Այս տարի հայկական ֆուտբոլում տեղի ունեցավ աննախադեպ իրադարձություն: Պայմանավորված խաղերի պատճառով ՀՖՖ-ն դադարեցրեց Առաջին խմբի առաջնությունը: Հայաստանում նշանակությամբ 2-րդ լիգայում պայմանավորված հանդիպումների կամ խայտառակ միջադեպերի մասին խոսվում էր դեռևս մրցաշրջանի սկզբից: Ի վերջո, առաջնության ավարտից 4 տուր առաջ ՀՖՖ-ն որոշում ընդունեց դադարեցնել առաջնությունը՝ որակազրկելով 58 անձի, որոնցից 45-ին՝ ցմահ:
2015 թվականին կրկին նմանատիպ դեպք տեղի ունեցավ հայկական ֆուտբոլում:
Երևանի «Ուլիսի» գլխավոր մարզիչ Գագիկ Սիմոնյանը, նրա օգնական Ռոբերտ Հարությունյանը, թիմի պաշտպան Հայկ Հունանյանը, ինչպես նաեւ «Ուլիս-2»-ի ադմինիստրատոր Արա Ազարյանը ձերբակալվեցին պայմանավորված խաղեր կազմակերպելու մեղադրանքով:
Գագիկ Սիմոնյանի համար որպես խափանման միջոց ընտրվեց կալանքը: 6 ամիս անազատության մեջ մնալուց հետո դատական գործընթացը շարունակվեց շուրջ 4 տարի: Ի վերջո, 2019-ին Գագիկ Սիմոնյանն արդարացվեց և օրեր անց աշխատանքի անցավ Երևանի «Արարատում»:
Սիմոնյանի խոսքով, ինքն այդպես էլ չհասկացավ, թե ինչի համար 6 ամիս մնաց ճաղերի ետևում.
«Բռնեցին և անիմաստ ձերբակալեցին ինձ: Ոչ ֆեդերացիան ինձ լսեց, ոչ էլ ԱԱԾ-ն, ուղղակի պետք էր, որ մի հոգու վրա մնար այս ամենը: ՈւԵՖԱ-ից եկած թուղթը ֆեդերացիայում է, որտեղ գրված է եղել, թե իբրև երկուսուկես միլոնի խաղադրույք եմ կատարել, որպեսզի 12 միլիոն շահույթ ստանամ՝ կապված երկրորդ թիմի հետ: Երկու ամիս ես չեմ մոտեցել երկրորդ թիմին, քանի որ առաջին թիմի գլխավոր մարզիչն էի: Առաջին խմբի թիմի մարզիչը Արտյոմ Ադամյանն էր, և փաստորեն այլ մարդկանց գլխավորությամբ, այսինքն՝ Ադամյանին օտագործելով արել են այս ամենը: Ինչպես լսել ենք ամբողջ ձայնագրությունները, նրա անունը ամեն տեղ շոշափվում է, բայց նրան ոչ մի անգամ չեն կանչել ԱԱԾ:
Ես Վանեցյանին ասել եմ, որ եթե ինձ վրա մի բան գտնեք, պատրաստ եմ կրել պատասխանատվություն: Ես խնդրեցի Նիկողոսյան Արմենին, որ ցույց տա ՈւԵՖԱ-ից եկած թուղթը: Ինձ ասացին, որ դա արխիվում է և չեն կարող հանել»,-ասում է Սիմոնյանը:
Մարզչի խոսքով նույն իրավիճակն էլ հիմա կատարվում է Առաջին խմբում.
«Ես չգիտեմ՝ ովքեր կապ ունեն, թե չունեն, բայց որակազրկում են մարդկանց, ովքեր կապ չունեն և հակառակը: Ես գիտեմ, որ ակումբներ կան, որ ռեալ զբաղվել են խաղուծախով, բայց ֆեդերացիայի կողմից որակազրկած չեն: Ես բազմիցս եմ բարձրաձայնել, որ պետք է մաքրել հայկական ֆուտբոլը, քանի որ դա ոչ մեկի սեփականությունը չէ և մերն է: Ֆեդերացիան մեզ հետ պետք է պարզ լինի և ոչինչ չթաքցնի: Ինչ վերաբերում է առաջնությունը դադարեցնելուն, ֆեդերացիան վաղուց գիտեր, թե ինչ է կատարվում Առաջին խմբում, ուղղակի վերջին շրջանում քննադատություններն ավելի շատացան, դրա համար ստիպված դադարեցրեցին առաջնությունը: Ավելի լավ էր ժամանակին կանխեին, որ հիմա ստիպված չլինեին գնալ նման քայլերի:
Օրինակ, «Լոկոմոտիվի» ղեկավարությունը կոնկրետ փաստերով ապացուցում է իրենց անմեղությունը: Ես չեմ ասում՝ նրանք կան այդ ամենի մեջ, թե ոչ, բայց մարդիկ ապացուցում են: Ֆեդերացիան ինչու՞ հակափաստարկներ չի բերում, այդ մարդկանց ասի սխալ եք, կամ ասի սխալվել ենք ձեր հանդեպ: Չէ՞ որ, կներես ասելն էլ է տղամարդկություն»:
Անդրադառնալով «Ուլիսում» աշխատած ժամանակահատվածում կատարված իրադարձություններին՝ Սիմոնյանը վստահեցնում է, որ ամեն ինչ պատվիրված է եղել.
«Պատվիրված էր այս ամենը, չգիտեմ՝ ում կողմից, բայց ուզում էին ես պատասխանատվութուն կրեի: ՈւԵՖԱ-ին պետք է պատասխան տային, թե ինչ է կատարվում, այդ պատճառով ես տուժեցի: Ֆեդերացիայի հետ պայմանավորվեցինք, եթե գործը կարճվի, հետ տան իմ լիցենզիան: Ոչ մի փոխհատուցում չեմ պահանջել, միայն ցանկացել եմ լիցենզիաս վերադարձնեն: Ասացին, որ պետք է արդարանաս, որպեսզի լիցենզիան վերադարձնենք: Ընդհանրապես ինձ կպնելու ոչինչ չկար: Մի խոսքով, նախորդ տարի մայիսի 24-ին ինձ արդարացրեցին, ֆեդերացիայից վերցրեցի լիցենզիան: Այս ընթացքում ես չեմ իմացել, թե ինչի համար են ձերբակալել և, ընդհանրապես, ես ինչ եմ արել: Գործն արդեն կարճվել է, և ֆեդերացիան պետք է գիտակցի, որ անիմաստ տեղն իրենց կառույցը մարդու գլխին սարքել է»:
Արդարացվելուց և լիցենզիան հետ ստանալուց հետո նախորդ տարվա հունիսին Սիմոնյանը Վալերի Հովհաննիսյանի հրավերով համալրեց Երևանի «Արարատի» մարզչական շտաբը:
««Արարատից» դուրս եկա շուրջ մեկ ամիս առաջ, երբ թիմից հեռացավ Վալերի Հովհաննիսյանը: Նոր հավաքված թիմ էր, իրար հետ խաղացած չէին: Մենք կարողացանք սարքել թիմ և լավ ելույթ ունենալ: Հետո մեր ծրագրերի մեջ կար, որ դեկտեմբերին նորից սելեկցիա պետք է անենք և բաց տեղերը լրացնենք, որպեսզի պայքարենք չեմպիոնության համար: Դա Հովհաննիսյանը նախապես պայմանավորվել էր ղեկավարների հետ: Մենք պայքարում էինք չեմպիոնության համար, բայց մեր ակումբի ղեկավարները կորան 2-3 ամսով: Թիմը երկու անգամ հավաքի է գնում Սոչի, ծերերի հետ մնում նույն տեղում: Ճաշարան մտնելուց նույնիսկ մարդ քիթը փակում էր: Բոլորիս վիզաները պատրաստ, արդեն պայմանավորվել էինք, որ Կիպրոսում ընկերական խաղեր պետք է անցկացնենք, մարդիկ քնից արթնանում են և ասում՝ ի՞նչ Կիպրոս, մնացեք Երևանում:
Հրաչ Յագան (խմբ.-գործկոմի անդամ, նախկին ֆուտբոլիստ) անունով մարդ կա ֆեդերացիայում, ես իրեն չեմ էլ ճանաչում, անմիջական շփում ունի Վարդան Սրմաքեշի հետ և այս ամենը հենց իր ձեռքով է կատարվում: Նա ոչ ֆուտբոլային մարդ է: Կարելի է ասել՝ Վարդան Սրմաքեշի աջ ձեռքն է: Հրաչ Յագանը կարծեմ ակումբի մենեջեր է եղել, և թիմը միշտ վերջին տեղում է եղել։ Առաջին հերթին այսպիսի մարդկանց պետք է հանել ֆուտբոլից, ովքեր որ անձնական շահը ավելի են գերադասում: Խոսքս ակումբի ղեկավարության և մյուս խանգարողների մասին է: Նրանց առաջին օրվանից էլ ասել եմ, որ ֆուտբոլիստները առանձին տեղ պետք է մնան: Ֆուտբոլիստները պետք է տուգանվեն կարգապահական խախտումների դեպքում, բայց մեր թիմում ով ինչ ուզում՝ անում էր, երբ ուզեր գնար Մոսկվա, գնում էր, երբ ուզում մարզվում էին և այլն: Այս ամենի միակ մեղավորը «Արարատի» ղեկավարությունն էր: Ի՞նչ է նշանակում՝ «ժամանակին փողերը տալիս ենք, հերիք չի՞»: Այսինքն, եթե ժամանակին փող եք տալիս, դա հերի՞ք է: Անկախ նրանից ես աշխատում եմ «Արարատում», թե ոչ՝ կուզեմ որ թիմը մեծ հաջողությունների հասնի»,-ասաց Սիմոնյանը:
Սիմոնյանի խոսքով հայկական ֆուտբոլում խնդիրներն այսօր շատ են, բայց ամենամտահոգիչը մանկապատանեկան ֆուտբոլն է․
«Առաջնության ամեն խաղում պիտի գոնե 5 հայ ֆուտբոլիստ լինի, բայց այսօր թիմերը չեն կարող դա անել, քանի որ չունենք այդ որակը: Մանկապատանեկան ֆուտբոլում բոլոր մարզիչները պետք է վերապատրաստվեն: Մարդիկ ՊՐՈ արտոնագիր են ստանում, բայց ֆուտբոլի մեջ չեն եղել, նոր Մոուրինյոնե՞ր ենք ուզում աճեցնել: Իմ ամենամեծ նպատակն այն է, որ զարգանա մանկապատանեկան ֆուտբոլը: Այսինքն 6-9 տարեկան ֆուտբոլիստները սովորեն ֆուտբոլի այբուբենը, և դրա վրա կառուցվի նրանց աճը: Ինքը չի կարող ուժեղ ֆուտբոլիստ դառնա, ինչքան էլ տաղանդավոր լինի, եթե չլինի հիմքը»:
Երվանդ ՀԱԿՈԲՅԱՆ
