Ամեն ինչ ավարտված չէ, քանի դեռ ամեն ինչ ավարտված չէ։ Հենց այս տողերն ամենից շատ տպավորեցին ինձ Մելբուրնում կայացած տարվա առաջին Grand Slam-ի ընթացքում։ Այս խոսքերն ասաց Ռոջեր Ֆեդերերը Թենիս Սանդգրենի հետ խաղում 7 match point-եր խաղարկելուց ու հաղթելուց հետո։
Ողջու՜յն։ Ու նորից մենք այստեղ ենք։ Ասե՜ս ոչինչ էլ չէր եղել։ Որքա՜ն դրամա, որքա՜ն կիրք այս 14 օրերի ընթացքում։ Մարդիկ գուցե կարծում են, թե ժամավաճառություն է խոսել թենիսի մասին, քանզի Հայաստանում նրան հետևողները մեծ թիվ չեն կազմում, բայց համառորեն պետք է շարունակել լուսաբանել կյանքի դասեր մատուցող մեծագույն սպորտի չքնաղ իրադարձությունները։ Եկե՛ք տեսնենք՝ ինչ կյանքի դասեր տվեց Մեծ սաղավարտի տարվա առաջին մրցաշարը։
Այնքան ասելու բան կա՝ չգիտես, թե ինչից սկսես։ Լա՛վ։ Եկեք սկսենք այն փոքրիկ աղջնակից, ով հավատաց։ Նրա վրա ծիծաղում էին ու կասկածում, իսկ նա ապացուցեց, որ նրանք սխալ էին։ Ավստրալիայի բաց առաջնության գլխավոր իրադարձություններից մեկը Կարոլին Վոզնյացկիի հրաժեշտն էր մեծ սպորտին։
Նորվեգուհին ավարտեց կարիերան։ Նա երկու տարի առաջ Մելբուրնում չեմպիոն էր դարձել։ Կարոլինը իր կարիերայի վերջին մրցաշարում լավ հանդես չեկավ։ Թունիսից բոլորին անակնկալ մատուցած Օնս Ջաբուրը երրորդ շրջանում «ավարտեց» Վոզնյացկիի կարիերան։ Դա մի կողմ։ Վոզնյացկու խոսքերից մի հատված․ «Ես ունեի երազանք․ հաղթել Մեծ սաղավարտի մրցաշարում ու լինել աշխարհի առաջին ռակետը։ Ոչ ոք ինձ չէր հավատում ու ծիծաղում էր ինձ վրա։ Բայց ես կատարեցի իմ երազանքը։ Կապ չունի, թե որտեղից ես դու ու ինչպիսինն ես։ Եթե ունես երազանք ու գնում ես դրա հետևից, ապա դու կարող ես հասնել դրան»։
Հաջողությու՜ն Կարոլին, թենիսը կկարոտի քեզ։
Ռոբոտային նյարդերի 17-րդ հաղթանակը
Ջոկովիչը պաշտպանեց տիտղոսը։ 12 տարի առաջ Մելբուրն Պարկում առաջին անգամ Grand Slam հաղթած պատանին հիմա արդեն նմանատիպ 17 տիտղոս ունի, որոնցից 8-ը Ավստրալիայում։
Սա ֆանտաստիկ է։ Նովակից շատ Մելբուրնում ոչ ոք չի հաղթել։ Այս հաղթանակից հետո Ջոկովիչը վերադառնում է նաև ATP-ի վարկանիշային աղյուսակի առաջին հորիզոնական։ Ամբիցիոզ Նովակը նշեց, որ ցանկանում է շրջանցել Ֆեդերերին աշխարհի առաջին ռակետ եղած շաբաթների քանակով։ Նովակը նշեց, որ մտքում պահում է նաև Grand Slam-երի մրցավազքը։
Իհարկե, բոլորին տպավորեց Նովակի հետհաղթական speech-ը։ Սերբ թենիսիստը խոսեց 2020-ի ծանր մեկնարկի մասին։ Ավստրալիայում հրդեհներ, քաղաքական կոնֆլիկտներ, որի պատճառով ամեն օր մարդիկ են զոհվում։ Հետո Նոլեն անդրադարձավ նաև Կոբի Բրայանտի և նրա դստեր ողբերգական մահվանը։ Ջոկովիչը կոչ արեց միասնական լինել, լինել սիրելի մարդկանց կողքին։
Տղամարդկանց մենախաղում ֆանտաստիկ մրցաշար անցկացրեց Դոմինիկ Տիմը։ Ավստրացին երրորդ անգամ խաղաց Մեծ սաղավարտի մրցաշարի եզրափակչում ու երրորդ անգամ պարտվեց։ Խե՜ղճ Տիմ։ Երկու անգամ Ռոլան Գարոսի վճռորոշ խաղերում նա պարտվել է Ռաֆա Նադալին ու մեկ անգամ Ավստրալիայում Ջոկովիչին։
Տիմը մշտապես խաղում է եզրափակիչներում այդ մասշտաբի արքայի հետ։ Տեսարանն ամբողջացնելու համար պետք է Ուիմբլդոնում հանդիպել Ֆեդերերին։ Տիմի ժամանակը կգա, ուղղակի այս երեքը բոլոր հաշվարկներից ու տրամաբանություններից դուրս են։ Փաստը մնում է փաստ․ 2020 թվականին աշխարհում դեռևս չկան 90-ական թվականներին ծնված Մեծ սաղավարտի մրցաշար հաղթած տղամարդիկ։ Դե 80-ականներին ծնվածները չեն թողնում․․․
38-ում այդքան կի՞րք․ Ֆեդերերի փայլուն մրցաշարը
Ռոջեր Ֆեդերերը հստակորեն ապացուցեց, թե ինչու է խաղում մինչև հիմա։ 38 տարեկանում նա ֆանտասիկ մրցաշար անցկացրեց, հարցականի տակ դրեց իր առողջությունը, կատակեց ու հասկացնել տվեց, որ չունի մտադրություն կարիերան ավարտելու։ Մինչ եզրափակչի մեկնարկը Ջոն Մաքենրոյը, Մաց Վիլանդերն ու Բարբարա Շետը քննարկում էին, թե որն է տղամարդկանց մրցաշարի գլխավոր պահը։ Բոլորը միաձայն կարծում էին, որ դա Ֆեդերերի հաղթանակն էր Միլմանի նկատմամբ։
Երրորդ շրջանում Ֆեդերերը հաղթեց Միլմանին 4 ժամ տևած խելահեղ պայքարում։ Երկու շրջան անց Ֆեդերերը մեկ այլ էպիկ բլոկբաստերի հերոս դարձավ։ 7 match point-եր խաղարկելուց հետո աճուկի վնասվածք ունեցող շվեյցարացին հաղթեց Թենիս Սանդգրենին։ Ֆեդերերը խաղից հետո ասաց հետևյալը․ «Ամեն ինչ ավարտված չէ, քանի դեռ ամեն ինչ ավարտված չէ»։ «Ռոջե՜ր Ֆեդերեր, դու նման չես ոչ մեկի, ում ես տեսել եմ այս կյանքում»,-խաղից հետո կորտում ինտերվյուի ժամանակ ասաց Ջիմ Քուրիեն։
Մրցաշարի թևավոր խոսքերից մեկն էլ Թենիս Սանդգրենի դեմ խաղից առաջ էր․ «Ես իմ կյանքում շատ եմ թենիս խաղացել, բայց երբեք Թենիսի դեմ չեմ խաղացել»։
Կիսաեզրափակչում Ֆեդերերը վնասվածք ուներ ու չկարողացավ ինչպես հարկն է պայքարել Ջոկովիչի հետ։ «Հարգանք Ռոջերին։ Ակնհայտորեն երևում էր, որ նա ցավեր ունի։ Նման վիճակում նա եկավ ու արեց հնարավոր ամեն բան։ Նա արժանի է հարգանքի»։
Իմիջիայլոց, Ֆեդերերի երկրպագուները կարող են հանգիստ շունչ քաշել, քանի որ 38-ամյա շվեյցարացին մտադրություն չունի կարիերան ավարտելու։
Ռաֆա Նադալը, իհարկե, պետք է ավելացնի։ Իսպանացին չհաղթեց Մելբուրնում նաև այս տարի։ Իհարկե, Ռաֆայի համար գլխավորը գրունտի հատվածն է լինելու, որը նա կփորձի կրկին բոլորից լավ անցկացնել։
Հարկ է նշել, որ մրցաշարում շատ լավ տեսք ուներ Նիկ Կիրիոսը։ Բացառիկ տաղանդի տեր տղան կարծես փորձում է հաղթահարել հոգեբանական խնդիրները։ Մաքենրոյը վստահ է, որ եթե նա շարունակի այսպես, մրցաշրջանը կավարտի թոփ-10-ում։
Գերազանց մրցաշար անցկացրեց նաև Ալեքսանդր Զվերևը։ Մրցաշարում յուրաքանչյուր սեթի համար 10 հազար դոլար նվիրաբերող Զվերևից սպասելիքները, թվում էր, շատ չէին, բայց Սաշան եկավ ու կերտեց իր կարիերայի դեռևս լավագույն արդյունքը Մեծ սաղավարտերում՝ հասնելով կիսաեզրափակիչ։
Նոր չեմպիոնուհի կանանց մենախաղում
Կանանց մոտ, իհարկե, ամեն ինչ այլ է։ Սերենա Ուիլյամսը այս անգամ ավելի շուտ ձախողվեց։ Գերազանց մրցաշար անցկացրեց 15-ամյա Կոկո Գաուֆը, ով 1/8-ում պարտվեց Սոֆիա Կենինին։ Օրեր անց հենց նա էր դառնալու մրցաշարի չեմպիոնուհի։ Երկրորդ Grand Slam-ն անընդմեջ կանանց մենախաղում նոր չեմպիոնուհի ի հայտ եկավ։ Բիանկա Անդրեեսկուից հետո ունեցանք նաև Կենինին։
Բացառիկ մրցաշար անցկացրեց Թունիսի ներկայացուցիչ Օնս Ջաբուրը։ Նրան հայրենիքում խելահեղ ձևով ընդունեցին։ Նրան ևս պայքարից դուրս թողեց Կենինը, այս դեպքում արդեն քառորդ եզրափակչում։ Հիանալի էր նաև եզրափակչի մյուս մասնակիցը՝ Գարբինե Մուգուրուզան։ Մեծ սաղավարտի մրցաշարերի կրկնակի չեմպիոնուհին վերջին տարիների առաջին unseeded խաղացողն էր AO-ում, ով եզրափակիչ հասավ։ Այնտեղ Կենինը ավելի ուժեղ գտնվեց։
Եվ վերջում․ Ավստրալիայի բաց առաջնությունը այս տարի տարբերվում էր մնացած բոլոր տարիներից։ Անտառային սարսափելի հրդեհներն ուղղակի հանգիստ չէին տալիս մայրցամաքին տարվա սկզբին։ Հիմա կատարվում են վերականգնողական աշխատանքներ, տուժածներին օգնություն ցուցաբերելու համար հատուկ ֆոնդեր են բացվել, որտեղ միլիոնավոր դոլարներ են փոխանցվում։ AO-ն ևս իր մեծ ավանդն ունեցավ այս ամենում։ Մի՞թե սա չէ գլխավոր ձեռքբերումը։ Ես ասում եմ․ այո՛։
ԱՕ-ն տվեց բազմաթիվ էմոցիաներ, խլեց բազմաթիվ նյարդեր։ Սա է թենիսը։ Ինչպես օրեր առաջ ընթերցեցի ընկերներիցս մեկի գրառումներում․
«Թենիսը առողջարար մարզաձև է, երբ խաղում ես, բայց այն անկասկած վնասում է առողջությանը, երբ դիտում ես․․․»:
Արամ Սահակյան
