Արտակ Եդիգարյան․ Փյունիկի լուծարման մասին խոսակցություններ թիմում չեն եղել

Կարանտինային կյանքը Հայաստանում ևս մեկ ամիս կտևի։ Սա նշանակում է նաև, որ ֆուտբոլն ամենամոտ ապագայում չի վերադառնա մեր մարզադաշտեր։ Ինչո՞վ են զբաղվում ֆուտբոլիստները, որքա՞ն են կարոտում ֆուտբոլն ու ե՞րբ են սպասում դրա վերադարձին․ այս և այլ թեմաների մասին այս անգամ ArmSport-ը զրուցել է «Փյունիկի» կիսապաշտպան Արտակ Եդիգարյանի հետ։ Ի դեպ, նա պատմել է նաև՝ ինչպես է արձագանքել օրերս մամուլում տարածված այն շշուկներին, թե «Փյունիկը» հնարավոր է դադարեցնի գոյությունը։

-Կարանտինում չձանձրանալու լավագույն ձևը։

-Կարելի է ասել՝ չեմ ձանձրանում։ Ամբողջ օրս անցկացնում եմ երեխաներիս հետ խաղեր խաղալով, մուլտֆիլմեր կամ ֆիլմեր դիտելով։ Փորձում ենք մի կերպ անցկացնել օրերը։

-Ինպիսի՞ն է կյանքն առանց ֆուտբոլի:

-Շատ բարդ է։ Հիմա հասկանում եմ, որ երբ մի քանի տարի հետո թողնեմ ֆուտբոլը, շատ բարդ է լինելու։

-Անհատական մարզումներ անցկացնո՞ւմ ես։

-Անպայման։ Տանը անհատական մարզումներ ենք անցկացնում թիմի ծրագրով։ Նաև մարզավիճակս պահելու համար վազում եմ ամեն օր։

-Ինչի՞ց  են բաղկացած մարզումները:

-Ավելի շատ տանը մարզչի ասած վարժություններն ենք անում՝ ոտքերի ու ձեռքերի հետ կապված։ Ինչպես նաև վազք։

-Մյուսներին ի՞նչ խորհուրդ կտաս չձանձրանալու համար։

-Դե, քանի որ մարզումներն ու հավաքները մեզնից շատ ժամանակ են խլում ու տանը շատ քիչ ենք լինում, ապա խորհուրդ կտամ վայելել ընտանիքի հետ անցկացրած ժամանակը, հետաքրքիր ֆիլմեր կամ սերիալներ դիտել, կամ PlayStation խաղալ։

-Ի՞նչ ֆիլմեր խորհուրդ կտաս։

-Մեծ հաճույքով նայել եմ «Бумажный дом» սերիալը, «2+1» ֆիլմը: Շատ եմ սիրում նաև «На краю» սերիալը։

-Իսկ երգե՞ր։

-Ամեն տեսակի երգ սիրում եմ։ Շատ եմ սիրում տանը բարձր երաժշտություն լսել։ Ամեն օր լսում ենք երեխաներիս հետ։ Աղջիկս պարել շատ է սիրում ու ավելի շատ այնպիսի երգեր ենք լսում, որ նա պարի։

-Առաջնությունը շարունակելու ի՞նչ սցենար ես տեսնում։ Ըստ քեզ՝ ե՞րբ ու ինչպե՞ս այն կլինի։

-Շատ կարոտած սպասում եմ, թե երբ է վերսկսվելու առաջնությունը։ Ճիշտ է, այն մեզ համար այս տարի լավ չի դասավորվել, բայց միևնույն է, շատ դժվար է առանց ֆուտբոլի։ Շատ եմ ուզում մարզումներն ու խաղերը վերսկսվեն։

Շատ խաղ չի մնացել մեր առաջնությանը, իմ կարծիքով՝ այս նոր ձևաչափը պետք է փոխվի, մեր թիմերը շատ քիչ են։ Եթե 12 թիմ ունենայինք առաջնությունում, այդ ձևաչափը կաշխատեր, բայց այսպես, ինձ թվում է, լավ չստացվեց։ 

Հույս ունենք, որ գոնե մեկ ամսից կսկսենք մարզումները ու գոնե հունիսին՝ խաղերը։ Կարծում եմ՝ ավելի երկարել չի կարող, ամբողջ աշխարհն այդքան մեծ դադար չի կարող վերցնել։ Եթե իրավիճակը դեպի լավը չփոխվի, ինչ-որ սահմանափակումներով պետք է սկսել խաղերը։

-Սահմանափակումներով, այսինքն՝ առանց հանդիսականի՞։

-Այնպես չէ, որ մեզ մոտ հանդիսականները միշտ շատ են լինում, բայց քանի որ շատ քիչ խաղեր են մնացել, կարելի է նաև այդպես, որպեսզի առաջնությունն ավարտին հասցնենք։ Մինչև այս իրավիճակը կշտկվի ու կանցնենք մեր բնականոն կյանքին։

-«Փյունիկը» փաստորեն դուրս մնաց պայքարից․ ի՞նչը չստացվեց։

-Լավ չսկսեցինք առաջնությունը, իսկ հետո չեմ կարող ասել՝ ինչու՞ չստացվեց մեզ մոտ, որովհետև լավ թիմ ունենք։ Ինքներս մեր մեջ պետք է փնտրենք սխալներն ու վերլուծենք, որպեսզի նման բան այլևս չկրկնվի։ «Փյունիկը» միշտ ամենաբարձր տեղերի համար է պայքարել։

-Ո՞րն է լինելու ձեր մոտիվացիան առաջնության վերսկսումից հետո։

-Բնականաբար, շատ դժվար է լինելու, որովհետև չենք պայքարելու մրցանակային տեղի համար, բայց փորձելու ենք վերջին մի քանի խաղը պատվով խաղալ։

-Օրերս մամուլում շշուկներ էին պտտվում, որ «Փյունիկը» հնարավոր է լուծարվի․ Թիմում այդպիսի խոսակցություններ եղե՞լ են, թե՞ դուք էլ առաջին անգամ մամուլից լսեցիք այդ մասին։

-Ո՛չ, այդպիսի խոսակցություններ չեն եղել թիմում։ Միայն մամուլում եմ նման բան տեսել ու հուսով եմ, որ դրանք զուտ խոսակցություններ են, որովհետև «Փյունիկը» շատ լավ  պատմություն ունի։ Շատ ցավալի կլինի, եթե նման բան լինի։

-Ինչպե՞ս արձագանքեցիր այդ լուրին։

-Դե, բնականաբար, զարմանքով, քանի որ նման բան չէի լսել։ Հետո կարդացի, որ ակումբը պաշտոնապես հերքել է այդ լուրը, շատ լավ զգացի։

Ստելլա Բաբլոյան