Վստահ եմ՝ Նոան մեզ շատ բան կսովորեցնի, և մենք միասին կաճենք․ Վիլյառեալի տնօրեն

Մոտ մեկ ամիս առաջ «Նոան» հայտարարեց «Վիլլառեալի» հետ բացառիկ համագործակցության վերաբերյալ համաձայնագիր ստորագրելու մասին։

Այսօր՝ նոյեմբերի 11-ին, երևանյան ակումբն ասուլիս էր հրավիրել՝ ներկայացնելու իսպանական ակումբի հետ համագործակցության մանրամասները։ Ասուլիսին ներկա էին «Նոա» հոլդինգի նախագահ Ռոման Գևորկյանը, «Վիլյառեալի» ինստիտուցիոնալ կապերի տնօրեն, լեգենդար Մարկոս Սեննան և «Նոայի» գործադիր տնօրեն Արթուր Սահակյանը:

Ասուլիսի պաշտոնական հատվածից հետո մեկնարկեց լրագրողների հետ հարց ու պատասխանը:

— Պարո՛ն Սեննա, ուրախ ենք Ձեզ տեսնել Հայաստանում: Վստահաբար, արդեն հասցրել եք տեսնել «Նոայի» ենթակառուցվածքները: Ի՞նչ տպավորություն է թողել Ձեզ վրա: Միգուցե արդեն ներկա եք եղել նաև երեխաների մարզման: Արդյոք կա՞ն երեխաներ, որոնք աչքի են ընկել լավ խաղով՝ Ձեր պրոֆեսիոնալ աչքով:

— Դեռ նոր ենք իրար ճանաչում, ծանոթացել, դեռ պետք է այցելենք ակադեմիա: Կան մարզիչներ, որոնք շատ ավելի լավ գիտեն այդ հարցի պատասխանը, որ Դուք տալիս եք, և կարող են այժմ Ձեզ պատասխանել: Փաստորեն, այստեղ է գտնվում մեր մարզիչներից մեկը:

Սեննայի խոսքից հետո բարձրախոսը փոխանցվեց «Վիլյառեալի»՝ ասուլիսին ներկա մարզիչներից մեկին, որն էլ խոսեց «Նոայի» ակադեմիայում երեխաների մարզումներից:

— Հնարավորություն ունենալով գտնվելու «Նոայի» ակադեմիայում՝ մենք տեսանք, որ այն ունի բավականին բարձր հնարավորություններ և միաժամանակ մեկ թիմից ավելի կարող է մարզվել. ենթակառուցվածքներն այդ հնարավորությունը տալիս են: Շատ երեխաներ կարող են նաև պատկանել մեր ակումբին, և դա տեղի կունենա այդ համագործակցության համատեքստում: Եվ ներգրավված լինելով այս նախագծում՝ կարող եմ ասել, որ այո՛, իրոք կան երեխաներ, որոնք բավականին տաղանդավոր են, լավ հեռանկարներ ունեն, և այս համագործակցության համատեքստում կարող են աճել ու լավ ապագա ունենալ:

— Պարո՛ն Սահակյան, Հայաստանում կիրառված նախորդ փորձը 2 խնդիր է առաջ բերել: Մեկը, որ օտարերկրացի մարզիչների պատրաստած մեթոդաբանությունը, փաստաթղթային բազան հետագայում այնքան էլ լավ չի կիրառվում, մնում է թղթի վրա: Մյուս խնդիրը՝ մարզիչները շատ հաճախ չեն ցանկանում սովորել, նորը վերցնել: Ի՞նչ քայլեր եք պատրաստվում ձեռնարկել, բացի նրանից, որ պետք է ուշադիր լինել: Հստակ մտածե՞լ եք այդ ուղղությամբ և ի՞նչ եք պատրաստվում անել, որ սա իրոք կիրառվի և արդյունք ունենա:

— Ձեր կողմից նշված իսպանացի մասնագետներն աշխատում էին ՀՖՖ Տեխնիկական կենտրոն-Ակադեմիայում և փորձում էին իրենց ծրագիրը կիրառել ամբողջ հայկական ֆուտբոլի ուղղությամբ, և այն վերահսկելը մի քիչ դժվար էր, քանի որ կային ակումբներ, որոնցում որոշ մասնագետներ օգտագործում էին ծրագիրը, իսկ մեծամասնությունը չէր օգտագործում: Շատ լավ ընդգծեցիք, որ մարզիչները չեն ցանակնում աճ գրանցել իրենց մարզչական գիտելիքների և կարիերայի հարցում, բայց սա այլ է՝ կոնկրետ մեր ակումբինն է: Ու մենք մեր ամբողջ հնարավորություններով կենտրոնանալու ենք այս ամենը զարգացնելու համար: Բոլոր մարզիչները պետք է միևնույն կերպ մտածեն: Եթե այդպես չլինի՝ նրանք մեր ակադեմիայում անելիք չունեն: Իսկ ինչ վերաբերում է առաջընթացին՝ ամեն ինչ կանենք, որ ակադեմիայում լինեն այնպիսի մաիզիչներ, ովքեր կցանկանան մեզ հետ աճ գրանցել:

— Պարո՛ն Գևորկյան, քանի որ առիթ է ստեղծվել նաև Ձեզ հետ շփվելու. մեզ՝ հայ հանրությանը, միշտ հետաքրքիր էր «Նոա» հոլդինգի գործունեությունը: Ինչո՞ւ են տարբեր երկրներում ակումբներ ձեռք բերվում, ներառվում հոլդինգի մեջ, ու դեռևս չի նկատվում նրանց մեջ ինչ-որ հստակ կապ: Մեզ, բնականաբար, հետաքրքիր է, որ դրանից վերջին օգուտները հասնեն հայկական ֆուտբոլին: Ինչպիսի՞ն է Ձեր հոլդինգի գործունեության ընդհանուր համակարգը, գաղափարը, որը ներառում է այդքան ակումբներ:

— Առաջին հերթին, հիմնական առաջադրանքը բացարձակ ակումբներ ձեռք բերելը չէ, այլ ձեռք բերել այն ակումբները, որոնք աճելու ներուժ ունեն: Շատ կարևոր է հասկանալ, որ այն ակումբները, որ մենք ձեռք ենք բերել, միայն նրա համար չեն, որ զարգանա հայկական ֆուտբոլը: Ես Ձեզ կարող եմ տալ գործերի ցանկ, թե ինչ ենք մենք արել ու ինչի ենք հասել, որը զարգացրել է հայկական ֆուբոլը, բայց բացարձակ մի կարծեք, թե այն ակումբները, որ մենք ձեռք ենք բերում, հայկական ֆուտբոլի համար են. դա միանգամայն կոմերցիոն բիզնես է: Ինչպես և «Նոան»: Եվ Դուք գիտեք, որ մենք միակ ակումբն ենք, որը ձգտում է ինչ-որ կերպ կոմերցիոն գործունեություն ծավալել, դառնալ ինքնուրույն: Եթե մենք չունենայինք այդ եվրոպական զարգացումը, «Վիլյառեալը» երբեք չէր ժամանի այստեղ: Չգիտեմ՝ ինչու դա չեն արել այլ ակումբները, միգուցե նրանք դրա համար պատճառներ ունեն, բայց մեր տարածաշրջանում բոլոր հարևան երկրներում արդեն կան տեխնիկական գործընկերներ ակադեմիաների հարցում: Հայաստանում դա մինչև հիմա չկար: Նաև մասնագետների փորձը. այլ ակումբներում մեր բոլոր սկաուտները, մարզիչները հետևում են մեր հայկական ակումբին, բոլորը գիտեն և բոլորին առաջադրանք է ներկայացված, որ պետք է դիտարկեն մեր թիմերի ֆուտբոլիստներին, գլխավորը, որ առաջ մղեն մեր ֆուտբոլիստներին: Ամռանը մեր ֆուտբոլիստներից մեկն արդեն տեղափոխվեց «Դեբրեսեն»: Ե՛վ Դեբրեսենում, և Փարիզում, և Սիենայում ակադեմիաներում կան հայ երեխաներ, ինչը հեշտ գործընթաց չէ, հայկական անձնագրով Եվրոպայում խաղալ փորձելը նույնիսկ բարդ է: Եվ, իհարկե, սա միջազգային փորձ է, որով մենք ցանկանում ենք կիսվել ու զարգացնել հայկական ֆուտբոլը: Ուստի, այո, դա այդպես չի թվում, բայց մենք աշխատում ենք և ցանկանում ենք ավելին անել: Մեծ հույս ունեմ, որ այս ձմռանն առաջին թիմին կմիանան հունգարացիներ, ֆրանսիացիներ: Չգիտեմ՝ ինչպես է դա Ձեզ համար, դուր գալիս է, թե չէ, բայց մեզ համար շատ կարևոր է: Եվ, իհարկե, շատ ենք ուզում, որ հայ երկրպագուները նույնպես աջակցեն մեզ, քանի որ ինչ էլ անենք, տպավորություն է, կարծես ինչ-որ բան գողացել ենք հայկական ֆուտբոլում: Մենք երիտասարդացրել ենք մեր թիմը, այն դարձրել ենք ավելի հայական, միջազգային գործընկեր ենք ձեռք բերել: Ցանկալի է, որ հայ երկրպագուների կողմից ևս աջակցություն ունենանք:

-Պարո՛ն Սահակյան, ինչպես հասկացա՝ համագործակցությունը հիմնականում մանկապատանեկան թիմերի մասով է։ Իսկ «Նոայի» հիմնական թիմը որքանո՞վ է ներառված լինելու այս ծրագրում։

-Դուք Ձեր հարցին պատասխանեցիք հարցի սկզբում․ ողջ ծրագիրը ակադեմիայի շուրջ է լինելու։ Հիմնական թիմի հետ ուղղակի ամենօրյա շփում է լինելու, որովհետև այն մարզվում է նույն ակադեմիայում և հիմնական թիմի ու ակադեմիայի մարզիչների միջև հաճախ շփումներ, տեսակետների փոխանակում են լինում։ Այսքանը առայժմ։ Բայց հիմնական խնդիրն այն է, որ հետագայում ֆուտբոլիստներ տրամադրենք հիմնական թիմին։

-Հարց՝ Մարկոս Սեննային․ «Նոայի» տեսանկյունից պարզ է, թե ինչ կարող է տալ «Վիլյառեալի» հետ համագործակցությունը, բայց ի՞նչ կտա «Վիլյառեալին» «Նոայի» հետ համագործակցությունը։

-Արդեն նշվեց փորձի փոխանակման կետը։ «Վիլյառեալը» շատ այլ երկրների ակումբների հետ է համագործակցում և ունի այդ փորձի փոխանակման փորձը։ Վստահ եմ, որ «Նոայի» հետ համագործակցությունը շատ օգտակար կլինի, և մենք նոր բաներ կսովորենք։ Ինչպես գիտեք՝ «Վիլյառեալն» ունի իր մեթոդաբանությունը։ Նաև զբաղված ենք մեր մարզիչներին կրթելու գործընթացով, որ հետո ուղարկենք այլ երկրներ և այդ փորձի փոխանակումը տեղի ունենա։ Վստահ եմ, որ «Նոան» մեզ շատ բան կսովորեցնի, և մենք միասին կաճենք։

-Պարո՛ն Սեննա, մեկ շաբաթից մեկնարկում է Աշխարհի առաջնությունը․ ո՞ւմ եք երկրպագելու՝ Բրազիլիա, Իսպանիա, թե՞ այլ հավաքական և ո՞վ է ֆավորիտը։

-Իհարկե, բոլորս սպասում ենք Աշխարհի առաջնության մեկնարկին։ Կարելի է ասել, որ դա լավագույնը կլինի։ Ես ինձ արտոնյալ եմ զգում, քանի որ երկու հավաքականի կարող եմ երկրպագել՝ Բրազիլիային և Իսպանիային։ Տա Աստված, որ երկուսն էլ եզրափակիչում հայտնվեն և հաղթողը որոշվի հետխաղյա 11-մետրանոց հարվածաշարով։

Ֆավորիտների մասին խոսելով՝ ասեմ, որ ֆավորիտները կլինեն նրանք, ովքեր միշտ եղել են․ Լատինական Ամերիկայից՝ Բրազիլիան և Արգենտինան, Եվրոպայից՝ իհարկե, Իսպանիայի հավաքականը, Գերմանիայի, Բելգիայի, Ֆրանսիայի, Խորվաթիայի հավաքականները, Անգլիան, որ սկզբում միշտ ֆավորիտ է թվում, ընթացքում ոչ, բայց միշտ պայքարում է։ Վստահաբար կարող եմ ասել, որ հիանալի մրցաշար կտեսնենք։

Ստելլա Բաբլոյան