Հայաստանի երիտասարդական հավաքականի նախկին ֆուտբոլիստ Հայկ Գալստյանը մեկ տարվա դադարից հետո նորից խաղադաշտ դուրս գալու հնարավորություն կստանա` այժմ արդեն պաշտպանելով «Ալաշկերտի» գույները:
Հայկը գրեթե կես տարի վերականգնվել է վնասվածքից, իսկ նախորդ տարվա ամառվանից սկսել մարզվել երևանյան թիմի հետ: 21-ամյա ֆուտբոլիստն ArmSport-ին տված հարցազրույցում պատմել է «Ալաշկերտ» տեղափոխության, ինքն իրեն տված խոստման և գլխավոր նպատակի մասին, որն էլ օգնել է Հայկին չհանձնվել ու պայքարել` ավելի ուժեղ վերադառնալու համար.
«Երբ Գերմանիայում էի, 6 ամիս վնասվածքի պատճառով չէի խաղում: Հետո ամռանը որոշեցի գալ Հայաստան և այստեղ սկսել մարզավիճակ հավաքել: Ցավոք, թղթային հարցերիս պատճառով չհասցրեցինք տրանսֆերը կատարել, և «Ալաշկերտի» ղեկավարությունը թույլ տվեց գոնե մարզվել թիմի հետ մինչև մյուս տրանսֆերային պատուհան: Այդ ժամանակվանից խոսք տվեցի, որ ձմռանն ուրիշ թիմ չեմ տեղափոխվի ու նորից պայմանագիր կկնքեմ «Ալաշկերտի» հետ»,- խոստովանում է Հայկ Գալստյանը:
Ֆուտբոլիստն ընդգծում է` շատ շնորհակալ է երևանյան թիմի ղեկավարությանն իր կողքին լինելու և աջակցելու համար.
«Շնորհակալ եմ «Ալաշկերտի» թե՛ ղեկավարությանը, թե՛ մարզչին, որ հնարավորություն տվեցին թիմում մարզվել: Վերջերս մասնակցել եմ թիմի` Բելեկի հավաքին ու շատ լավ տպավորություններ ունեմ: Ամբողջովին հարմարվել եմ թիմին, շատ լավ հարաբերությունների մեջ եմ թե՛ տղաների, և թե ՛ մարզչական շտաբի հետ: Իսկ ակումբի գլխավոր նպատակն այս տարի Հայաստանի չեմպիոն դառնալն է»:
Հայկը 2015 թվականից հանդես է եկել Գերմանիայում`«Հոֆենհայմի» Մ17 ու Մ19, «Բոխումի» Մ19 և «Շտուտգարտի» երկրորդ թիմում: Ասում է`այս 5 տարիների ընթացքում մեծ օգուտ է ստացել.
«Շատ ուրախ եմ, որ այդքան տարիներ խաղացել եմ Գերմանիայում և շատ օգուտ եմ ստացել:
Չեմ կարող կոնկրետ մեկ թիմ առանձնացնել, բոլոր թիմերի հետ արդյունավետ ու հաջող է ստացվել»,- ասում է Հայկն ու նշում, որ 1 տարվա դադարից հետո շատ դժվար կլիներ հիմա նորից Գերմանիայում փորձել հաստատվելը.
«1 տարի չեմ խաղացել, իհարկե դժվար կլինի այս երկար դադարից հետո վերադառնալը, բայց ամեն օր աշխատում եմ ինձ վրա, քրտնաջան մարզումներ եմ անցկացնում ու հուսով եմ` աստիճանաբար պատրաստ կլինեմ մոտակա խաղերին: Կարծես`ամեն ինչ նորից եմ սկսում. հիմա պետք է Հայաստանում սկսեմ խաղալ, հասնեմ իմ լավագույն մակարդակին ու նորից վերադառնամ Եվրոպա»:
Չնայած քրտանաջան մարզումներին` Հայկը խոստովանում է, որ դեռևս լավագույն մարզավիճակում չի գտնվում, բայց ոչ մի օր կանգ չի առնում իր նպատակներին հասնելու ճանապարհին.
«Չէի ասի, որ 100 տոկոսով պատրաստ եմ, բայց օրեցօր մարզավիճակս լավանում է: Այս 1 տարին իրականում շատ բարդ ժամանակաշրջան էր ինձ համար, բայց ես միայն առաջ եմ նայում, չեմ հուսահատվել ոչ մի օր, քանի որ ունեմ նպատակ և ամեն ինչ անելու եմ, որպեսզի հասնեմ իմ նպատակին, որքան էլ` այդ ճանապարհը դժվար լինի: Իսկ գլխավոր նպատակս նորից թոփ-առաջնությունների թիմերում հանդես գալն ու Ազգային հավաքական հրավիրվելն է»,- ասում է Հայաստանի երիտասարդական հավաքականի նախկին ֆուտբոլիստը:
Գալստյանը 10 հանդիպում է անցկացրել Հայաստանի Մ17 հավաքականի, 16 խաղ (3 գոլ)` Մ19 հավաքականի և 6 հանդիպում` երիտասարդական հավաքականի կազմում:
Վերջին անգամ Հայաստանի առաջնությունում հանդես է եկել 2013 թվականին` պաշտպանելով նախկին «Միկայի» գույները: Ֆուտբոլիստը խոստովանում է` շատ տարբերություն է տեսնում այն ժամանակվանից ի վեր.
«Բոլոր թիմերի մակարդակը շատ է բարձրացել, սպասելիքներս էլ շատ դրական են: Շատ ուրախ եմ, որ մեր ֆուտբոլի մակարդակն ուժեղանում է»,- եզրափակում է իր խոսքը Հայկ Գալստյանը:
«Ալաշկերտը» Հայաստանի Բարձրագույն խմբի առաջնության 16 տուրից հետո 30 միավոր ունի և «Արարատ-Արմենիայի» հետ կիսում է առաջատարի դիրքը: Առաջնության շրջանակում իր հաջորդ հանդիպումն «Ալաշկերտը» կանցկացնի մարտի 6-ին` Ավանի ակադեմիայի մարզադաշտում հյուրընկալվելով «Գանձասար-Կապանի» կողմից:
Նարե Հովհաննիսյան
