Այսօր՝ Երևանի ժամանակով ուղիղ կեսգիշերին, կվերսկսվի Իսպանիայի Լա Լիգայի 2019/20 մրցաշրջանը, որն արդեն 3 ամիս է ինչ հայտնի պատճառներով դադարեցվել էր։
Իսպանիայի առաջնության 28-րդ տուրը կմեկնարկի անդալուսական դերբիով՝ «Սևիլիա»-«Բետիս» հանդիպումով։ Լա լիգայի 28-րդ տուրի հանդիպումները կկայանան հունիսի 11-ից 14-ը։
«Բարսելոնան» իր առաջին հանդիպումը առաջնության վերսկսումից հետո կանցկացնի հունիսի 13-ին՝ հյուրընկալվելով «Մալյորկային»։ Հանդիպումը, ինչպես այսօր կայանալիք դերբին, կմեկնարկի ուղիղ կեսգիշերին։ «Ռեալը» առաջին հանդիպումը կանցկացնի հունիսի 13-ին։ «Բլանկոսները» տանը ընդունելու են «Էյբարին»։ Խաղի մեկնարկը Երևանի ժամանակով 21։30-ին է։
Մյուս հանդիպումներից կարելի է առանձնացնել նաև հանդիպումը «Աթլետիկ Բիլբաո»- «Աթլետիկո Մադրիդ» հանդիպումը, որը տեղի կունենա հունիսի 14-ին՝ Երևանի ժամանակով 16։00-ին։
Մրցաշարային աղյուսակը մրցաշրջանի վերսկսվելուց առաջ գլխավորում է «Բարսելոնան», որն իր ակտիվում ունի 58 միավոր։ Կատալոնացիներից ընդամենը 2 միավորով ետ է մնում «Ռեալը»։ Ըստ երևույթին, այս մրցաշրջանում մենք ևս ականատես կլինենք չեմպիոնության համար երկու գրանդների դասական դիմակայությանը, իսկ 3-7-րդ տեղ զբաղեցնող թիմերը կպայքարեն լավագույն քառյակում հայտնվելու համար։ Ընդհանրապես, եվրագավաթային տեղերի համար պայքարող թեկնածուները, կարելի է ասել, արդեն իսկ ակնհայտ են, սակայն տեսականորեն այդ պայքարին կարող են միանալ նաև «Վիլյառեալը», «Գրանադան» և «Աթլետիկը»։ Բունդեսլիգայի փորձը արդեն ապացուցել է, որ առաջնության վերսկսումից հետո հնարավոր է ցանկացած անակնկալ («Շալկեի» անհաջողությունները վառ օրինակ)։
Հիշեցնենք, որ 1-4 տեղերը զբաղեցրած թիմերը հաջորդ մրցաշրջանում հանդես կգան Չեմպիոնների Լիգայում, իսկ 5-6-րդ տեղերում հանգրվանածները՝ Եվրոպա Լիգայում (գումարած երկրի գավաթակիրը՝ «Ռեալ Սոսեյդադ»-«Աթլետիկ» զույգի հաղթողը)։ Եթե, օրինակ, երկրի գավաթակիր դառնա «Ռեալ Սոսեյդադը», որն ամենայն հավանականությամբ հնարավոր է եվրագավաթային տեղ զբաղեցնի նաև առաջնության արդյունքներով, ապա Եվրոպա Լիգայի 3-րդ ուղեգիրը կստանա առաջնությունում 7-րդ տեղ զբաղեցրած թիմը։ Այնպես որ թիմերը կփորձեն պայքարել նաև այդ բաղձալի 7-րդ տեղի համար՝ իհարկե, առաջնությունում և գավաթային խաղում «Ռեալ Սոսեյդադի» հաջողությունների դեպքում։
Ինչ վերաբերվում է առաջնության անհաջողակներին, ապա այստեղ ևս ամեն ինչ պարզ չէ։ Առաջնության հետնապահ «Էսպանյոլը», որն անակնկալ կերպով ձախողեց մրցաշրջանի առաջին հատվածը, ներկա դրությամբ առջևում ունի 11 հանդիպում՝ մրցաշարային դիրքերը բարելավելու համար։ Այս պահին դժվար է կանխագուշակել, թե որ թիմերը կլքեն Լա Լիգան, դա ավելի շատ կախված կլինի նրանից, թե որքանով են նրանք պատրաստ առաջնության վերսկսմանը․ կարևոր գործոն է ֆուտբոլիստների մարզավիճակը, ինչպես նաև պահեստայինների երկար նստարանի առկայությունը։
Առաջնության մնացած հանդիպումները անցկացվելու են խիտ գրաֆիկով, և երկար ժամանակ մարզումներ և խաղեր չանցկացնելուց հետո, ֆուտբոլիստների համար դժվար կլինի շաբաթական 2-3 հանդիպում անցկացնելը։
Մրցաշարային աղյուսակը 27-րդ տուրից հետո
Ինչ վերաբերվում է լավագույն ռմբարկուների մրցավազքին, ապա Մեսսի լիգայում, օ՜հ, ներողություն, Լա Լիգայում առաջատարը Մեսսին է «Բարսելոնայից»՝ խփած 19 գնդակներով։ Նրան հաջորդում են «Ռեալի» հարձակվող Բենզեման՝ 14 գոլ։ Մեսսին նաև լավագույնն է գոլային փոխանցումների քանակով՝ 12։ Հաջորդը «Ռեալ Սոսեյդադի» կիսապաշտպան Պորտուն է՝ 8 արդյունավետ փոխանցում։
Լա լիգան և Իսպանիայի ֆուտբոլի արքայական ֆեդերացիան (RFEF) համաձայնության են հասել առաջնության հանդիպումների մեկնարկից առաջ կորոնավիրուսից մահացած մարդկանց հիշատակը հարգելու վերաբերյալ։ Լա լիգայի և Սեգունդայի բոլոր հանդիպումները մինչև մրցաշրջանի ավարտը կսկսվեն մեկ րոպե լռությամբ ի հիշատակ կորոնավիրուսից մահացած մարդկանց։
Վար Բաբայան
