Նախ պետք է հաղթես ինքդ քեզ, հետո՝ փորձություններին. Ռազմիկ Միսակյան

Գրեփլինգի Եվրոպայի առաջնության փոխչեմպիոն Ռազմիկ Միսակյանն ArmSport-ի հետ զրույցում պատմել է առաջիկա մրցաշարերի, գոտեմարտերին տրամադրվելու իր բանաձևի և անհաջողությունները հաղթահարելու մասին։

-Ռազմիկ, ինչպե՞ս սկսեցիք զբաղվել գրեփլինգով:

-Երկար տարիներ զբաղվել եմ ըմբշամարտով և քանի-որ գրեփլինգը ձևաչափով նման էր ըմբշամարտին,որոշեցի ուժերս փորձել։ Սկսեցի հաճախել մարզումներին ու կարճ ժամանակում հասկացա,որ ինձ մոտ ստացվում է։ Մարզիչների առաջարկով մասնակցեցի Հայաստանի առաջնությանը և հաղթեցի ,որին հաջորդեց Եվրոպայի առաջնությունը։

— Հայաստանում գրեփլինգով սկսեցին զբաղվել մոտավորապես մեկ տարի առաջ։ Այդքան կարճ ժամանակում կարողացաք յուրացնել մարզաձևի տեխնիկան և մեդալ նվաճել Եվրոպայի առաջնությունում։ Ի՞նչ դժվարություններ հաղթահարեցիք այդ ամբողջ ընթացքում:

-Առաջին հերթին ինձ օգնեց փորձառությունս ըմբշամարտում,սակայն շատ կարևոր դեր ունի նաև նպատակադրված աշխատանքը։ Հաղթանակի հասնելու համար պետք է պատրաստ լինես շատ աշխատել և անցնել ցանկացած դժվարության միջով, ինչը վաղ թե ուշ իր արդյունքը կտա։ Նախ պետք է հաղթես ինքդ քեզ, հետո՝ փորձություններին։ Ես նույնպես մեծ դժվարություններ եմ հաղթահարել մինչև այս մեդալը նվաճելը։ Ճիշտ է՝ արծաթ, բայց անպայման գնալու եմ ոսկու հետևից ։

-Երկար տարիներ զբաղվել եք ըմբշամարտով, ըմբշամարտի եվրոպայի առաջնության մրցանակակիր եք։ Ինչպե՞ս որոշեցիք փոխել մարզաձևը։

-Պարզապես ինձ փորձել եմ այլ ձևաչափում, ինչը ստացվել է։ Կյանքիս մեծ մասը եղել եմ ըմբշամարտի մեջ և հիմա էլ չեմ թողել ըմբշամարտը։ Ամեն տարի հրավերք եմ ստանում ու մասնակցում եմ Ավստրիայում անցկացվող ակումբային առաջնություններին։

-Եվրոպայի առաջնությունից շատ քիչ ժամանակ է անցել։ Առաջիկայում ի՞նչ ծրագրեր կան։

-Պատրաստվում եմ սեպտեմբերի 4-6-ը կայանալիք աշխարհի առաջնությանը։

-Մրցաշարերից առաջ յուրաքանչյուր մարզիկի մոտ մի փոքր լարվածություն է առաջանում։ Ինչպե՞ս եք հաղթահարում դրանք։

-Ավելի շատ լարվում էի փոքր տարիքում, երբ դեռ նոր էի փորձ ձեռք բերում ։ Հիմա հավանաբար կապված փորձառության կամ տարիքի հետ, լարվածություն չի առաջնում։ Կարծում եմ՝ դա խանգարում է մարզիկին արագ կողմնորոշվել և արդյունքը լինում է սպասվածից վատ։

-Ինչ հետաքրքիր դեպք կհիշեք ,որ պատահել է մրցումների կամ մարզումների ժամանակ։

-Հավաքների ընթացքում,երբ ազատ ժամանակ էինք ունենում բլոտ էինք խաղում ։ Պարտվողը պետք է միանգամից 5 լիտր ջուր խմեր։ Մի օրվա ընթացքում ես երկու անգամ պարտվեցի։Հաջորդ առավոտյան,երբ մարզիչս քաշս ստուգեց, սովորականից 5 կգ ծանր էի։

-Ո՞րն է Ձեր մոտիվացիայի աղբյուրը։

-Ինձ իմ աղոթքներն են մոտիվացնում, յուրաքանչյուր գոտեմարտից առաջ առանձնանում եմ բոլորից և աղոթում։ Շատ եմ համոզվել , որ աղոթքներս տեղ են հասնում, ինձ դա օգնում է ։

-Մարզչի տված խորհուրդներից ո՞րն է Ձեզ համար եղել ամենահիշվողը։

-Գոտեմարտերից առաջ մարզիչս ասում էր. «Մենք սրա համար ճանապարհ ենք անցել ու դեռ ավելի մեծ ճանապարհ ունենք անցնելու ,մենք պատրաստ ենք» ։ Այս խոսքերը միշտ իմ մտքում են։ Շատ կարևոր է,որ մարզիչդ, ով քեզ հասցրել է այդ մակարդակին, հավատում է քո ուժերին։

-Ո՞ր հայտնի մարզիկից կցանկանայիք խորհուրդներ ստանալ։

-Խորհուրդներ կուզեի լսել Բուվայսար Սայտիևից , քանի-որ նա ինձ համար լեգենդար ըմբիշ է։ Դեռահաս տարիքից ցանկանում էի նրա նման լավ գոտեմարտել։

-Հայկական սպորտի անվանի մարզիկներից կա՞ այնպիսի մեկը, ով ոգեշնչում է Ձեզ։

-Կարելի է ասել,որ բոլորն էլ իրենց հաղթանակներով ոգեշնչում են։ Հետևում ու հպարտանում եմ բոլորի հաղթանակներով։

—————-

Եթե ոչ սպորտ ապա ՞…

Բիզնես

Ինչիպիսի՞ն է Ռազմիկը սպորտից դուրս 

Սպորտից դուրս ևս շատ ակտիվ եմ։ Ընկերներիս հետ սիրում եմ ավտոարշավների մասնակցել, որսորդությամբ զբաղվել։ Հետաքրքիր վայրեր եմ սիրում այցելել ։

Ի՞նչ խորհուրդ կտաք դեռահաս մարզիկներին

Խորհուրդ կտամ մարզվեն հավատով։ Հստակ նպատակ դնեն իրենց առջև ու հասնեն դրան։ Ճիշտ է, կհանդիպեն դժվարությունների, բայց հետո կհասկանան ,որ դժվարությունով ձեռք բերած հաջողությունը ամենասպասվածն է ու հաճելին։

Նելլի Ավետիսյան