Ալեքսանդր Գրիգորյան․ Շատ լավ ուսումնասիրել ենք մրցակցին ու գտել ենք հակախաղը

Չեմպիոնների լիգայի որակավորման առաջին փուլի պատասխան խաղում վաղը Հայաստանի չեմպիոն «Ալաշկերտը» «Հանրապետական» մարզադաշտում կընդունի Ուելսի չեմպիոն «Կոնաս Կի Նոմադսին»։ Կայանալիք հանդիպումից առաջ տեղի ունեցած մամուլի ասուլիսի ժամանակ մեր թիմի գլխավոր մարզիչ Ալեքսանդր Գրիգորյանը պատասխանել է լրագրողների հարցերին։

-Մրցակիցը սպեցիֆիկ խաղաոճ ունի՝ երկար փոխանցումներով է խաղում։ Որքանո՞վ է դժվար նման խաղաոճ ունեցող թիմի դեմ խաղալը։

-Հարցը տեղին է, որովհետև եթե նայենք՝ ինչպես է խաղացել այդ թիմն իրենց առաջնությունում, նույն խնդիրը նկատելի էր։ Իրենց երկրորդ ու երրորդ տեղի թիմերն այս թիմի հետ խաղում տարածքային առավելություն էին ունենում, բայց փաստը մնում է փաստ, որ հենց այդ խաղաոճի շնորհիվ նրանք իրենց առաջնությունը հաղթել են։

-Իսկ եթե վաղը ևս նույն խաղը կիրառի, հակախաղ ունե՞ք։

-Իհարկե, նման թիմերի դեմ, որոնք ստանդարտներն օգտագործում են ու երկրորդ հարկում լավ են խաղում, հակախաղ կա՝ պիտի ավելի շատ տիրել գնդակին։ Դա մեր խաղային ծրագրերից միայն մեկն է։ Մենք տարբեր խաղային ծրագրեր ունենք։ Շատ լավ ուսումնասիրել ենք մրցակցին ու գտել ենք հակախաղը և լիովին պատրաստ ենք հանդիպմանը։ Ամեն ինչ կանենք, որ վաղը այդ ամենը ցուցադրենք խաղադաշտում։

-Գտե՞լ եք այդ թիմում թույլ կողմեր, որտեղ «Ալաշկերտը» կարող է հաջողության հասնել։

Իհարկե, ցանկացած թիմ ունի խոցելի տեղեր, չէի ասի թույլ, խոցելի։ Մենք գտել ենք դրանք ու օգտագործել նաև առաջին խաղում, իսկ Երևանում կփորձենք ավելի շատ օգտագործել դրանք։

-Վերջերս եք ընդունել «Ալաշկերտը»։ Կցանկանայի իմանալ Ձեր և ֆուտբոլիստների հարաբերությունների մասին։

-Հաշվի առնելով այն վերջնամասը, որ ունեցա թիմի հետ ու կարողացանք 3 հաղթանակ տանել ու դառնալ չեմպիոն՝ կարելի է ենթադրել, որ լավ հարաբերություններ ունենք, հակառակ դեպքում չէր ստացվի հաջողության հասնել։

-Ձեր կարծիքը նորեկների՝ հատկապես Էմբալոյի ու Խուրցիձեի մասին։ Տպավորություն կա, որ լավ են ադապտացվել թիմին, ինչպե՞ս ստացվեց նրանց ձեռք բերելը, արդյոք Ձեր ցանկությունը կա՞ր հենց այդ ֆուտբոլիստներին գնելու հարցում։

-Եթե խոսենք Խուրցիձեի ու Սանթոսի մասին, ես եմ նրանց թեկնածությունն առաջարկել նախագահին ու որոշել ենք ձեռք բերել նրանց։ Դեռ երկար ժամանակ չի անցել, բայց կարող եմ ասել, որ հաջող ձեռքբերումներ են։  Էմբալոն քիչ է խաղացել՝ 55 րոպե մասնակցեց պաշտոնական խաղին, բայց դա էլ բավական էր հասկանալու համար, որ նա ձեռքբերում է մեր թիմի համար։

-ՈՒԵՖԱ-ի նոր որոշմամբ մրցակցի հարկի տակ խփած գնդակն առավելություն չի տալիս։ Ձեր կարծիքն ինչպիսի՞ն է այդ հարցի վերաբերյալ։

-Արդարացի որոշում է։

-Նախորդ մարզչական շտաբի օրոք հստակ դիրքորոշում կար՝ մի խաղ Չանչարևիչն էր խաղում, մի խաղ՝ Յուրչենկոն։ Հիմա ի՞նչ որոշում կա դրա հետ կապված։

-Չեմ թաքցնի, «Ալաշկերտը» սպեցիֆիկ ակումբ է ու այստեղ շատ բան որոշում է ակումբի սեփականատերը։ Ես մի մարզիչ եմ, որն իր կարիերայի ընթացքում շատ իրավիճակներ են եղել, որտեղ ես ինքս եմ բացարձակ ամեն ինչ որոշել։ Իմ պրակտիկայում հիշում եմ, որ այնտեղ, որտեղ ամեն ինչ ես եմ որոշել, միշտ չէ, որ արդյունք է եղել։ Հիշում եմ նաև իրավիճակներ, որ որոշումներն ընդհանուր են կայացվել ու հաջողվել է շատ լուրջ արդյունքների հասնել։ Այդ պատճառով ես դրան վերաբերվում եմ այնպես, ինչպես որոշել են մինչ իմ՝ թիմ գալը։ Դա ակումբի դիրքորոշումն է, որը եղել է մինչև իմ գալը։ Կարծում եմ՝ դա արդարացի դիրքորոշում է, որովհետև Դավիդ Յուրչենկոն ազգային հավաքականի դարպասապահն է, անխոս, դա մեզ համար շատ կարևոր է, բայց Չանչարևիչը դարպասապահ է, որը շատ երկար ժամանակ հանդես է գալիս «Ալաշկերտում» ու թիմի համար շատ բան է արել։ Դրա համար կարծում եմ՝ այս իրավիճակում այսպիսի բաժանումն արդարացի է։