«Ներկայումս ՀՖՖ-ի իշխանությունը զավթած մի քանի հոգի հակաֆուտբոլային քայլեր են անում: Ես չեմ ուզում մտածել, որ դա ուղղորդված է»,-այս մասին լրագրողների հետ հանդիպման ընթացքում ասաց Երևանի «Լոկոմոտիվի» սեփականատեր և նախագահ Հրաչ Քանանյանը:
Հիշեցնենք, որ Հուլիսի 3-ին կայացած ՀՖՖ գործադիր կոմիտեի արտահերթ նիստում որոշում ընդունվեց դադարեցնել Առաջին խմբի առաջնությունը, որակզրկված ակումբների թվում էր նաև Երևանի «Լոկոմոտիվը»: Ակումբից 14 անձի տարբեր ժամկետներով արգելվել է զբաղվել ֆուտբոլային գործունեությամբ: Ցմահ որակազրկվել է ակումբի նախագահ Հրաչ Քանանյանը:
«ՀՖՖ-ն հիմա գտնվում է վերակենդանացման բաժանմունքում: Ֆեդերացիան տարանջատվել է հայկական ֆուտբոլից և գործում է առանձին միավոր՝ զբաղվելով դրսից ստացվող ֆինանսների կառավարմամբ և դրա անհամաչափ՝ լոգիկայից դուրս վերաբաշխումով: ՀՖՖ ղեկավարությունը աթոռապաշտության մոլուցքից մղված անհամաչափ քայլեր է անում և իր գործառույթներից դուրս գործողություններ: Ցանկանում եմ նշել, որ հիմնական շեշտարդումը դրվել է որոշ ակումբների վերաբերյալ՝ ՈւԵՖԱ-ից ստացած զեկուցագրերի հիման վրա, այդ ակումբներին մեղադրելով պայմանավոված խաղերի համար: Մեր ակումբը 2018-ից վերսկսեց իր մասնակցությունը Առաջին խմբում, և տարվա երկրորդ կեսին փոխեց իր քաղաքականությունը՝ իր առջև դնելով ավելի բարձր խնդիրներ, և այդ խնդիրները լուծելու համար հրավիրեց լեգիոներ ֆուտբոլիստներ, որպեսզի կարողանանք մեր ծրագիրը կատարել: Մենք ընտրեցինք ուկրաինական ֆուտբոլը: Դուք գիտեք, որ ուկրաինական ֆուտբոլը ԽՍՀՄ-ում եղել է առաջատար դիրքերում: Ինչպես ժամանակը ցույց տվեց, մենք ճիշտ որոշում ենք կայացրել՝ միացնելով հայկական ֆուտբոլն ուկրաինականի հետ: Մենք խաղացել ենք 27 խաղ, որից 22-ը հաղթել ենք ու գլխավորում ենք Առաջին խմբի աղյուսակը»ՙ-ասաց Հրաչ Քանանյանը:
Ակումբի գործադիր տնօրեն Արմեն Քանանյանի խոսքով ՀՖՖ-ի որոշումները անօրինական են և ոչ լեգիտիմ:
«Ժամանակի սղության պատճառով չեմ կարող իրավիճակը ներկայացնել այնպես, ինչպես կցանկանայի՝ մանրամասն ինֆորմացիաներով: Կփորձեմ անդրադառնալ հիմնական կետերին, որոնցով կապացուցեմ ՀՖՖ-ի կողմից կայացրած որոշումների անօրինակություններին, ոչ լեգիտիմ լինելուն և կանխամտածված ուղղորդված լինելուն՝ մեր ակումբի նկատմամբ: Այդ ամբողջ պրոցեսում ես օգտագործում եմ այն նյութերը, որոնք ՀՖՖ-ն է տրամադրել մեզ: Ի դեպ, դրանք տրամադրելու համար նրանք մեզանից պահանջել են 100 հազար դրամ, որը մենք վճարել ենք: Դա աննախադեպ, բացառիկ անօրինական քայլ է, քանի որ մեղադրող կողմին որոշումները կայացնելուց հետո ոչ մի դեպքում հիմքերը չեն տրամադրվում գումարի դիմաց: Այս գործընթացը սկսելուց նրանք վկայակոչեցին Վարչապետ Նիկոլ Փաշինյանի ուղերձը, ով ՀՖՖ նախագահ Արմեն Մելիքբեկյանի հետ հանդիպման ընթացքում նշել էր, որ կոռուպցիան պետք է արմատախիլ արվի սպորտից ու հայկական ֆուտբոլից: Մենք դրանից շատ էինք ուրախացել, որ վերջապես Հայաստանում լինելու է արդար մրցակություն: Ինչպես գիտեք, տարիներ շարունակ ֆուտբոլային հանրությունը մեծ կասկածի տակ է դրել մրցավարական բլոկը՝ այնտեղ տեսնելով բազմաթիվ վիճահարույց դրվագներ, որոնք հնարավոր է ուղղորդված են եղել կոռուպցիոն ռիսկերով: Իրենց անօրինականություններին վստահություն և հավաստիություն փոխանցելու համար, իրենց տակտիկան շարունակելով՝ նրանք փորձեցին թաքնվել ԱԱԾ-ի, ինչպես նաև ՈւԵՖԱ-ի հետևում: ՀՖՖ նախագահ Արմեն Մելիքբեկյանը, փոխնախագահ Արմեն Նիկողոսյանը և գլխավոր քարտուղար Արթուր Ազարյանը նշում են, որ ԱԱԾ-ից ունեն բազմաթիվ տեղեկություններ, բայց նրանց բոլոր հիմնավորումների մեջ չկա մեկ նախադասություն, որը վկայակոչում է ԱԱԾ-ի կողմից որևէ մեկ գործողություն: Իրենք մեզ հայտնեցին, որ բոլոր փաստաթղթերը կհանձնեն մեզ: Ի դեպ, տրամադրել են անգլերեն լեզվով, որը նույնպես օրենքի խախտում է: Դրանից մեկ օր առաջ մեր մարզիչը հարցում էր կատարել ռուսերեն լեզվով, և նրանք պատասխանել էին, որ ՀՀ-ում պետական լեզուն հայերենն է և պետք է շփվենք հայերենով»:
Ակումբի գործադիր տնօրենը լրագրողներին ներկայացրեց զեկույցները, որոնք կազմված էին 16 էջից: Զեկույցներում նշված էին այդ խաղերին մասնակցած ֆուտբոլիստների անուն-ազգանունները, հանդիպումների հաշիվները և խաղերի վիճակագարությունները, ինչպես նաև մեթոդաբանութունը, թե ինչպես է ՈւԵՖԱ-ն այդ հետաքննությունը կատարում:
«Արթուր Ազարյանը նշել էր, որ յուրաքանչյուր խաղի վերաբերյալ մոտ 40 էջանոց զեկույց կա: Դա սուտ է: Մեր ակումբը մեղադրվում է 7 խաղի մեջ, որից մեզ տրամադրել են 5 զեկույց: Երկու խաղի մասին ոչ մի բան չկա: Մենք մանրակրկիտ ուսումնասիրել ենք այս թղթերը: Երկու խաղերի մասին ինֆորմացիա չկա, քանի որ ՈւԵՖԱ-ն որպես կասկածելի կողմ գրել է ոչ թե մեր անունը, այլ Բարձրագույն խմբի երկու դուստր թիմերի անունները: Հետաքրքրիրն այն է, որ այդ ակումբների հետ կապված ոչ մի վարույթ սկսված չէ: Խաղերից մեկի վերաբերյալ գրված է, որ պարզ չի, թե որ կողմը կարող էր անել այդ մանիպուլյացիաները, բայց հավանական է, որ դա արել է ոչ թե «Լոկոմոտիվը», այլ դիմացի թիմը: Մյուս խաղի վերաբերյալ էլ գրված է, որ կասկածներ կան, բայց անհնար է որոշել, թե երկու կողմից որը կարող էր դա լինել: Այսինքն արդեն 7-ից 4 խաղ ՈւԵՖԱ-ն չի կասկածում մեզ, իսկ իրենք այնքան են չարացել մեր հանդեպ. որ չեն տեսել, որ այդտեղ «Լոկոմոտիվ» անունը գրված չէ: Քանի որ այս պահին գործը բողոքարկման կոմիտեում է, չեմ ցանկանում շատ փակագծեր բացել, բայց հետո կրկին ասուլիս ենք անելու և շատ փակագծեր ենք բացելու»:
Քանանյանը նշեց, որ Լոզանի արբիտրաժային դատարան դիմելու համար ֆեդերացիան տվել է 10 օր ժամանակ, որը ավելի է դժվարացնում գործընթացը:
«Ամենահետաքրքիրը բողոքարկման պրոցեսն է եղել: Առաջին խմբի ակումբներից քանիսը բողոքարկում են որոշումը: Բողոքարկման կոմիտեն գրում է՝ այս որոշումը ենթակա է բողոքարկման Շվեյցարիայի արբիտրաժային դատարանում՝ 10-օրյա ժամկետում: Եթե այդ ակումբները փորձեն սպորտային փաստաբաններ գտնել, փաստաբանը ծանոթանա այդ նյութերին, դա կարող է տևել միայն 10 օր: Այնպիսի կետեր են դնում, որ չկարողանաս ոչինչ անել: Շատ լավ իմանալով, որ սա պետք է CAS-ում բողոքարկվի, որը որ արժի մոտ 30 հազար դոլար, մտածում են, որ ոչ մի ակումբ չի գնա այդ քայլին: Ինչ վերաբերում է Գործադիր կոմիտեին, ինձ ներսից ինֆորմացիա է հասել, որ թղթերը բերել դրել են նրանց դիմաց, ասել են դուք քվեարկեք: Կասկածում եմ, որ Գործադիր կոմիտեից բոլորը փայլուն տիրապետում են անգլերենին և կարողացել են լրիվ ծանոթանալ նյութերին»:
Հարցին, թե ինչո՞վ եք վստահ, որ ֆուտբոլիստները ղեկավարության մեջքի հետևից չեն ներգրավվել պայմանավորված խաղերի մեջ, Արմեն Քանանյանն ասաց.
«Վստահ եմ իրենց վրա 99 տոկոսով, քանի որ ես չեմ կարող իրենց հետևել 24 ժամ, բայց իմ վստահությունը դարձավ 100 տոկոս, երբ ծանոթացանք ֆեդերացիայի կողմից տրամադրված նյութերին։ Իրենք պարտվելու են. ժամանակի հարց է: Մենք հաղթելու ենք և վստահ ենք մեր անմեղության վրա: Վստահ ենք, որ ոչ մի բան չենք արել ու բոլոր հաղթանակները տարել ենք միայն արդար ճանապարհով»:
Ակումբի նախագահ Հրաչ Քանանյանի խոսքով ամբողջ մրցաշրջանի ընթացքում մրցավարները խոչընդոտ են հանդիսացել իրենց թիմի համար:
«Մեր դեմ ամբողջ խաղաշրջանի ընթացքում նկատելի էր մրցավարների խոչընդոտները, որոնք նրանք կատարում էին: ՀՖՖ-ն ունի սիրելի և ոչ սիրելի թիմեր, և նրանց սիրելի թիմերից մեկին փորձում էին անընդհատ առաջ տանել, որ հասցնեն Բարձրագույն խումբ: Առաջին խմբում ինքնահոս է եղել: Հաղթողին չի տրվում ոչ մի պարգևավճար, չի որոշվում լավագույն մարզիչ, ռմբարկու: 2 տարվա մեջ ՀՖՖ-ից ոչ մի օգնություն կամ առաջարկություն չենք ստացել: ՀՖՖ նախկին ղեկավարությունը Արմավիրում հիմնեց ֆուտբոլի ակադեմիա: Եկեք գնանք տեսնենք՝ ինչ է կատարվում այնտեղ: Դաշտում մոլախոտ է աճում: Մենք առաջարկել ենք, որ Արմավիրի մարզադաշտը երկարաժամկետ տան մեզ, մենք մեր միջոցներով կառուցենք, բազա ստեղծենք և դրանով ֆուտբոլային կյանքն այդ քաղաքում կակտիվանա: Իսկ հիմա այդ կառույցը երկու տարի է անտերության է մատնված: Մենք Արմավիր քաղաքի կյանքը կակտիվացնեինք, եթե այդ մարզադաշտը մեզ տրամադրեին: Իմ առաջարկին ասացին, որ եվրոպական ակումբներից մեկն այդտեղ մեծ ծրագիր ունի: Երկու տարի է անցել, բայց ոչ մի ծրագիր էլ չկա»:
Երևանյան ակումբի ղեկավարությունը սպասում է բողոքարկման կոմիտեի որոշմանը և գնալու է մինչև վերջ:
«Մենք հիմա խնդրում ենք բողոքարկման կոմիտեին, որ հնարավորություն տան, մեր ակումբից ներկայացուցիչ լինի քննարկման ժամանակ: Մենք գնալու ենք մինչև վերջ և հաղթելու ենք: Արդարությունը վերականգնվելու է»,-ասաց ակումբի գործադիր տնօրեն Արմեն Քանանյանը:
