VBET Հայաստանի Գավաթը այսօր՝ մայիսի 8-ին, վիճարկում էին «Նորավանքն» ու «Ուրարտուն»։
Առաջին կեսն ավելի ակտիվ էին սկսել «Նորավանքի» ֆուտբոլիստներն ու, կարելի է ասել, որ ակտիվությունը պահպանեցին ողջ կեսի ընթացքում։ Արդեն առաջին րոպեին տանտեր համարվող թիմը կարող էր բացել հաշիվը, բայց դարպասին մոտ տարածությունից Եվգենի Կոբզարի կատարած հարվածը շեղ ընթացավ։ «Ուրարտուն» փորձում էր հակագրոհներ կազմակերպել, սակայն շատ դեպքերում դրանք իրենցից լուրջ վտանգ չէին ներկայացնում։
Այսպիսով, 29-րդ րոպեին անկյունայինի խաղարկումից հետո Ռուդոսելսկին գլխով գնդակը փոխանցեց դարպասին շատ մոտ կանգնած Մուստաֆինին, որն էլ բացեց հանդիպման հաշիվը։
Գոլից հետո Սերգեյ Մկրտչյանը տուգանայինի մատույցներից ուժեղ հարված կատարեց, սակայն Հենրի Ավագյանը ևս փայլուն գործեց այս դրվագում՝ հեռացնելով գնդակը։
Թիմերն ընդմիջման գնացին 1-0 հաշվով։
Ընդմիջումից հետո «Ուրարտուն» շատ ավելի թարմ տեսք ուներ և ողջ կեսի ընթացքում չէր հեռանում մրցակցի տուգանային հրապարակից։ «Նորավանքը», սակայն գրագետ պաշտպանվում էր, մի քանի դրվագում կրկին շատ վստահ գործեց թիմի դարպասապահ Հենրի Ավագյանը։ Իսկ 77-րդ րոպեին «Նորավանքը» հարձակման աջ եզրով հակագրոհ ձեռնարկեց, որի արդյունքում գնդակը հայտնվեց Տենտոն Յեննեի մոտ, որը մոտ տարածությունից գրավեց Արսեն Բեգլարյանի դարպասը՝ կրկնապատկելով իր թիմի առավելությունը։
Այսպիսով, «Նորավանքը» Հայաստանի Գավաթի եզրափակչին առաջին իսկ մասնակցությամբ դարձավ երկրի գավաթակիր։
Հիշեցնենք, որ «Նորավանքը» երկու տարվա պատմություբ ունի, որի պատճառով կարող է իրավունք չստանալ մասնակցելու եվրագավաթներին։ Սակայն ակումբը դիմել է ՈՒԵՖԱ իրեն ընդառաջելու խնդրանքով և սպասում է որոշման։
