«Մանչեսթեր Յունայթեդի» երիտասարդական թիմի նախկին ֆուտբոլիստ Վինի Դե Սոուզան մահացել է 19 տարեկանում: Նրան մահացած են հայտնաբերել սեփական ննջասենյակում: Պատճառն ինքնասպանությունն է եղել:
Վինին ծնվել է Բրազիլիայում, մեծացել Պորտուգալիայում, ապա տեղափոխվել է Մեծ Բրիտանիա։ «Մանչեսթեր Յունայթեդի» ակադեմիայում խաղացել է մինչև 14 տարեկանը, այնուհետև միացել է «Ուորինգթոն Թաուն» ակումբին։ Ընտանիքի անդամները նշել են, որ վերջին ամիսներին Վինին դրսևորել է դեպրեսիայի նշաններ՝ սոցիալական մեկուսացում, հետաքրքրությունների կորուստ և ինքնավստահության անկում։ Նա նաև դժգոհել է մաշկային խնդիրներից և դեղորայքի հասանելիության դժվարություններից։
Թեև Վինին ծրագրել էր այցելել Բրազիլիա, նա իրեն մեկուսացված էր զգում, հատկապես այն բանից հետո, երբ նշել էր, որ իր բոլոր ընկերները թմրանյութեր են օգտագործում։ Ինքը փորձել էր միայն մեկ անգամ և զղջացել։ Տոքսիկոլոգիական փորձաքննությունը ցույց է տվել, որ նրա օրգանիզմում թմրանյութերի կամ ալկոհոլի հետքեր չեն եղել։
«Ուորինգթոն Թաուն» ակումբը հարգանքի տուրք է մատուցել Վինիի հիշատակին՝ նրան անվանելով տաղանդավոր և սիրված խաղացող։
