Այս շաբաթ ավարտվեցին ԱԱ-2022-ի եվրոպական գոտու ընտրական փուլի առաջին երեք տուրերը։ Այժմ կարող ենք ամփոփել մրցաշարի գարնանային հատվածը՝ մեր դիտակետում ունենալով բոլոր խմբերում տիրող իրավիճակն այս պահին։
Նախ, նշենք, որ միայն չորս հավաքականներ երեք խաղերից հետո ոչ մի միավոր չեն կորցրել. Հայաստան, Անգլիա, Դանիա և Իտալիա: Շվեդիան և Շվեյցարիան ունեն վեցական միավոր՝ ընտրական այս փուլում անցկացրած երկու հանդիպումներում: Մնացած բոլոր թիմերն արդեն միավորներ են կորցրել:
Մրցաշարի ամենարդյունավետ հավաքականներն են Դանիան (14 գոլ), Բելգիան (12 գոլ) և Նիդերլանդները (11 գոլ)։ Ոչ մի գոլ բաց չեն թողել միայն Դանիան, Իտալիան և Շվեդիան։ Մրցաշարի լավագույն ռմբարկուն 5 գոլով Ալեքսանդր Միտրովիչն է Սերբիայի հավաքականից, իսկ գոլային փոխանցումների քանակով լավագույնը նույն հավաքականի մեկ այլ խաղացող է՝ Դուշան Տադիչը (4 փոխանցում):
Հիշեցնենք, որ Քաթարում կայանալիք Աշխարհի առաջնության ուղեգիր են նվաճում ընտրական խմբերի առաջին տեղը զբաղեցրած թիմերը, իսկ մնացած ուղեգրերը փլեյ-օֆֆ փուլում կխաղարկեն երկրորդ տեղերը զբաղեցրած թիմերը:
10 խմբերում ՝ որոնք կազմված են 5-ական և 6-ական թիմերից, այս պահին հետևյալ իրավիճակն է․
✅ A խումբ. Սկանդալ ու անակնկալ
1. Պորտուգալիա — 7 միավոր
2. Սերբիա — 7
3. Լյուքսեմբուրգ- 3
4. Իռլանդիա — 0
5. Ադրբեջան — 0
Այս խմբում առանձնապես ոչ ոք չէր էլ կասկածում, որ ֆավորիտները Պորտուգալիայի և Սերբիայի հավաքականներն են։ Եվ այժմ նրանք 7-ական միավորով խմբում առաջատարներն են։
Երրորդ տուրի խաղում Պորտուգալիայի հավաքականի հարձակվող Կրիշտիանու Ռոնալդուն Լյուքսեմբուրգի դեմ խաղում (3:1) ազգային հավաքականի մարզաշապիկով 103-րդ գոլը խփեց։ Ալի Դաեիի (Իրան) համաշխարհային ռեկորդին հասնելու համար Ռոնալդուին մնում է վեց գոլ խփել հավաքականի կազմում: Հարձակվողը նաև շարունակեց անհավանական շարքը, որում 18 տարի անընդմեջ գոլ է խփում Պորտուգալիայի հավաքականի կազմում, իսկ ամենաարդյունավետ տարին 2019 թվականն էր, երբ նա հավաքականում անցկացրած 10 խաղում կարողացավ 14 անգամ գրավել մրցակցի դարպասը:
Իսկ Պորտուգալիա-Սերբիա հանդիպման (2: 2) ավարտին հարձակվող Կրիշտիանու Ռոնալդուն հարվածեց դարպասին, սակայն սերբ պաշտպան Ստեֆան Միտրովիչը հեռացրեց գնդակը դարպասից: Մրցավարները՝ Դենի ՄաքՔիլիի գլխավորությամբ, կարծել էին, որ այս դրվագում գնդակը չի հատել սահմանը, ուստի գոլ չի գրանցվել: Դրանից հետո Ռոնալդուն բարկացած հանել էր ավագի թևկապը և նետել խոտածածկին, ինչը բուռն քննարկման թեմա էր դարձել ֆուտբոլային աշխարհում։
Մեծ անակնկալ այս խմբում մատուցեց Լյուքսեմբուրգի հավաքականը՝ 1-0 հաշվով հաղթելով իռլանդացիներին։
✅ B խումբ․ Զլատանի վերադարձը
1․ Իսպանիա — 7
2․ Շվեդիա — 6
3․ Հունաստան — 2
4․ Վրաստան — 1
5․ Կոսովո — 0
Նույնը կարելի է ասել այս խմբի համար․ երկու բացահայտ ֆավորիտ։ Իսկ գլխավոր իրադարձությունն այս խմբի կարելի է համարել Զլատան Իբրահիմովիչի վերադարձն ազգային թիմ։ «Միլանի» հարձակվողը դարձավ Շվեդիայի ազգային հավաքականի պատմության ամենատարեց ֆուտբոլիստը: Իբրահիմովիչը խաղադաշտ է դուրս եկել 39 տարեկան 173 օրական հասակում Վրաստանի հետ 2022 թվականի աշխարհի գավաթի խաղարկության ընտրական մրցաշարի 1-ին տուրի խաղում (1: 0):
Իսպանիայի հավաքականի ավագ Սերխիո Ռամոսի համար Կոսովոյի դեմ հանդիպումը (3:1) 180-րդն էր հավաքականի կազմում: Այսպիսով, 35-ամյա ֆուտբոլիստը հավաքականների կազմում անցկացրած խաղերի քանակով երրորդն է աշխարհում: Ըստ այդ ցուցանիշի, նա հասել է Օմանի ներկայացուցիչ Ահմեդ Մուբարաքին:
Իսպանիան նաև գերազանցել է Արևմտյան Գերմանիայի ռեկորդը՝ Աշխարհի առաջնության ընտրական 37 անընդմեջ հանդիպումներում դառնալով գոլի հեղինակ: Նախորդ ռեկորդը կազմել է 36 խաղ և գրանցվել է 1934-1985 թվականների ընթացքում:
✅ C խումբ․ Բացահայտ ֆավորիտը
1․ Իտալիա — 9
2․ Շվեյցարիա — 6
3․ Հս․ Իռլանդիա — 1
4․ Բուլղարիա — 1
5․ Լիտվա — 0
Այս խմբի վերաբերյալ ասելու շատ բան չկա․ Իտալիան այստեղ բացահայտ ֆավորիտն է։ Իտալիան գոլ բաց չի թողել 7-րդ անընդմեջ խաղում, ընդ որում դրանք բոլորն էլ ավարտել է հաղթանակով։ Սա Իտալիայի հավաքականի պատմության մեջ լավագույն արդյունքն է։ Բացի այդ, իտալացիներն իրենց անպարտելի հանդիպումների շարքը հասցրեցին 25 խաղի: 2006 թվականից ի վեր սա լավագույն ցուցանիշն է։ Այնպես որ, այս խմբում ֆավորիտն ակհայտ է, իսկ մյուս թիմերին մնում է պայքարել երկրորդ տեղի համար։
✅ D խումբ․ Բացահայտ ֆավորիտը․ մաս 2
1․ Ֆրանսիա — 7
2․ Ուկրաինա — 3
3․ Ֆինլանդիա — 2
4․ Բոսնիա և Հերցեգովինա — 1
5․ Ղազախստան — 1
Մեկ խումբն ասես մյուսի շարունակությունը լինի․ այստեղ ևս կա մեկ բացահայտ ֆավորիտ, և մնացածը․․․ Այս խմբում, հավանաբար, ավելի հետաքրքիր կլինի հետևել երկրորդ տեղի համար պայքարին։ Ի դեպ, ֆրանսիացի հարձակվող Անտուան Գրիզմանը Ֆրանսիայի ազգային հավաքականի կազմում իր 45-րդ անընդմեջ խաղն է անցկացրել Ղազախստանի հետ խաղում, ինչը նոր ռեկորդ է:
✅ E խումբ․ Բելառուսների հակառեկորդը, Բելգիան շարունակում է փայլել
1․ Բելգիա — 7
2․ Չեխիա — 4
3․ Ուելս — 3
4․ Բելառուս — 3
5․ Էստոնիա — 0
Իսկ այս խումբն երևի թե ավելի հետաքրքիր է։ Ի սկզբանե ֆավորիտ համարվող Բելգիային խոստանում է լուրջ մրցակցություն առաջադրել Չեխիայի ընտրանին, որի կազմում կարծես թե նոր աստղ է ձևավորվում՝ ի դեմս Թոմաս Սոուչեկի։
Բելգիայի ընտրանին սեփական ընդունել էր Բելառուսի հավաքականին ու ջախջախիչ պարտության մատնեց՝ 8 անպատասխան գնդակ ուղարկելով նրա դարպասը։ Սա Բելառուսի հավաքականի պատմության մեջ ամենախոշոր հաշվով պարտությունն էր։
✅ F խումբ․ Դանիան վերադառնում է եվրոպական ֆուտբոլային բարձունք
1․ Դանիա — 9
2․ Շոտլանդիա — 5
3․ Իսրայել — 4
4․ Ավստրիա — 4
5․ Ֆարերյան Կղզիներ — 1
6․ Մոլդովա — 1
Դանիական ֆուտբոլը կարծես թե կրկին վերելք է ապրում․ նախ երիտասարդական հավաքականը հաղթահարեց Եվրոյի խմբային մրցաշարը, իսկ նրանց ավագ գործընկերները պարզապես ֆանտաստիկ արդյունավետություն են ցույց տալիս այս ընտրական փուլում։
Մոլդովայի ազգային ընտրանին 2022 թվականի Աշխարհի առաջնության ընտրական մրցաշարի 2-րդ տուրի մրցավեճում 0:8 հաշվով պարտվեց Դանիայի ազգային ընտրանուն: Մոլդովայի ազգային հավաքականի համար այս պարտությունը պատմության մեջ ամենամեծն էր: Դանիայի համար այս հաղթանակը պատմության մեջ ամենախոշոր հաշվով հաղթանակն էր:
Չնայած այդ ամենին, Դանիային դեռ կարող են լուրջ մրցակցություն պարտադրել ավստրիացիները և շոտլանդացիները, նաև պետք չէ թերագնահատել Իսրայելի ընտրանուն։ Այնպես որ, այս խմբում ևս հետաքրքիր մրցակցություն է սպասվում։
✅ G խումբ. Դեռ ամեն ինչ առջևում է
1․ Թուրքիա — 7
2․ Նիդերլանդներ — 6
3․ Մոնտենեգրո — 6
4․ Նորվեգիա — 6
5․ Լատվիա — 1
6․ Ջիբրալթար — 0
Այս խումբը ամենահետաքրքիրներից մեկն է մրցակցային տեսանկյունից․ 4 թիմեր համառ պայքար են մղելու առաջին տեղի համար։ Մի քիչ հիասթափեցնող էր Նորվեգիայի խաղը՝ Հոլանդի և Էդեգորի գլխավորությամբ, բայց ինչ-որ բան հուշում է , որ նրանք դեռ կասեն իրենց խոսքն աշնանը։
Նշենք, որ «Նոայի» կիսապաշտպան Էդուարդ Էմսիսը Լատվիայի հավաքականի կազմում մեկ հանդիպում է անցկացրել ԱԱ-2022 եվրոպական գոտու նախընտրական փուլում։ Էմսիսը մասնակցել է միայն Թուրքիայի հավաքականի դեմ խաղին (3-3), իսկ Նիդերլանդների և Մոնտենեգրոյի հավաքականների հետ խաղերում նա մնացել էր պահեստայինների նստարանին։ Թուրքիայի հավաքականի հետ խաղում հենց նրա փոխանցումից հետո է Իկաունեկսը հավասարեցրել խաղի հաշիվը՝ փրկելով իր թիմին պարտությունից։
Մարտի 27-ին Ամստերդամում տեղի ունեցավ 2022 թվականի Աշխարհի գավաթի ընտրական հանդիպումը Նիդերլանդների և Լատվիայի ազգային հավաքականների միջև: Հանդիպումը ավարտվեց տանտերերի հաղթանակով` 2:0 հաշվով: Լյուկ դե Յոնգի 2-րդ գոլը Նիդերլանդների 300-րդ գոլն էր Աշխարհի առաջնության ընտրական փուլում: Նիդերլանդները դարձավ առաջին եվրոպական թիմը, որը հասավ այս ցուցանիշին:
✅ H խումբ․ Արևելաեվրոպական ինտրիգներ
1․ Խորվաթիա — 6
2․ Ռուսաստան — 6
3․ Սլովակիա — 5
4․ Կիպրոս — 4
5․ Սլովենիա- 3
6․ Մալթա — 1
Այս խմբում, բացառությամբ Մալթայի, մնացած բոլոր հավաքականները կփորձեն խառնել Խորվաթիայի ընտրանու խաղաքարտերը, որն անկասկած, խմբի գլխավոր ֆավորիտն է։ Որպես բոնուս, նշենք նաև Կիպրոսի հավաքականի լավ խաղն այս փուլում։ Նրանք ևս կարող են դառնալ մրցաշարի գլխավոր բացահայտումներից մեկը, իհարկե, մեր հավաքականից հետո միայն։
Խորվաթիայի հավաքականը Աշխարհի 2022 թվականի առաջնության ընտրական փուլում նվազագույն հաշվով հաղթեց Կիպրոսին։ Այդ խաղը կիսապաշտպան Լուկա Մոդրիչի համար 135-րդը դարձավ ազգային թիմի կազմում։ Այդ կերպ, Մոդրիչը Խորվաթիայի հավաքականում անցկացրած խաղերի քանակով առաջ անցավ «Շախտյորի» նախկին պաշտպան Դարիո Սռնայից՝ այս ցուցանիշով նոր ռեկորդ սահմանելով։
✅ I խումբ․ Գաճաճներն ու առյուծները
1․ Անգլիա — 9
2․ Հունգարիա — 7
3․ Ալբանիա — 6
4․ Լեհաստան — 4
5․ Անդորրա — 0
6․ Սան Մարինո — 0
Մի փոքր տարօրինակ խումբ, որտեղ ընդգրկված են այնպիսի հավաքականներ, ինչպիսիք են Անգլիան և Լեհաստանը, իսկ մյուս բևեռում ֆուտբոլային գաճաճներն են՝ Սան Մարինոն ու Անդորրան։ Իհարկե, վերջիներս հիմնականում կկատարեն 3 միավորներ բաժանողի դերը (չնայած Անդորրան կարող է և զարմացնել), իսկ Անգլիան Լեհաստանի հետ խաղում (2։1) ցույց տվեց, ով է «անտառում թագավորը»։ «Առյուծները» երեք խաղից հետո ունեն 100 տոկոսանոց արդյունք։
✅ J խումբ. Հայկական հրաշք
Հայաստանի հավաքականի հաջողությունները համարվում են այս ընտրական փուլի ամենամեծ սենսացիան։ Հայաստանի հավաքականը մեկնարկային երեք հանդիպուներն էլ ավարտել է հաղթանակով, ինչը պատմական արդյունք է մեր ընտրանու համար։ Մեր տղաների ֆանտաստիկ հաջողության մասին վերջին երկու օրվա ընթացքում բազմիցս արդեն խոսել ենք, այնպես որ այս անգամ պարզապես անդրադառնանք մեր խմբի մրցաշարային աղյուսակին։
Ամենատպավորիչ գոլն ու Զլատանի ֆանտաստիկ գոլային փոխանցումը
Այս փուլում գրանցվեցին մի քանի գեղեցիկ գոլեր, սակայն, ամենատպավորիչը հավանաբար գրանցվեց մեր խմբի խաղում։ Լիխտենշտեյնի հավաքականի հարձակվող Յանիկ Ֆրիկը 2022 թվականի աշխարհի առաջնության ընտրական փուլի Իսլանդիայի դեմ խաղում դարձավ հրաշալի գոլի հեղինակ (1: 4): 79-րդ րոպեին հարձակվողը անկյունայինից ուղիղ հարվածով գնդակն ուղարկեց իսլանդացիների դարպասը:
«Միլանի» ու Շվեդիայի հավաքականի հարձակվող Զլատան Իբրահիմովիչը կրկին անգամ ցուցադրեց իր ակրոբատիկ հմտությունները: Այս անգամ 39-ամյա ֆուտբոլիստը կրունկով գոլային փոխանցում է կատարել Լյուդվիգ Օգուստինսոնին: Աստղային հարձակվողի փոխանցումը շվեդներին օգնեց հաշվի մեջ առաջ անցնել ԱԱ-2022-ի ընտրական խաղում Կոսովոյի դեմ խաղում (3-0):
Վար Բաբայան
