Ֆրանսիացի կենտրոնական պաշտպան, «Լիվերպուլի» խաղացող Իբրահիմա Կոնատեն մեկնաբանել է թիմի պաշտպան Վիրջիլ վան Դեյկի հետ խաղը:
«Վիրջիլի մասին խոսելիս բոլորս էլ գիտենք, թե որքան լավն է նա, որքան առանձնահատուկ է ու ինչի է հասել տարիների ընթացքում։ Ես նրանից շատ բան եմ սովորել։ Երբ նոր էի եկել ակումբ, նա ինձ բազմաթիվ խորհուրդներ տվեց։ Ինչպես արդեն ասել եմ, մի օր ես նրանից ավելի լավը կդառնամ, դրա համար ամեն օր քրտնաջան աշխատում եմ։
Անհավանական է, թե այս մրցաշրջանում քանի մրցավեճի լավագույն խաղացողի մրցանակ կարող էի ստանալ։ Վիրջիլի կողքին խաղալը հրաշալի է, որովհետև նա գերազանց ֆուտբոլիստ է, բայց երբեմն մարդկանց թվում է, թե խաղում է միայն նա։ Ո՛չ, ես նույնպես խաղում եմ։ Ես նույնպես լավ հանդիպումներ եմ անցկացնում, բայց բոլորը տեսնում են միայն նրան, որովհետև նա Վիրջիլն է։ Ես չեմ նախանձում, բայց եթե դիտեք խաղը, այն ձեզ կասի ճշմարտությունը», – Կոնատեի խոսքերը մեջբերում է Sky Sports-ը։
Հիշեցնենք, որ ԱՊԼ-ի 30 տուրերից հետո «Լիվերպուլը» զբաղեցնում է մրցաշարային աղյուսակի առաջին հորիզոնականը։
