Իտալական «Ինտերի» կիսապաշտպան Հենրիխ Մխիթարյանը մեկնաբանել է թիմում տեղի ունեցած մարզչական փոփոխությունը։ Սիմոնե Ինձագիի փոխարեն գլխավոր մարզիչ է նշանակվել «ներաձուրիների» նախկին ֆուտբոլիստ Քրիստիան Կիվուն։
«Կիվուի փիլիսոփայությունն ու գաղափարները նոր են։ Որքան շուտ հասկանանք նրա պահանջները, այնքան լավ։ Մենք անմիջապես սկսել ենք լուրջ մրցաշարով, ժամանակ գրեթե չկա։ Նոր մարզչի դեպքում կարևոր է ընդունել հրահանգները, սովորել և աշխատել։ Կիվուն լուրջ է և սիրալիր։ Նա մեզ աջակցում է թե՛ հոգեբանորեն, թե՛ տակտիկապես։ Առաջին մարզման ժամանակ նրա ձեռագիրն արդեն տեսանելի էր։ Դասավորությունը նույնն է, բայց մոտեցումն այլ է՝ համեմատած Ինձագիի հետ։ Ինձագիին հրաժեշտ տվեցինք անձնական կարգով։ Ես խուսափեցի սոցիալական ցանցերում գրառում անելուց։ Նա կայացրեց իր որոշումը, մենք ընդունեցինք։ Այդ գլուխը փակվեց, նորն է սկսվում։
Դժվար պարտություն էր Չեմպիոնների լիգայի եզրափակիչում։ Մենք չենք մոռանում ճանապարհը, որ մեզ հասցրեց եզրափակիչ՝ հիանալի խաղերով։ Բայց հիմա հետ դառնալ հնարավոր չէ։ Պետք է ոտքի կանգնել, սովորել և առաջ շարժվել։ Դրա վրա շատ ժամանակ վատնել պետք չէ։ Պետք է աշխատել՝ հաղթելու համար առաջիկա օրերին, շաբաթներին և տարիներին»,- Մխիթարյանի խոսքն է մեջբերում La Repubblica-ն։
