Հայաստանի ըմբշամարտի հավաքականն ավարտեց ելույթները Տոկիոյի ամառային Օլիմպիական խաղերում․ մեր վերջին ըմբիշը՝ ազատ ոճային Վազգեն Թևանյանը պայքարի դուրս եկավ այսօր՝ օգոստոսի 6-ին, սակայն ցավալի պարտություն կրեց մեկնարկում՝ Ռուսաստանի Օլիմպիական կոմիտեի ներկայացուցիչ Հաջիմուրադ Ռաշիդովից։
Ընդհանուր առմամբ, Հայաստանը 6 ըմբիշով էր ներկայացված 32-րդ ամառային խաղերում․ Հայաստանի մարզական պատիվը պաշտպանեցին հունահռոմեական ըմբիշներ Արթուր Ալեքսանյանը, Կարապետ Չալյանը, Կարեն Ասլանյանն ու Արմեն Մելիքյանը, ինչպես նաև ազատ ոճայիններ Արսեն Հարությունյանն ու Վազգեն Թևանյանը։
ArmSport-ն ամփոփում է հայ ըմբիշների օլիմպիական ելույթները
Օլիմպիական խաղերի եռակի մեդալակիր Արթուր Ալեքսանյանը
Մեր լեգենդար ըմբիշը, թեև վնասվածքով, բայց չհրաժարվեց եզրափակիչ գոտեմարտից, ընդհակառակը չհանձնվեց, պայքարեց, ցավոք՝ ձախ ոտքի մկանային վնասվածքն, ամեն դեպքում, իրեն զգացնել տվեց։
Կողմնակալ մրցավարությունն էլ դրեց մեր մեդալային «ոսկյա» հույսերի վերջակետը։
Արդյունքում, Ալեքսանյանին չհաջողվեց հռչակվել օլիմպիական կրկնակի չեմպիոն, փոխարենը հաջողվեց լրացնել օլիմպիական մեդալների հավաքածուի բացը․ «Սպիտակ արջը» մինչ այս նվաճել էր օլիմպիական խաղերի ոսկե և բրոնզե մեդալները, Տոկիոյում էլ նվաճեց արծաթը։
Եզրափակիչ գոտեմարտի ավարտից հետո Ալեքսանյանը ցուցադրաբար ծափահարեց մրցավարներին՝ արտահայտելով իր դժգոհությունը նրանց կատարած աշխատանքից։
«Հաղթելու համար պետք է լինել Ռուսաստանից»,— գոտեմարտից հետո ասաց Ալեքսանյանը՝ լրագրողների համար նախատեսված խառը գոտով անցնելիս։ Ալեքսանյանի այս խոսքերը բավականին մեծ արձագանք ստացան ռուսական մամուլում։
«Շատ բան կա ասելու, բայց ոչ հիմա: Ունենք այն, ինչ ունենք: Վնասվածքով , թե առանց վնասվածք միշտ պատրաստ եմ իմ ԵՐԿՐԻ համար պայքարել: Շնորհակալ եմ ձեզ շնորհավորանքների համար: Ամեն վայրկյան զգացել եմ ձեր աջակցությունը»,- ավելի ուշ գրեց Արթուր Ալեքսանյանը սոց․ցանցի իր էջերում։
View this post on Instagram
Ամեն դեպքում, 12 տարի շարունակ 29-ամյա ըմբիշն իր քաշային կարգում մոլորակի ուժեղագույն ըմբիշների թվում է, ու հուսանք՝ ամեն ինչ դեռ առջևում է։
Օլիմպիական առաջին փորձը
Մրցավարական կողմնակալ վերաբերմունքի «զոհը» դարձավ նաև հունահռոմեական մեր մյուս ըմբիշ, 26-ամյա Կարեն Ասլանյանը։
Առաջին գոտեմարտում նա հաղթեց հունգարացի ուժեղ մրցակցին: Իսկ ահա քառորդ եզրափակչում Ասլանյանի մրցակիցը Մ23 տարեկանների չեմպիոն, եգիպտացի Մոհամադ Էլսայեդին էր։ ՀԱՕԿ-ի պաշտոնական կայքի մեկնաբանությամբ՝ «Ասլանյանը գործում էր վստահ, անկաշկանդ, գլխավորում էր հաշիվը: Այն էլ ասենք, որ մրցապայքարին անհիմն միջամտություններով երբեմն խանգարում էր մրցավարը, որը , չգիտես ինչու, նաև նկատողություն տվեց Կարենին: Բայց մեր ըմբիշը վերջինը հաղթական միավորներ շահեց, հավասարեցրեց հաշիվը / 7 : 7 / և հաղթելու փոխարեն . . . պարտվեց:
Գոտեմարտի ընթացքի և գրանցված արդյունքի մասին խիստ դժգոհել է հայաստանցու անձնական մարզիչ, հավաքականի մարզիչ Սամվել Գևորգյանը: Նա հայտարարել է, որ նույն մրցակցի հետ պայքարում երկրորդ անգամ են մրցավարները Կարենից գողանում, խլում հաղթանակը»,- գրում է օլիմպիական կոմիտեի պաշտոնական կայքը։
Նշենք՝ սա Կարեն Ասլանյանի առաջին մասնակցությունն էր քառամյակի գլխավոր մարզական Խաղերին։ Ասլանյանը Եվրոպայի պատանիների և աշխարհի ու Եվրոպայի երիտասարդների հաղթող է, բանակային մարզիկների աշխարհի չեմպիոն, Եվրոպայի մեծահասակների չեմպիոն և մրցանակակիր:
Իր առաջին Օլիմպիական խաղերին էր մասնակցում նաև 25-ամյա ըմբիշ Արմեն Մելիքյանը։ Մելիքյանը Մ23 տարեկանների աշխարհի չեմպիոն է, 2013 թվականի պատանիների Եվրոպայի չեմպիոն։
Մելիքյանը, որը հանդես է գալիս 60 կգ քաշային կարգում, մեկնարկում հաղթել էր իրանցի Ալի Ռեզա Նեջաթիին, (5:5), իսկ երկրորդ գոտեմարտում 4:8 հաշվով պարտվել էր 31-ամյա ուկրաինացի ըմբիշ Լենուր Տիմուրովին և լքել պայքարը։
Անհաջող ստացվեց նաև գյումրեցի ըմբիշ Կարապետ Չալյանի ելույթն Օլիմպիական խաղերում․ Չալյանը անչափ ցավալի պարտություն կրեց բրոնզե մեդալի համար գոտեմարտում՝ զիջելով Ադրբեջանի ներկայացուցչին։ Իր առաջին ու երկար սպասված Օլիմպիական խաղերում Կարապետը բավարարվեց միայն 5-րդ տեղով։
Բրոնզե մեդալի համար գոտեմարտում 77 կգ քաշային կարգում Հայաստանի ներկայացուցիչ Կարապետ Չալյանը մրցակցեց ադրբեջանցի Ռաֆիգ Հուսեյնովի հետ: Գոտեմարտի ավարտից մեկ րոպե առաջ, 1-1 հաշվի պայմաններում, մրցավարները գլխով վտանգավոր շարժում նկատեցին հայ ըմբիշի մոտ, զգուշացրին նրան ու երկու միավոր տվեցին Հուսեյնովին: Հայ մարզիչների անհաջող բողոքարկումից հետո հաշիվը դարձավ 1-4 և գոտեմարտն այդպես էլ ավարտվեց։
Չալյանը Եվրոպայի պատանիների երկրորդ մրցանակակիր է, աշխարհի երիտասարդների չեմպիոն, Եվրոպայի բրոնզե մեդալակիր, Եվրոպայի մարզական երկրորդ խաղերի փոխչեմպիոն:
Ազատ ոճայինների անհաջող մեկնարկը Օլիմպիական խաղերում
Ազատ ոճայինները Տոկիոյի ամառային օլիմպիական խաղերում ներկայացված էին երկու ըմբիշով. երիտասարդ ու տաղանդավոր ըմբիշները՝ Արսեն Հարությունյանն ու Վազգեն Թևանյանը իրենց առաջին Օլիմպիական խաղերին էին մասնակցում, սակայն ցավոք, հենց մեկնարկում պարտություն կրեցին ու զրկվեցին մեդալային հույսերից:
57 կգ քաշային կարգի ներկայացուցիչ մեր Արսեն Հարությունյանը մեկնարկային գոտեմարտը տանուլ տվեց մոնղոլ Բեկբայար Էրդենեբաթին:
Հարությունյանը Եվրոպայի պատանիների, երիտասարդների և մեծահասակների չեմպիոն է, աշխարհի երիտասարդների բրոնզե մեդալակիր և գավաթի անհատական խաղարկության երկրորդ մրցանակակիր:
Իսկ 65 կգ քաշայինների պայքարում 21-ամյա Վազգեն Թևանյանը պայքարը սկսեց 1/8 եզրափակիչից, որտեղ 0:6 հաշվով պարտվեց աշխարհի գործող չեմպիոն (2019թ.) ու կրկնակի փոխչեմպիոն (2017, 2018), Եվրոպայի կրկնակի չեմպիոն (2016, 2018), Ռուսաստանի ներկայացուցիչ Հաջիմուրադ Ռաշիդովին:
Թևանյանը Եվրոպայի պատանիների, երիտասարդների և մինչև 23 տարեկանների չեմպիոն է, աշխարհի երիտասարդների բրոնզե մրցանակակիր, աշխարհի գավաթի անհատական խաղարկության չեմպիոն:
Վստահ ենք՝ ազատ ոճային ըմբշամարտի ապագան ևս վստահելի ձեռքբերում է ու մեր երիտասարդ մարզիկները դեռ իրենց խոսքը կասեն քառամյակի գլխավոր ստուգատեսում:
World champ Gadzhimurad RASHIDOV #ROC eased his way to a 6-0 win over Vazgen TEVANYAN 🇦🇲 and will wrestle two-time world medalist Magomedmurad GADZHIEV 🇵🇱 next. #WrestleTokyo pic.twitter.com/HHW2yQdVHZ
— United World Wrestling (@wrestling) August 6, 2021
