Հայտնի ռուս մասնագետ Ալեքսանդր Տարխանովը, որն այժմ «Փյունիկի» փոխնախագահն է, ուրբաթ վերադարձել է Ռուսաստան ու РИА Новости-ի հետ զրույցում պատմել, թե ինչ իրավիճակ է տիրում Երևանում ու արդյոք մտադի՞ր են կրճատել ֆուտբոլիստների աշխատավարձերն այս դադարի ընթացքում.
-Ալեքսանդր Ֆյոդորովիչ, ինչպե՞ս արձագանքեցիք, երբ Հայաստանի առաջնությունը դադարեցվեց:
-Հանգիստ: Ասացին, որ պետք է դադարեցնել խաղերը, մարզումները: Երևանում այս առումով շատ խիստ է, փողոցում մարդկանց և մեքենաներ գրեթե չես տեսնի, երեկոյան առհասարակ մարդ չկա: Բոլոր մեծ խանութները փակ են, ռեստորանները՝ ևս: Կարելի է միայն մի քանի սրճարան գտնել: Չնայած՝ չեմ կարող ասել, թե Հայաստանում շատ են վարակակիրները: Ոչ մի խուճապ չկա, բոլորն իրենց նորմալ են պահում: Երևանում շշուկներ էին պտտվում, որ հարսանիքին կորոնավիրուսով վարակված հյուր է գնացել ու վարակել շատերին: Բայց ես չեմ հավատում:
Քաղաքում զբոսաշրջիկներ առհասարակ չկան: Տնտեսությանը լուրջ հարված կլինի:
-Կորոնավիրուսը կաթվածահար է արել ամբողջ աշխարհը:
-Միայն բելառուսներն են ֆուտբոլ խաղում: Լավ է, որ գոնե մի սպորտ մնացել է: Մյուս կողմից, երբ նման համաճարակ է, ավելի լավ է դադար վերցնել: Ավելի լավ է սպասել ու հետո շարունակել խաղալ: Իտալիային և Չինաստանին կորոնավիրուսը լուրջ հարվածներ հասցրեց: Որոշ երկրներում այն արդեն զիջում է դիրքերը, շատ են ապաքինված մարդիկ: Առհասարակ, գրիպից ավելի շատ են հիվանդանում: Իսկ եթե նայենք օնկոլոգիայի՞ն. դրանից շատ ավելի շատ մարդիկ են մահանում, իսկ սա ընդամենը կորոնավիրուս է: Ես ամեն տարի հետազոտություն եմ անցնում, տեսնում եմ, թե ինչ իրավիճակ է, որքան մարդիկ են բուժվում, մահանում: Ահա, թե ինչի հետ է պետք պայքարել: Ինձ մոտ ամեն ինչ վաղուց անցել է, դա 12-13 տարի առաջ էր: Քաղցկեցով հիվանդ մարդկանց համար կորոնավիրուսն ամենասարսափելի սպառնալիքը չէ, հավատացեք ինձ:
-Դուք մնացել եք Երևանո՞ւմ, թե՞ վերադարձել եք տուն:
-Ուրբաթ օրն եմ վերադարձել: Ինձ հետ նույն ինքնաթիռով նաև մի քանի ֆուտբոլիստ է վերադարձել: Մեզ ասացին, որ դա վերջին չվերթն էր դեպի Ռուսաստան:
-Մինչ ե՞րբ եք տանը:
-Դեռևս չգիտեմ: Հենց ամեն բան կարգավորվի, կվերադառնամ Հայաստան:
-Ձեզ ինչպե՞ս դիմավորեցին օդանավակայանում:
-Հանգիստ: Երևանի ռեյսն արագ հավաքեց իր իրերը, բոլորը հեռացան, 5 րոպե տևեց: Իսկ մյուս երկրների ուղևորները կանգնել էին, ստուգվում էին:
-Իրավիճակը որևէ սարսափ ֆիլմ չէ՞ր հիշեցնում:
-Ոչ: Միայն մեկ մարդու տեսա՝ կոստյումով: Հարցնում էր՝ ով Հայաստանից է եկել, միանգամից գնացեք ելքի մոտ: Նույնիսկ մարտի 7-ին ավելի շատ բժիշկներ կային: Ի դեպ, ես նման ֆիլմեր չեմ դիտում:
-«Փյունիկի» ֆուտբոլիստները կորոնավիրուսի թեստեր հանձնե՞լ են:
-Ոչ:Տղաներից ոչ մեկը հիվանդ չէ: Ոչ մի ախտանիշ չկա: Բոլորը տանն են, արդեն գրում են, որ կարոտում են ֆուտբոլը:
-Ֆուտբոլիստներին ավելորդ քաշի համար կտուգանե՞ք:
-(Ծիծաղում է) Տեսնենք: Թող սկզբի համար հավաքվեն բազայում: Չեմ կարծում, թե խնդիր կլինի այդ առումով: Երևանում շատ զբոսայգիներ կան, նրանք ինքնուրույն մարզվում են, այնպես որ որևէ մեկն առանց շարժման չի մնում: Ավելին, նրանցից յուրաքանչյուրին մարզման ծրագիր ենք տվել: Ես ինքս էլ ամեն առավոտ մեկ ժամ մարզվում եմ:
-Կարևոր պահ. ի՞նչ կլինի ֆուտբոլիստների աշխատավարձերի հարցը, երբ նրանք ստիպված են նստել տանն առանց աշխատանքի:
-Մոսկվայում կհանդիպենք ակումբի նախագահի հետ, կքննարկենք: Դեռևս վաղ է այդ մասին խոսելը:
-Դուք եղել եք ֆուտբոլիստ, մարզիչ, ֆունկցիոներ: Ինչպե՞ս է ճիշտ վարվելը՝ ամբողջությամբ աշխատավարձերը վճարե՞լը, թե՞ կրճատելը:
-Բոլոր ոլորտներում աշխատավարձերի կրճատում է ընթանում: Եվրոպայում 15-30 %-ով կրճատվում են պայմանագրերը:
-Նորմալ մարզումների բացակայության պայմաններում, որքա՞ն ժամանակ է անհրաժեշտ, որպեսզի թիմը հասնի պատշաճ մակարդակի:
-Եթե 10 օր մարզում չլինի, ապա 1 շաբաթը բավական է վերականգնվելու համար: Բայց այն դեպքում, եթե ֆուտբոլիստներն արձակուրդի ընթացքում չխմեն ու իրենց տոնուսի մեջ պահեն:
-Հիմա այդպիսի բաները հնարավո՞ր են:
-Ոչ, հիմա այլ ժամանակներ են, բոլորը պրոֆեսիոնալներ են: Խորհրդային տարիներին կարող էին այդպես անել, խմել (ծիծաղում է): Ամեն դեպքում, որքան՝ ես աշխատել եմ, նման բան չի եղել:
