ՀՖՖ-ն լրջորեն քննարկում է ընթացիկ առաջնության ձևաչափը փոխելու տարբերակը. Արթուր Սողոմոնյան

ՀՖՖ-ն լրջորեն քննարկում է հենց ընթացիկ մրցաշրջանից էլ առաջնության ձևաչափը փոխելու տարբերակը: Այս մասին ArmSport-ի հետ զրույցում հայտնել է «Փյունիկի» սեփականատեր Արթուր Սողոմոնյանը:

Ձևաչափի փոփոխման արդյունքում կանցկացվի երրորդ շրջափուլ ու առաջինից 9-րդ հորիզոնականներում գտնվող թիմերը մեկական հանդիպում կանցկացնեն միմյանց դեմ: Այս դեպքում, բնական է, մրցանակային տեղերի համար չեն պայքարի միայն 6-յակում հայտնված թիմերը:

-Առաջնության ձևաչափն ինչպե՞ս եք գնահատում:

-Այն որ այս ձևաչափը սխալ էր, արդեն հասկացել են բոլորը՝ և՛ կազմակերպիչները, և՛ թիմերը։ Ես հիմա չեմ խոսում նրա համար, քանի որ մենք վեցնյակում չենք հայտնվել։ Այս ձևաչափը պարզապես բերում է նրան, որ առաջնության որոշակի փուլում ակումբները մասնակցության իմաստը կորցնում են։ Դա դառնում է անհետաքրքիր թե՛ երկրպագուների, թե՛ մասնակիցների և թե՛ ակումբի տերերի համար։ Այսինքն կորցնում ենք գործընթացի մի մասը։ Արդեն բոլորը հասկացել են, որ դա սխալ է։ Մենք այդ մասին խոսել ենք թե՛ ակումբների, և թե ֆեդերացիայի հետ։ Ինձ թվում է, որ այստեղ նոր հեծանիվ հորինել պետք չէ։

-Իսկ ընթացիկ առաջնությունում մրցաշրջանը շարունակելու համար ի՞նչն է մոտիվացնելու՝ հաշվի առնելով այն, որ «Փյունիկը» չի հայտնվել 6-յակում ու փաստացի չի պայքարելու մրցանակային տեղերի համար:

-Որքանով՝ ես գիտեմ, այժմ լրջորեն քննարկվում է ձևաչափի վերանայման հարցը: Եթե իսկապես ձևաչափը փոխվի, ակումբին շանս կտրվի փրկել այս մրցաշրջանը ․․․

-Այսինքն արդեն այս մրցաշրջանո՞ւմ է հնարավոր, որ վերանայվի ձևաչափը։

-Այո, պանդեմիայով պայմանավորված այս իրավիճակում ՈՒԵՖԱ-ն տվել է իրավունք փոփոխելու ազգային առաջնությունների ձևաչափը։ Որքանով՝ ես գիտեմ, Գործկոմի վերջին նիստի ընթացքում դա լուրջ քննարկվել է, և անկեղծ ասեմ, իմ դիրքորոշումը այս հարցում չեզոք է եղել, որպեսզի չընկալվի վեցնյակից դուրս մնացած շահագրգիռ կողմ, բայց ինձ ուրախացնում է, որ առաջնության թիմերի մեծ մասը ձևաչափը վերանայելու գաղափարին աջակցում է՝ անկախ իրենց գրաված հորիզոնականից։ Ես չգիտեմ նոր ձևաչափ լինելու դեպքում մենք ինչ հորիզոնական կզբաղեցնենք, բայց անկախ ամեն ինչից՝ առաջնությունը կվերադարձնի իր հետաքրքությունը։

Կարծում եմ, որ այդ դեպքում մինչև վերջին տուրը կընթանա պայքար, և դրանից կշահեն բոլորը։ Եթե դա տեղի չի ունենա, մենք իհարկե ավարտին կհասցնենք մրցաշրջանը և ես կաշխատեմ ավելի շատ հնարավորություն տալ երիտասարդներին խաղալու և պատրաստվելու նոր մրցաշրջանին։

-Այսինքն կարո՞ղ ենք հետևություն անել, որ դուք հաջորդ մրցաշրջանում, գուցե, հրաժեշտ տաք շատ լեգիոներների:

-Մենք մյուս մրցաշրջանից սկսած հիմնական շեշտը դնելու ենք հենց մեր սաների վրա։ Ես կարծում եմ, որ թիմի մեծ մասը լինելու են հենց մեր տղաները։ Իհարկե, դա միգուցե մի քիչ կթուլացնի թիմը, լեգիոներներն ամեն դեպքում ուժեղացնում էին այն, բայց մյուս կողմից կան շատ դրական բաղկացուցիչներ․ մեր երիտասարդները կսկսեն խաղալ։ Երբ դու վստահում ես, միայն այդ ժամանակ կարող ես հասկանալ, որքանով է նա պատրաստ լուրջ ճանապարհ անցնելու։

-Իսկ Ձեր կարծիքով այս տարի «Փյունիկին» ինչո՞ւ չհաջողվեց վեցնյակում հայտնվել։ Թիմը չհասցրե՞ց ուշքի գալ եվրագավաթային խաղերից հետո, թե՞ այլ խնդիր կար։ Դուք ի՞նչ բացատրություն ունեք։

-Լավ հարց է։ Գիտեք որպեսզի կարողանաս առաջ գնալ, միշտ պետք է վերլուծես՝ որտեղ և ինչու սխալվեցիր։ Առաջին հերթին հասկանալ, հետո ունենալ ցանկություն փոխելու իրավիճակը։ Իմ կարծիքով, որպես ակումբի ղեկավար, Դուք ճիշտ նկատեցիք, մեր տղաները Եվրագավաթների էմոցիոնալ ժայթքումից ուշքի չեկան։ Այո, երբեմն նաև շատ դրական էմոցիաներն էլ կարող են բացասական դեր խաղալ։ Նախ շատ մեծ ծանրաբեռնվածություն կար իսկապես՝ մարզումներ, խաղեր, նաև մեծ հոգեբանական ծանրաբեռնվածություն, և ես կարծում եմ, որ հենց դրա հետ էր կապված, որ Եվրագավաթներից հետո թիմը չկարողացավ հավաքվել, կենտրոնանալ և լավ հանդես գալ արդեն ներքին առաջնությունում։

Այստեղ կա հենց այդ ճիշտ սպորտային դաստիարակության հարցը։ Երբ ես խոսում էի Բերեզովսկու հետ, մարզումներից հետո նրա դիտարկմամբ լեգիոներները հոգեբանորեն ավելի կայուն էին, քան մեր սաները, որոնք ավելի էմոցիոնալ են, և ինչ-որ իրավիճակի պատճառով հետագա 1-2 օրը ուշքի չեն գալիս և ցույց չեն տալիս այն որակի ֆուտբոլ, որ կարողանում են խաղալ։ Այսինքն հոգեբանական կայունությունը դեռ շատ փոքրուց պետք է կոփվեր, այս տարքիում արդեն ուշացած է։

-Կարանտինից հետո մենք դիմել ենք բոլոր ակումբներին, և հարցրել թե ինչ խնդիրների են բախվել: Պատասխանը եղավ այն, որ ոչ մի խնդիր էլ չունեն, բայց ամենայն հավանականությամբ ադմինիստրատիվ հատվածը չէր հաշվարկել, որ սեփականտերերի բիզնեսների վատթարացումը կանդրադառնա նաև ակումբի վրա։ Ձեր գնահատմամբ ի՞նչ խնդիրների կբախվի հայկական ֆուտբոլը և ի՞նչ լուծում եք տեսնում։

-Ինձ համար դժվար է խոսել ամբողջ հայկական ֆուտբոլի մասին, բայց կարող եմ ասել իմ և այն ակումբների մասով, որոնց հետ շփվում եմ։ Միանգամայն ճիշտ եք, դժվար է լինելու։ Այսօրվա դրությամբ հայկական ֆուտբոլն ապրում է միայն հանգանակություններով։ Բայց այսօր, երբ բիզնեսին դժվար է, և այն ոչ միայն գումար չի աշխատում, այլև աջակցություն է պահանջում, որն էլ ոչ մի տեղից չես կարողանում վերցնել, ապա ֆուտբոլն այս առումով առաջնահերթությունների ցանկից հետ է մղվում։ Կարծում եմ, որ ներդրումները ֆուտբոլում կնվազեն, գիտեմ, որ որոշ ակումբներ շատ լուրջ խնդիրների են բախվել այս ընթացքում։ Կարծում եմ, որ կնվազեն նաև խաղացողների աշխատավարձերը, չի բացառվում, որ նաև կիջնի ֆուտբոլի մակարդակը, չնայած մեծ հույսեր ունեմ, որ գոնե դա տեղի չի ունենա, քանի որ դա ավելի շատ կախված է ոչ թե աշխատավարձից, այլ սպորտային խառնվածքից և մրցակցությունից։

Կնվազեն լեգիոներները, և եթե բաց խոսենք, ապա պարզ է, որ որքան նվազեն լեգիոներները, այնքան ավելի շատ շանսեր կունենան տեղացի ֆուտբոլիստները։ Դե ցանկացած իրավիճակում կարելի է գտնել և՛ դրականը, և՛ բացասականը։ Ես փորձում եմ ստեղծված իրավիճակին հենց այդ դրական շեշտադրումով նայել։

-Իսկ ֆեդերացիայի դերը որն եք տեսնում։ Կարո՞ղ է ինչ-որ բան փոխել, ազդել բացասականան զարգացումների վրա, թե՞ ֆեդերացիան չունի այդ գործիքակազմը:

-Հիմա լուրջ քննարկումներ են ընթանում ֆեդերացիայի և ակումբների միջև։ Ես ինքս էլ խոսել եմ ֆեդերացիայի նախագահի հետ՝ պրոֆեսիոնալ լիգա ստեղծելու գաղափարի շուրջ։ Մեր առաջնության կազմակերպմամբ պետք է զբաղվի պրոֆեսիոնալ լիգան:

-Այսիքն Դուք աջակցո՞ւմ եք այդ գաղափարը:

-Ես այդ գաղափարն աջակցում եմ, պարզապես այստեղ պետք է աջակցություն հայտնեն նաև մյուսները։ Ես կարծում եմ, որ մենք վաղ թե ուշ կգանք դրան։