Եվրոպական լիգաներից շատերում տրանսֆերային պատուհանը մոտենում է փակվելուն։ Ամենաթեժ տրանսֆերային իրադարձությունները սպասվում են առաջիկա շաբաթվա ընթացքում, բայց հունվարի սկզբից մինչ այժմ արդեն իսկ տեղի են ունեցել մի շարք հետաքրքիր տեղափոխություններ։ Նախորդ շաբաթ անդրադարձանք հայ ֆուտբոլիստների տրանսֆերներին (նյութը կարող եք կարդալ այստեղ), իսկ այսօր մեր դիտակետում միջազգային տրանսֆերային անցուդարձն է, իսկ ավելի կոնկրետ՝ բրիտանական տրանսֆերային իրադարձությունները, քանի որ այս ոչ շատ մեծ կղզում տրանսֆերային անշլագ է․․․
Տրանսֆերային շուկայում շատերն անհամբեր սպասում էին «Նյուքասլի» գերակտիվությանը։ Ակումբը, որի սեփականատերը վերջերս դարձավ Սաուդյան Արաբիայի պետական ներդրումային հիմնադրամը՝ արաբական երկրի թագաժառանգի գլխավորությամբ, այս պահին պայքարում է իր տեղը էլիտար դիվիզիոնում պահելու համար։ Այդ իսկ պատճառով էլ, սպասվում էր/է, որ հենց «կաչաղակները» կլինեն տրանսֆերային շուկայի գլխավոր նյուզմեյքերը։ Բայց այժմ ունենք կայացած երկու տրանսֆեր․ մոտ 15 մլն եվրոյով «Աթլետիկոյից» մառախլապատ Ալբիոն է վերադարձել Անգլիայի հավաքականի պաշտպան Կիրան Տրիպյերը, ինչպես նաև «Բարնլիից» 30 մլն եվրոյով ձեռք է բերվել նորզելանդացի հարձակվող Քրիս Վուդը։ Եթե առաջին տրանսֆերը, կարելի է ասել, տեղին էր, բավականին լուրջ ձեռքբերում, ապա մյուս տրանսֆերը․․․ 30 մլն եվրո 30-ամյա հարձակվողի համար, ով այս մրցաշրջանում դարձել է 3 գոլի հեղինակ 23 խաղում, անկեղծ ասած, մի փոքր անհասկանալի է։ Իհարկե, ներկայումս, որքան էլ շատ փող ունի անգլիական ակումբը, դժվար է համոզել բազմաթիվ որակյալ ֆուտբոլիստների տեղափոխվել մի ակումբ, որն ընդամենը պայքարում է տեղն ԱՊԼ-ում պահպանելու համար։ Հուսանք, որ «կաչաղակները» առաջիկա շաբաթվա ընթացքում կկարողանան համալրել իրենց երամը ևս մի քանի ֆուտբոլիստներով, քանի որ հակառակ դեպքում թիմին շատ դժվար կլինի տեղը պահել «արևի տակ»․․․ Չեմպիոնշիփում խաղալը դժվար թե մտնում է Սաուդյան Սուլթանի ծրագրերի մեջ։ Ովքե՞ր կարող են համալրել «Նյուքասլի» կազմը․ միջազգային մամուլում նշվում են բազմաթիվ անուններ՝ Ազարից մինչև Դեմբելե, սակայն դժվար է ասել՝ ով կհամաձայնվի տեղափոխվել անգլիական ակումբ կամ ընդհակառակը՝ որ տարբերակներին ավելի շատ հակված կլինեն հենց ակումբում։ Վերջերս ակտիվ լուրեր են շրջանառվում, որ թիմի կազմը կարող են համալրել ՄՅՈՒ-ից Ջեսի Լինգարդը և «Բայերի» նիդեռլանդացի պաշտպան Միտչել Բակերը․ այս տրանսֆերներն ավելի իրական են թվում, բայց գուշակություններ եկեք չանենք, դեռ մեկ շաբաթ կա տրանսֆերային պատուհանի փեղկերը փակվելուն․․․
Իսկ ահա ով է «Նյուքասլի» փոխարեն «շեյխի վայելքներ» անում ԱՊԼ-ում, դա «Ասթոն Վիլլան» է։ Բիրմինգհեմցիները, ինչպես երևում է, դեռ ամբողջովին չեն ծախսել Գրիլիշի դիմաց ստացված գումարները և այս ձմեռ տպավորիչ ձեռքբերումներ ունեն։ Այս պահի դրությամբ, իմ կարծիքով, հենց անգլիական ակումբն է բոլորից շատ զգալիորեն ուժեղացրել կազմը եվրոպական մյուս ակումբների համեմատ։ Նախ, Ջերարդը ԱՊԼ վերադարձրեց ևս մեկ ֆուտբոլիստ Լա Լիգայից․ անգլիական ակումբը մինչև մրցաշրջանի ավարտը վարձակալեց «Բարսելոնայի» կիսապաշտպան Ֆելիպե Կոուտինյուին։ Հատկանշական է, որ բրազիլացին ժամանակին խաղացել է Ջերարդի հետ «Լիվերպուլում»․ ահա այսպիսի հետաքրքիր վերամիավորում։ Մյուս տրանսֆերը ևս տպավորիչ է․ ևս մեկ ֆուտբոլիստ, ով խաղում էր Լիվերպուլում, բայց ոչ համանուն թիմում, այլ «Էվերտոնում»։ Խոսքը ֆրանսիացի պաշտպան Լուկա Դինի մասին է, ում տրանսֆերի դիմաց «Վիլլան» վճարեց 30 մլն եվրո։ 30 մլն․․․ նույնքան, որքան «Նյուքասլը» վճարել է նորզելանդացի «ռմբարկուի» համար․․․ Լավ, չշեղվենք, բայց ևս մեկ հետաքրքիր փաստ․ Դինը, ինչպես Կոուտինյուն, ևս ժամանակին հանդես է եկել «Բարսելոնայում»։ Ջերարդը հուսալի փոխարինող է գտել նաև դարպասպահ Մարտնեսին․ անգլիական ակումբը վարձակալել է «Ռոմայի» և Շվեդիայի հավաքականի դարպասապահ Ռոբին Օլսենին։
Վերջերս միջազգային մամուլում հաճախ նշվում է, որ Ջերարդի կոլեկտիվին ցանկանում է միանալ նաև Լուիս Սուարեսը, ով ևս ժամանակին հանդես է եկել Սթիվիի և Ֆելիպեի հետ «Լիվերպուլում»․․․ էհհհհ, նոստալգիա․․․
Լավ, հետ գանք Բրիտանիա, քանի որ այս պոտենցիալ տրանսֆերում ևս մեկ հետաքրքիր փաստ կա․ որտե՞ղ է խաղացել Սուարեսը․․․ այո՝ «Բարսելոնայում»։ Այն տպավորությունն է, որ Ջերարդը «կատալոնական ավազակախումբ է» հավաքում Բիրմինգհեմում․․․ Բացի այդ, ըստ լրագրող Նիկոլ Սկիրայի, «Ասթոն Վիլան» չի պատրաստվում բավարարվել այսքանով և պատրաստվում է ձեռք բերել նաև «Յուվենտուսի» ուրուգվայցի կիսապաշտպան Ռոդրիգո Բենտանկուրին։
Դե ինչ, կարծում եմ, առաջիկայում «Ասթոն Վիլլայի» երկրպագուների բանակը միայն կընդլայնվի, իսկ մրցակցային տեսանկյունից ԱՊԼ-ում ձևավորվում է նոր ուժ, որին գրանդները և մյուս ակումբները չպետք է թերագնահատեն․․․
Քրիստիան Էրիկսենը մոտ է ԱՊԼ վերադառնալուն․ միջազգային մամուլում նշվում է, որ մի քանի անգլիական ակումբներ դեմ չեն իրենց կազմում տեսնել ֆուտբոլիստին, սակայն սկանդինավցու տրանսֆերին առավել մոտ է ԱՊԼ-ի նորեկը՝ «Բրենտֆորդը»։ 29-ամյա դանիացի կիսապաշտպանը մանրամասն հետազոտության կենթարկվի նախքան անգլիական «Բրենտֆորդ» տեղափոխությունը: Այս մասին հայտնում է Sky Sports-ը: Առանցքային կլինի այն, որ անգլիական ֆուտբոլային միությունը կուսումնասիրի սրտաբանի եզրակացությունն ու դրան իր գնահատականը կտա նախքան ֆուտբոլիստի՝ «Բրենտֆորդ» տեղափոխությունը: Ընդ որում, տեղափոխությունից առաջ կատարվելիք բուժզննումն էլ շատ խորը բնույթ կկրի: Ավելի վաղ Միլանի «Ինտերը» երկկողմանի համաձայնությամբ խզել էր պայմանագիրը Էրիկսենի հետ, քանի որ տեղադրված սրտի դեֆիբրիլյատորի պատճառով ֆուտբոլիստին արգելված է խաղալ Իտալիայում։
«Մեղուներն» այս ձմեռ մեկ դանիացի ֆուտբոլիստ արդեն ձեռք են բերել․ թիմը «Միդտյուլանդից» («Բրենտֆորդի» դուստր ակումբն է) վարձակալել է դարպասապահ Յոնաս Լոսլին։ Ընդհանրապես, «Բրենտֆորդում» ավելի շատ դանիացի ֆուտբոլիստ կա (8 հոգի), քան անգլիացի (5 հոգի՝ չհաշված երկքաղաքացիություն ունեցող ֆուտբոլիստներին)։ Գլխավոր մարզիչ Թոմաս Ֆրանկը, ում հետ պայմանագիրն այսօր երկարաձգվեց, ևս դանիացի է։
Իսկ «Էվերտոնը» ոչ միայն ֆուտբոլիստներ է կորցնում այս ձմեռ, այլ նաև նոր խաղացողներ է ձեռք բերում։ Դինը, ում մասին խոսել ենք արդեն վերևում, խնդիրներ ուներ գլխավոր մարզիչ Բենիստեսի հետ, այդ իսկ պատճառով էլ հեռացավ «Ասթոն Վիլլա»։ Իսպանացի մասնագետը նրան շատ արագ փոխարինող գտավ՝ ի դեմս Կիևի «Դինամոյի» պաշտպան Վիտալի Միկոլենկոյի․ ուկրաինացու տեղափոխության համար լիվերպուլցիները վճարեցին մոտ 24 մլն եվրո։ Բայց ինքը՝ Բենիստեսը, օրեր անց ևս հեռացավ ակումբից, ավելի ճիշտ՝ հեռացվեց, և այստեղ հարց է առաջանում․ արդյո՞ք Դինը չպետք է մի փոքր սպասեր։ Արդյունքում, կոնֆլիկտի երկու կողմերն էլ այլևս «կապույտների» ճամբարում չեն․ ոչ Դինն է թիմում, ոչ էլ Բենիտեսը, փոխարենը կա 22-ամյա ուկրաինացի պաշտպանը, որն, ընդհանրապես, առաջին անգամ է խաղալու հայրենիքից դուրս։ Բրավո՜, «Էվերտոնի» ղեկավարություն, հիանալի քաղաքականություն։ Բայց պետք չէ ամեն ինչին նեգատիվ կոնտեքստով նայել, միգուցե թիմը նոր «զարգացման վեկտո՞ր» է որդեգրել՝ համալրել կազմը երիտասարդ, հեռանկարային ֆուտբոլիստներով։ Պաշտպանության ձախ եզրում արդեն ունեին Միկոլենկոյին, պետք էր թարմացնել նաև աջ եզրը։ Եվ այդ նպատակով «Ռեյնջերսից» ակումբը գնեց Նատհան Պատերսոնին։ 20-ամյա շոտլանդացու համար Ջերարդի նախկին ակումբը ստացավ 14 մլն եվրո, ինչը ռեկորդային գործարք է շոտլանդական ակումբի պատմության մեջ։ Բացի այդ, մերսիսայդյան ակումբը հայտարարել է «Ասթոն Վիլլայի» կիսապաշտպան Անվար Էլ-Գազիի հետ պայմանագիր կնքելու մասին։ 26-ամյա հոլանդացին նոր թիմին միացել է վարձավճարով մինչև մրցաշրջանի ավարտը։
Եթե «Բրենտֆորդը» ասոցացվում է Դանիայի հետ, ապա «Վուլվերհեմփթոնը»՝ Պորտուգալիայի։ Օրերս ակումբը հայտարարել է «Էստորիլի» վինգեր Շիկինյոյի հետ պայմանագիր կնքելու մասին: 21-ամյա պորտուգալացու հետ պայմանագիրը նախատեսված է մինչև 2026 թվականի ամառ։ Այժմ թիմն իր կազմում ունի պորտուգալական անձնագրով 11 ֆուտբոլիստ։ Կարելի է մինի Պորտուգալիայի հավաքական կազմել «գայլերից»։ Բայց սա պորտուգալական թիմի, սորրի՝ անգլիական թիմի միակ ձեռքբերումը չէ․ «Գրասհոպերի» հարձակվողական ոճի կիսապաշտպան Հայաո Կավաբեն կլինի առաջին ճապոնացին, ով կխաղա «Վուլվերհեմփթոնի» կազմում: 26-ամյա ճապոնացին երեքուկես տարվա պայմանագիր է կնքել, սակայն մինչև 2021/22 մրցաշրջանի ավարտը վարձավճարով կշարունակի հանդես գալ «Գրասհոպերի» կազմում։ Կավաբեն Ճապոնիայի հավաքականի կազմում անցկացրել է 4 հանդիպում (1 գոլ)։
Ասեցիր Ա, ասա նաև Բ․․․ քանի որ խոսեցինք ճապոնացիներից, նկատենք, որ վերջին տարիներին բրիտանական ակումբները էլ ավելի հաճախ են սկսել հետաքրքրություն ցուցաբերել «սամուրայների» նկատմամբ (Մինամինո, Տոմիյասու)։ Քանի որ այսօր դիտարկում ենք ոչ միայն անգլիական, այլ ընդհանրապես՝ բրիտանական տարնասֆերային շուկան, կցանկանայի ևս մեկ հետաքրքիր տրանսֆեր(ներ)ի անդրադառնալ․ Շոտլանդական «Սելթիկը» ձեռք է բերել Ճապոնիայի հավաքականի երեք ֆուտբոլիստի, հայտնում է ակումբի մամուլի ծառայությունը։ Պաշտպան Ռեո Հատատեի («Կավասակի») և կենտրոնական կիսապաշտպան Յոսուկե Իդեգուչիի («Գամբա Օսակա») համար Գլազգոն ներկայացնող ակումբը վճարել է մոտ 2,3 մլն եվրո, իսկ հարձակվողական ոճի կիսապաշտպան Դայզեն Մաեդային («Յոկոհամա») ձեռք է բերել վարձավճարով։ Նշենք, որ «Սելթիկի» կազմում արդեն իսկ հանդես էր գալիս ճապոնացի ևս մեկ ֆուտբոլիստ՝ հարձակվող Կյոգո Ֆուրուհաշին։ Ահա, այսպիսի ճապոնական միգրացիա։
«Ռեյնջերսը» դեռ աչքի չի ընկնում լուրջ ձեռքբերումներով․ նշանակալից համալրում կարելի է համարել միայն 21-ամյա ամերիկացի պաշտպան Ջեյմս Սանդսի վարձակալումը «Նյու Յորք Սիթիից»։ Եվ ևս մեկ տրանսֆեր, որին կարելի անդրադառնալ, դա հյուսիսիռլանդացի 34-ամյա հարձակվող Կայլ Լաֆերտիի վերադարձն է բրիտանական կղզիներ․ ֆուտբոլիստը ազատ գործակալի կարգավիճակով «Անորտոսիսից» տեղափոխվել է «Կիլամրնոկ»։
«Բրայթոնը» հայտարարել է «Պոգոնի» և Լեհաստանի հավաքականի ֆուտբոլիստ Կասպեր Կոզլովսկու հետ պայմանագիր կնքելու մասին. գործարքը կազմել է 11 մլն եվրո: 18-ամյա կիսապաշտպանի՝ անգլիական ակումբի հետ պայմանագիրը նախատեսված է մինչև 2026 թվականի ամառը: Հիշեցնենք, Կոզլովսկին դարձել է Եվրոպայի առաջնությունների պատմության ամենաերիտասարդ ֆուտբոլիստը, երբ 17 տարեկան և 246 օրական հասակում մասնակցել է Եվրո-2020-ի խաղին՝ Իսպանիայի դեմ: Սակայն տաղանդավոր ֆուտբոլիստը մրցաշրջանը կավարտի Բունդեսլիգայում․ «ճայերը» Կոզլովսկուն վարձավճարով գործուղել են Բեռլինի «Յունիոն»։
«Ուոթֆորդը» 5 մլն եվրոյով ձեռք է բերել նիգերիացի դարպասապահ Մադուկա Օկեյեյին «Սպարտա Ռոտերդամ», 4,7 մլն եվրոյով՝ կոնգոլեսցի կիսապաշտպան Էդո Կայեմբեին («Էուպեն») և աֆրիկյան շոփինգն ավարտել են իվուարցի պաշտպան Հասան Կամարայի տրանսֆերով («Նիցցա», 4 մլն եվրո), ինչպես նաև թիմը ձեռք է բերել կոլումբիացի 18-ամյա վինգեր Յասեր Ասպրիլլային («Էնվիգադո», 3 մլն եվրո)։ Այս տրանսֆերներից կարելի է եզրակացնել, որ թիմը համալրել է կազմը ոչ թե անհրաժեշտությունից ելնելով, այլ այս տրանսֆերները հեռանկարային բնույթ են կրում, չնայած, Կամարան և Կայեմբեն արդեն երկու հանդիպում անցկացրել են ԱՊԼ-ում։ Իսկ բրազիլացի Սամիրի («Ուդինեզե») տրանսֆերն այս ցուցակի մեջ չի մտնում․ 27-ամյա պաշտպանը բավականին փորձառու խաղացող է և նրա ձեռքբերումն արդեն «անհրաժեշտության բաժնից» է։
Անգլիական գրանդները ձմեռային տրանսֆերային պատուհանի ժամանակ առանձնապես աչքի չեն ընկնում խոշոր տրանսֆերներով։ «Մանչեսթեր Սիթին» կորցրել է Ֆերրան Տորեսին, ով տեղափոխվեց «Բարսելոնա», և այժմ չեն էլ շտապում լրացնել այդ բացը, քանի որ կորուստն, անկեղծ ասած, այդքան էլ շոշափելի չէ։ Փոխարենը, թիմը շարունակում է փնտրել կոնտրոնական հարձակվողի, և այդ թեմայով լուրերի մեծ մասը կապված է Էրլինգ Հոլանդի անվան հետ․․․ բայց, նման տրանսֆեր այս ձմեռ դժվար թե տեսնենք։ Բացի այդ, Հոլանդի անունը կապվում է ոչ միայն Գվարդիոլայի թիմի հետ․ նորվեգացի ֆուտբոլիստի ծառայություններով հետաքրքրված է ամեն երկրորդ թոփ ակումբը։ Մանչեսթերյան մյուս ակումբում՝ «Մանչեսթեր Յունայթեդում», ևս դեռ նորեկներ չկան, նույնը նաև վերաբերվում է «Լիվերպուլին», «Արսենալին» և «Տոտենհեմին», չնայած վերջինս կարող է կորցնել Տանգ Նդոմբելեին, ով մոտ է ՊՍԺ տեղափոխվելուն։ Իսկ լոնդոնյան մյուս թիմն արդեն կորուստներ ունի, բայց ոչ շատ նշանակալից․ «Արսենալի» ֆուտբոլիստներ Միթլենդ-Նայլսը և Պաբլո Մարին վարձավճարով տեղափոխվել են Ա Սերիա՝ «Ռոմա» և «Ուդինեզե» համապատասխանաբար։ «Դերբի Քաունթիի» 18-ամյա ձախ պաշտպան Դիլան Ուիլյամսը տեղափոխվել է Լոնդոնի «Չելսի»։ Ուիլյամսը «Դերբիի» սան է և անցած տարվա ամռանն է տեղափոխվել հիմնական թիմ: Հասկանալի է, որ այս տրանսֆերը միտված է ոչ թե Տուխելի հիմնական կազմն ուժեղացնելուն, այլ, ինչպես «Ուոթֆորդի» դեպքում, ավելի շատ հեռանկարային բնույթ է կրում։ «Արիստոկրատները» վարձակալությունից վերադարձրել են նաև բրազիլացի կիսապաշտպան Քենեդիին։
Ինչպես վերևում արդեն նշեցինք, առաջիկա օրերը պետք է հագեցած լինեն ավելի ակտիվ տրանսֆերային անցուդարձով, նամանավանդ՝ տրանսֆերային պատուհանի վերջին օրը, այնպես որ, մեզ սպասվում է հետաքրքիր, ինչու և ոչ՝ անակնկալներով լի շաբաթ․․․ Առողջ եղեք, մինչ հանդիպում․․․
Վար Բաբայան
Կարդացեք նաև՝ Տրանսֆերային անցուդարձ N1․ Մերոնք՝ Արևելյան Եվրոպայում, ինչ փոփոխություններ կան հայկական ակումբներում
