թվականին Օդիոնը Daily Mail-ին տված հարցազրույցում պատմել էր, որ օգնում է նաև այլ ընտանիքների իր հայրենիքում.
«Իմ ընտանիքն ինձ համար միշտ առաջին տեղում է: Ամեն ամիս ես նրանց գումար եմ ուղարկում, բայց գումարներ եմ հատկացնում նաև այլ ընտանիքների` ավելի քիչ ապահովված: Ես ինքս աղքատ եմ եղել: Գումարներ եմ ուղարկում երեխաների համար, դպրոցներին ,հոգ եմ տանում նաև 45 այրի կանանց մասին, ովքեր ամուսին չունեն: Փորձում եմ բարեգործական հիմնադրամ ստեղծել: Ես գիտեմ, թե ինչ է նշանակում ոչինչ չունենալ»,-ասել է Իգալոն:
Նախորդ մրցաշրջանում Իգալոն ակումբային մակարդակում 19 հանդիպման է մասնակցել: Նրա ակտիվում 10 գոլ կա: Ֆուտբոլիստի պայմանագիրը «Շանհայ Շենհուայի» հետ նախատեսված է մինչև 2021 թվականի ավարտը: Հարձակվողի տրանսֆերային արժեքը 6.5 մլն եվրո է գնահատվում:
Ավելի վաղ Իգալոն երեք մրցաշրջան անցկացրել է ԱՊԼ-ում` խաղալով «Ուոթֆորդում», որի կազմում 100 հանդիպման է մասնակցել, դարձել է 40 գոլի ու 11 գոլային փոխանցման հեղինակ:
