Հունիսի 15-ին «Օլդ Թրաֆորդ» մարզադաշտում կայացավ ավանդական Soccer Aid բարեգործական հանդիպումը, որտեղ մրցեցին Աշխարհի և Անգլիայի հավաքականները։ Միջոցառումը հավաքեց 7 միլիոն ֆունտ, որոնք կուղղվեն ՅՈւՆԻՍԵՖ-ի ծրագրերին։
Աշխարհի հավաքականի կազմում հանդես եկան այնպիսի անվանի ֆուտբոլիստներ, ինչպիսիք են Կառլոս Տևեսը, Ռիվալդոն, Լեոնարդո Բոնուչին, Էդվին վան դեր Սարը, Նեմանյա Վիդիչը և այլք։ Անգլիայի թիմում խաղացին Ուեյն Ռունին, Փոլ Սքոուլզը, Ջո Հարթը, ինչպես նաև դերասանուհի Բելա Ռամզին։
Խաղն ավարտվեց Աշխարհի հավաքականի հաղթանակով՝ 5:4 հաշվով։ Չորս գոլ խփեց Կառլոս Տևեսը։
Հանդիպումից հետո համացանցում մեծ տարածում գտավ դրվագ, որում Բոնուչին խիստ, սակայն կանոնների սահմաններում սահընկում կատարեց Անգլիայի կանանց հավաքականի նախկին առաջատար Ստեֆ Հոթոնի դեմ։ Վերջինս ընկավ, սակայն միջադեպը բացասական շարունակություն չունեցավ։
Խաղից հետո նրանք միասին լուսանկարվեցին, և Բոնուչին հումորով մակագրեց նկարը՝ «Նա դեռ ողջ է»։
