Օլիմպիական փոխչեմպիոն, աշխարհի ու Եվրոպայի չեմպիոն ծանրորդ Սիմոն Մարտիրոսյանն ընդգրկվեց 2019թ-ի Հայաստանի 10 լավագույն մարզիկների ցանկում: Հայ դյուցազունը Armsport.am-ի հետ զրույցում ամփոփեց 2019 թ-ը, խոսեց լավագույն մարզիկների տասնյակում հայտնվելու և առաջիկա ծրագրերի մասին:
- Սիմոն, նախ, խնդրում եմ խոսեք 10 լավագույն մարզիկների ընտրության մասին: Համակարծի՞ք եք ընտրության արդյունքների հետ, թե՞ կար մարզիկ, որ արժանի էր, բայց չհայտնվեց տասնյակում:
- Կարծում եմ, որ տասնյակում պետք է հայտնվեին Եվրոպայի և Աշխարհի առաջնություններում մեդալակիր դարձած մարզիկները: Եթե անկեղծ, ապա բոլորն էլ այս տարի արժանի էին տասնյակում հայտնվելու: Կարծում եմ, որ ավելի արդար կլիներ, եթե լավագույն քսանյակ լիներ:
- Եթե վերջնարդյուքնում Ռիոյի օլիմպիական խաղերում նվաճած արծաթե մեդալը փոխարինվի ոսկե մեդալով՝ հայտնի պատճառով, դա ավելի՞ կմոտիվացնի Տոկիո-2020-ում:
- Երբ ստանամ ոսկե մեդալը, ավելի հստակ կպատասխանեմ, բայց ինձ թվում է, որ այն ավելի կմոտիվացնի:
- 2019 թ-ը, խնդրում եմ, ամփոփեք:
- Տարին համարում եմ հաջողված: Ինչ նպատակ դրել էի՝ հասա, ինչ առաջադրանք ունեի՝ կատարեցի. Եվրոպայի առաջնություն՝ 3 ոսկե մեդալ, ԱԱ-ում՝ 3 ոսկե մեդալ և ռեկորդ ու Եվրոպայի Մ-23 առաջնությունում՝ 3 ոսկե մեդալ:
- Մինչ Տոկիո-2020-ը ի՞նչ պլանավորված մրցաշարեր կան:
- 2020 թ-ին՝ մինչ Օլիմպիական խաղերը, պետք է մասնակցեմ Եվրոպայի առաջնությանը և Պարսկաստանի գավաթի խաղարկությանը՝ օլիմպիական վարկանիշ ձեռք բերելու համար:
- 2020 թ-ին ի՞նչ կմաղթեք հայ ազգին:
- Մաղթում եմ, որ բոլորը սիրով լինեն իրար հետ, լինեն համերաշխ: Թող 2020թ․ լինի խաղաղության ու հաղթական տարի:
- Գիտեմ, որ հրավեր եք ստացել Վրաստանի ծանրամարտի ֆեդերացիայից՝ մասնակցելու մրցաշարի, կմանրամասնե՞ք:
- Այսօր մեկնում եմ Թբիլիսի՝ մասնակցելու Օլիմպիական եռակի չեմպիոն Կախա Կախվիաշվիլիի գավաթի խաղարկությանը: Հրավիրվածների թվում են նաև Դավիթ Հովհաննիսյանն ու Կարեն Մարգարյանը:
Արմեն Գարամյան
