Մարտի 27-ին Երևանում կանցկացվի Mix fight 46 միջազգային մեծ մրցաշար՝ նվիրված Արցախյան պատերազմում զոհված հերոս հայորդիների հիշատակին:
Երեկոյի ընթացքում նախատեսված է 13 մենամարտ, որից 6-ը կանցկացվի MMA-ի, իսկ 7-ը К1-ի կանոններով: Մրցաշարին կմասնակցեն մարզիկներ Իսպանիայից, Վրաստանից, Մարոկկոյից, Պարսկաստանից, Բելառուսից և Ռուսաստանից:
«Հայաստանում 4-րդ անգամ է անցկացվելու: Վերջին անգամ 2019 թվականին է եղել և մեծ հետաքրքրություն կար մարզասերների շրջանում: Այս մրցաշարը պետք է անցկացնեինք 2020 թվականին, բայց կարանտինի պատճառով հետաձգվեց: Այս տարի սկսում ենք նոր ուժով ու նոր թափով»,-ArmSport-ի հետ զրույցում պատմում է Mix Fight-ի Հայաստանի ներկայացուցիչ Արման Սահակյանը, ով այդ երեկոյի ընթացքում կանցկացնի MMA-ում իր երկրորդ մենամարտը:
«Մասնակցելու են շատ բարձրակարգ մարզիկներ Վրաստանից, Պարսկաստանից, Մարոկկոյից: Լինելու են շատ լուրջ մենամարտեր: Օրվա գլխավոր մի քանի մարտ է լինելու: Եվրոպայի մասշտաբով բոլոր ուժեղագույն մարզիկներն էլ ցանկանում են մասնակցել, քանի որ ուժեղ մրցաշար է: Երեկոյի ընթացքում Հայաստանը ներկայացնելու է 11 մարզիկ , այդ թվում Նաիրի Մելիքյանը, ով շուտով պայամնագիր է կնքելու UFC-ի հետ: Ռինգ է դուրս գալու նաև մեր ուժեղագույն մարզիկներից Ալբերտ Ամիրջանյանը»,- տեղեկացնում է Արման Սահակյանը:
Վերջինս երեկոյի ընթացքում կմենամարտի Իրանի ուժեղագույն մարզիկներից Ռոհալ Ջամշադի հետ: Նախապես ծրագրված էր, որ Սահակյանը մենամարտելու է վրացի Սոսլան Գասիևի հետ, սակայն վերջինս օրեր առաջ հրաժարվել էր մասնակցել մրցաշարին:
«Մարզավիճակս գնահատում եմ լավ: Վերջին շրջանում մարզվել եմ մեծ ծանրաբեռնվածությամբ: Առիթից օգտվելով ցանկանում եմ շնորհակալություն հայտնել բռնցքամարտի հավաքականի մարզիչ Ռաֆայել Մեհրաբյանին, մարզիչներ Արտյոմ Սիմոնյանին, Ռոբերտ Պետրոսյանին, «Դոջո Պետրոսյան» ակումբին և բոլոր նրանց, ովքեր այս օրերին աջակցել են, որպեսզի լավագույնս պատրաստվեմ առաջիկա մենամարտին»,-ասում է Արման Սահակյանը:
MMA-ում իր առաջին մարտը Սահակյանն անցկացրել է 2019-ի նոյեմբերի 10-ին, որտեղ արդեն 8-րդ վայրկյանում նոկաուտի էր ենթարկել մրցակցին:
«Ես 5 տարեկանից զբաղվել եմ ձյուդոյով, այնուհետև բռնցքամարտով և քիք բռնցքամարտով, որում նաև դարձել եմ աշխարհի չեմպիոն: Տարբեր մրցաշարեր եմ հաղթել: 2010-ից К1-ի պրոֆեսիոնալ մենամարտեր եմ անցկացրել ու միայն հաղթանակներ եմ տարել: 12 մենամարտից ունեմ 12 հաղթանակ: Այնուհետև հրավեր եմ ստացել Mix Fight-ի նախագահ Վարդան Մնացականյանի կողմից, որպեսզի մասնակցեմ MMA-ի մարտերին»,-մարզական անցած ուղին կարճ ամփոփում է մարզիկը:
Նրա խոսքով, MMA-ն գնալով մեծ հետաքրքրություն է առաջացնում նաև Հայաստանում.
«Աշխարհում MMA-ն մեծ տարածում է գտնում ու գնալով զարգանում է: Mix Fight-ի առավելությունն այն է, որ հնարավորություն է տալիս հետագայում կարիերան շարունակել UFC-ում: Ինքս էլ զղջում եմ, որ ուշ եմ սկսել կարիերաս MMA-ում՝ չնայած նրան, որ ինձ շատ երիտասարդ եմ զգում: Եթե 10 տարի առաջ նույնպես այսպես զարգացած լիներ MMA-ը, ես ավելի վաղ կսկսեի այս մարզաձևում մարտեր անցկացնել և արդեն հնարավոր է՝ գոտիներ նվաճած լինեի»,-ափսոսում է 33-ամյա մարզիկն ու հավելում. «Հիմա բոլոր նպատակներս կապված են MMA-ի հետ: Հիմա մարդիկ ավելի շատ են հետաքրքրված այս մարզաձևով ու շատ մարդիկ կան, որ ուզում են մրցաշարեր անցկացնել Հայաստանում: Եթե տարին 3-4 մենամարտ անցկացնեմ, արդեն կարող եմ շուտով գոտու համար մենամարտել: Դրա համար պետք է բարձր ռեյտինգ ունենալ»։
Երվանդ ՀԱԿՈԲՅԱՆ
