Արդյո՞ք գավաթի եզրափակչում հաղթանակը հակառակ էֆեկտը կունենա Նոայի համար. Առաջնության վերջին տուրին ընդառաջ

Ֆուտբոլի Հայաստանի աննախադեպ, արկածախնդիր, կյանքով ու եռանդով լի, դիտարժան և մեգապայքարային առաջնությունն ավարտվում է:

Արդեն հայտնի են եվրագավաթային ուղեգրեր նվաճած ակումբների անունները՝ «Շիրակ», «Ալաշկերտ», «Նոա», «Արարատ-Արմենիա»: Մնացել է գլխավոր հարցը. ո՞վ է դառնալու չեմպիոնն ու Հայաստանը ներկայացնելու Չեմպիոնների լիգայի խաղարկությունում:

Վերջին տուրում 3-ի փոխարեն կայանալու է 2 հանդիպում: «Լոռիում» կան կորոնավիրուսով վարակվածներ և ՀՖՖ-ն չեղարկել է վերջին տուրի «Լոռի»-«Արարատ» հանդիպումը, որը, մեղմ ասած, ոչ մի մրցաշարային հարց չէր լուծելու:

«Շիրակ»-«Ալաշկերտ». Գյումրու քաղաքային ստադիոն, 14.07.2020, 17:30

Երկրորդ խաղը կայանալու է «Գյումրիում», որտեղ տեղի «Շիրակը» ընդունելու է «Ալաշկերտին»: Գյումրիի թիմն այս պահին երրորդ տեղում է և 2 միավորով գերազանցում է «Ալաշկերտին»: Երրորդ տեղ բարձրանալու համար Եղիշե Մելիքյանի թիմին հաղթանակ է անհրաժեշտ, իսկ եթե Բիչախչյանի թիմը հաղթի, «Նոան» էլ զուգահեռաբար պարտվի, «Շիրակը» կդառնա արծաթե մեդալակիր: Շիրակը», հնարավոր է, հոգեբանական խնդիր ունենա՝ վերջին տուրում սկանդալային խաղում «Նոայից» կրած ջախջախիչ պարտությունից հետո: Փաստացի, այդ պարտությունը «Շիրակին» զրկեց առաջատարությունից ու չեմպիոնության համար պայքարելու հնարավորությունից: Խաղը որակազրկման պատճառով բաց կթողնեն Ժիրայր Մարգարյանն ու Հրայր Մկոյանը: «Ալաշկերտը» վերելք է ապրում: Նորանշանակ գլխավոր մարզչի գլխավորությամբ նախկին գավաթակրի խաղում աճ է նկատվում: Վերջին խաղում էլ «Ալաշկերտը» 5-1 հաշվով կամային հաղթանակի հասավ «Լոռիի» նկատմամբ: Թիմերն ընթացիկ առաջնությունում հանդիպել են 3 անգամ: 2 անգամ հաղթել է «Շիրակը»՝ Երևանում, մեկ անգամ «Ալաշկերտը»՝ Գյումրիում: Հաշվի առնելով նշված հանգամանքները՝ խաղում ֆավորիտ կարելի է համարել «Ալաշկերտին»:

Հ. Գ. Ինչպես գիտենք, երեկ Գյումրիում հորդառատ անձրև և կարկուտ էր տեղացել, փլուզվել էր քաղաքային ստադիոնի տրիբունայի կողքին առկա թմբի մի հատվածը, սակայն այսօր ակումբը պաշտոնական ինֆորմացիա տարածեց, որ խաղադաշտը, այնուամենայնիվ, պատրաստ կլինի խաղին:

«Արարատ-Արմենիա»-«Նոա». ՀՖՖ Տ/Կ, 14.07.20200, 17:30

Տուրի և առաջնության զարդը «Արարատ-Արմենիա»-«Նոա» հանդիպումն է: Հենց այս խաղում է որոշվելու գործող չեմպիոնի հարցը: Խաղը կարելի էր «Ոսկե» անվանել, սակայն այս պարագայում ոչ-ոքին ձեռնտու է «Արարատ-Արմենիային»: Թիմերը 4 օրվա մեջ կհանդիպեն երկրորդ անգամ: Բոլորին հայտնի ֆանտաստիկ գավաթային եզրափակչում «Նոան», նախ, 1-4 հաշվով պարտվելիս կարողացավ փրկել խաղը, իսկ հետո հաղթեց 11 մետրանոց հարվածաշարում: Թիմերը մեկական լուրջ կորուստ ունեն: Գավաթային եզրափակչում Մաքսիմ Մայրովիչն է վնասվածք ստացել, իսկ վերջին տուրում «Արարատ-Արմենիայի» կազմում Յոհան Գուֆրանն էլ վնասել է ծունկը: Ընթացիկ առաջնությունում թիմերը հանդիպել են 3 անգամ. «Նոան» հաղթանակ չունի՝ 2 պարտություն, 1 ոչ-ոքի: Առաջնության վերջին 3 խաղում «Նոան» գնդակ չի ընդունել սեփական դարպասը: Չեմպիոնական խաղում թիմերի հնարավորությունները հավասար են:

Հասկանալի է, որ այս խաղում գավաթային խաղի համեմատ փոփոխություններ կլինեն: Մասնավորապես, կխաղան հիմնական դարպասապահները: Փաստ է նաև, որ Մինասյան-Պիկուշչակ դիմակայությունում հոգեբանական առավելությունը «Նոայի» մարզչի կողմն է: Մինասյանի գլխին «սև ամպեր են կուտակվում»: Եթե այս խաղում էլ պարտվի «Արարատ-Արմենիան», դժվար թե նա շարունակի գլխավորել այդ ակումբը:

Վերջին անգամ այսպիսի պայքար եղել էր 2008 թ-ին, երբ վերջին տուրում «Արարատը» հաղթեց «Փյունիկին» և հաղթողը որոշվեց «Ոսկե խաղում»: Նախորդ տարի էլ հեռակա էր պայքարը: Այս անգամ չեմպիոնը կորոշվի 90 րոպեի ընթացքում՝ միմյանց միջև խաղում:

Արմեն Գարամյան