2020-ը մեկնարկեց քաղաքական ու բնապահպանական բուռն իրադարձություններով։ Մինչդեռ ԱՄՆ-Իրան հարաբերություններում սրացում էր, մոլորակի ամենազարմանահրաշ վայրերից մեկում՝ Ավստրալիայում այրվում էին անտառներ, ոչնչանում էին կենդանիներ։
Աղետը ողջ աշխարհի ուշադրությունը սևեռեց կանաչ մայրցամաքի վրա։ Այնտեղ հիմա էլ հրդեհները շարունակվում են։ Բազմաթիվ բարեգործություններ, ակցիաներ․․․այս ամենը մեկ բանի համար․ փրկե՜լ Ավստրալիան։
Մարզական աշխարհի սիրահարները համակ ուշադրությամբ էին հետևում Ավստրալիայում ծավալվող իրադարձություններին։ Հունվարին մարզական աշխարհի թենիսային ռադարները ուղղվում են հենց Ավստրալիայի վրա, բայց առաջին օրերին ամեն ինչ մշուշոտ էր թվում։
Ողջու՜յն։ Այս երկարաշունչ նախաբանով սկսում ենք խոսել հունվարի 20-ից փետրվարի 2-ը Ավստրալիայի Մելբուրն քաղաքում կայանալիք Մեծ սաղավարտի տարվա առաջին մրցաշարի՝ Ավստրալիայի բաց առաջնության մասին։
Ինչու՞ այսքան երկար խոսել բնապահպանական խնդիրներից, երբ հոդվածը թենիսի մասին է։ Այս հարցը, որը գուցե շատերիդ մոտ է առաջացել, պարզ պատասխան ունի։ Ավստրալիայում ծավալված խնդիրները ուղիղ համեմատական են Ավստրալիայի բաց առաջնության հետ, քանզի օդի աղտոտվածության տարրեր առկա են նաև Մելբուրնում։
Սկսենք նրանից, որ թենիսի Ավստրալիայի բաց առաջնության հանդիպումների մեծ մասը կայանալու են փակ կորտերում։ Սա, միանշանակ, փոխում է ուժերի հարաբերակցությունը, քանի որ տուրում կան տղաներ ու աղջիկներ, ովքեր ավելի լավ են խաղում փակ կորտում, կամ հակառակը՝ վատ են խաղում։
Եղանակային պայմանների հնարավոր վնասները
Մինչ Մելբուրն ժամանելը աշխարհի ուժեղագույն թենիսիստները եղան ավստրալական երեք քաղաքներում՝ Պերթում, Բրիսբենում և Սիդնեյում։ Այս երեք քաղաքներում անցկացվում էր ATP Cup-ը։ Օդի աղտոտվածությունից ու ծանրությունից բողոքեց Նովակ Ջոկովիչը։ Թենիսի սիրահարները գիտեն, որ սերբը ամենահարմարվողներից ու քիչ բողոքողներից մեկն է տուրում։
Եթե խնդիրների մասին բարձրաձայնում է Նովակը, ուրեմն դրանք հաստատ առկա են։ Պարանորմալ եղանակային պայմանները թենիսում չեն խնայել և ոչ մեկի։ Այնպես որ, բացառված չէ, որ ֆավորիտները լուրջ խնդիրներ կունենան ոչ միայն մրցակցի արգելքը հաղթահարելու այլ նաև եղանակային պայմանների դեմ պայքարելու ժամանակ։
Տղամարդկանց մենախաղ, մարզավիճակներ, ֆավորիտներ․․․
Մեծ եռյակ։ Դե նրանք միշտ կան։ Ինչպես նոյեմբերին ասաց Ջոկովիչը․ «Կամ մենք երեքս միասին կանգ կառնենք, կամ մեզնից ոչ ոք կանգ չի առնի»։ Ռաֆայել Նադալի ու Նովակ Ջոկովիչի մարզավիճակի մասին կարող ենք խոսել, քանի որ տեսել ենք նրանց խաղը ATP Cup-ում։ Ջոկովիչը գերազանց վիճակում է։ 8 խաղ, 8 հաղթանակ։ Ինչ վերաբերում է Նադալին, ապա իսպանացին լավագույն վիճակում չէր ATP Cup-ում։ Ռաֆան պարտվեց Գոֆենին ու Ջոկովիչին, դժվարությամբ հաղթեց դե Միանուրին։
Ռոջեր Ֆեդերերը մրցաշրջանը սկսում է Australian Open-ով։ Ոչ մի պաշտոնական խաղի շվեյցարացին չի մասնակցել այս տարի։ Հիմնականում Ռոջերը վերջին տարիներին այսպես է վարվում։ 2017-ն ու 2018-ը հաջող են եղել Ֆեդերերի համար Մելբուրնում։
2019-ին նա անակնկալ կերպով պարտվեց Ստեֆանոս Ցիցիպասին։ Դժվար է ասել, թե ինչ վիճակում է մոտենում մրցաշարին շվեյցարացի մաեստրոն, սակայն մեկ բան ակնհայտ է․ Ավստրալիան Ֆեդերերի ամենասիրելի վայրերից մեկն է խաղալու տեսանկյունից, այստեղի լսարանը նրան շա՜տ է սիրում։
NewGen-ը գործի կանցնի՞
Թենիսի նոր սերնդի՝ Մեծ սաղավարտերում հաջող ելույթների մասին խոսելը նման է ռուս արտիստների երևանյան համերգներին։ Խոսում են, խոսում են, բայց նրանք այդպես էլ չեն գալիս։
Այո՛, Դանիլ Մեդվեդևը չքնաղ տեսք ուներ US Open-2019-ում, ուր հասավ մինչև եզրափակիչ ու քիչ էր մնում հաղթեր Նադալին։ Այո՛, Ցիցիպասը հաղթեց ամփոփիչ մրցաշարում, անցած տարի էլ Մելբուրնում հասել էր կիսաեզրափակիչ։ Այո՛, լավն է Տիմը, այո՛, լավն է Բերետինին, բայց հաղթանակը Major-ում դեռ չկա։ Վերջին 12 Grand Slam-երը հաղթել են կամ Ջոկովիչը, կամ Ֆեդերերը, կամ Նադալը։
Այս մրցաշարում սպասելիքները մեծ չեն Ալեքսանդր Զվերևից։ Գերմանացին նոր է ենթարկվել աչքի վիրահատության ու, կարծես, լիովին չի ապաքինվել։ Սպասելիքները մեծ են Դանիլ Մեդվեդևից ու Ստեֆանոս Ցիցիպասից։ Կարելի էր խոսել նաև Ալեքս դե Մինաուրի մասին, ով փայլում էր ATP Cup-ում, սակայն, ցավոք, նա վնասվածքի պատճառով չի մասնակցի իր երկրում անցկացվելիք մրցաշարին։ Պոտենցիալ ունեն նաև Դենիս Շապովալովը, Մատեո Բերետինին, Ֆելիքս-Օժե Ալյասիմը։ Դոմինիկ Տիմին NewGen-ի մեջ ներառելը սխալ է։ Բայց նրա հաջողությանը ևս մարդիկ շատ երկար են սպասում։ ATP Cup-ում նա լավ տեսք չուներ, բայց չմոռանանք, որ սա մրցաշրջանի մեկնարկն է, ու տղաները նոր են մարզավիճակ հավաքում։
Oh no, Here we go again!
Ու նորից․․․արդեն քանիերորդ անգամ մարդիկ, երկրպագուները, թենիսիստներն ու կազմակերպիչները շունչները պահած սպասում էին վիճակահանությանը, որը կայացավ հինգշաբթի։ Վերջին տարիներին տղամարդկանց մենախաղում (անդրադառնալու ենք նաև կանանց, համբերե՛ք ։) ), երբ մեծ եռյակում այս աստիճանի հավասարություն է, մարդկանց մեկ հարց է տանջում․ ո՞ր երկուսն են իրար հետ նույն ցանցում։
Առաջին շրջանի համար բավականին թարմ մրցակիցներ են ստացել նույն ցանցում հայտնված Նովակ Ջոկովիչն ու Ռոջեր Ֆեդերերը։ Սերբ թենիսիստը մրցելու է Յան-Լենար Շտրուֆի հետ։ Ֆեդերերի մրցակիցը ամերիկացի Սթիվ Ջոնսոնն է։ Ռոջերը քառորդ եզրափակչում կարող է հանդիպել Բերետինիին, մինչ այդ նրա ճանապարհին կարող են հայտնվել Շապովալովը կամ էլ Դիմիտրովը։ Համաձայնվե՛ք, հեշտ չէ։ Ջոկովիչի հավանական մրցակիցը քառորդ եզրափակչում Ցիցիպասն է։ Նադալի ցանցը ավելի բարդ է։ Կարեն Խաչանով, Դոմինիկ Տիմ, Դանիլ Մեդվեդև։ Ահա՜ Նադալի հավանական մրցակիցները։
Տղամարդկանց մենախաղի վիճակահանության ամբողջական ցանցը՝ այստեղ
Դրամատիկ է լինելու կանանց պայքարում
2018 թվականի Ավստրալիայի բաց առաջնության չեմպիոնուհի Կարոլին Վոզնյացկին մոտ մեկ ամիս առաջ հայտարարեց, որ Մելբուրնում ավարտելու է կարիերան։ Որոշումը ընդունվեց մեծ ցավով թենիսի երկրպագուների կողմից, բայց ի՞նչ անես, այդպես է որոշել Կարոլինը։ Ինչու՞ հենց Մելբուրն․ քանի որ այստեղ էր Վոզնյացկու կարիերայի ամենատրիումֆատիկ երեկոն՝ երկու տարի առաջ Հալեպի հետ եզրափակչում։
Գլխավոր ֆավորիտներից մեկը՝ US Open-2019-ի չեմպիոնուհի Բիանկա Անդրեեսկուն վնասվածքի պատճառով չի մասնակցի մրցաշարին։ Սա լուրջ կորուստ է թենիսի սիրահարների համար։ Ֆավորիտների թվում կարելի է առանձնացնել մրցաշարի գործող չեմպիոնին՝ Նաոմի Օսակային։ Ճապոնացին նախորդ մրցաշրջանի վերջնամասում որոշակի անկում ունեցավ, բայց նորում միգուցե տեսնենք նախորդ տարվա AO-ի Օսակային։ Իհարկե, չի կարելի մոռանալ Էշլի Բարտիի, Սիմոնա Հալեպի, Սերենա Ուիլյամսի, Էլինա Սվիտոլինայի մասին։ Հիշե՛ք այս անունները։
AO-ին մասնակցելու է նաև Մարգարիտա Գասպարյանը։ Հայկական արմատներով ռուս թենիսիստուհուն առաջին հերթին մաղթենք, որ նա առանց վնասվածքների կավարտի մրցաշարը։ Մարգարիտայի դեպքում դա շատ հազվադեպ է լինում։ Տաղանդաշատ թենիսիստուհուն վնասվածքներն են հենց, որ խանգարում են լավ արդյունքներ գրանցել։ Մագան իր մարզական բնավորությամբ կռվող տեսակ է։
Առաջին շրջանում նրա մրցակիցը Մարիա Սակարին է Հունաստանից։ Թեպետ վարկանիշային աղյուսակում Սակարիի դիրքերը ավելի լավն են (22-րդը), այնուամենայնիվ Գասպարյանը ի զորու է հաղթել այս կարգի խաղացողների։
Կանանց մենախաղի վիճակահանության ամբողջական ցանցը՝ այստեղ
Երջանկության կղզյակ կանաչ մայրցամաքում․ Մելբու՛րն, դու պատրա՞ստ ես
Եվ վերջում գանք սկզբին։ Օրեր առաջ՝ հունվարի 15-ին, «Ռոդ Լեյվեր» արենայում անցկացվեց բարեգործական հանդիպում, որի արդյունքում Ավստրալիայի հրդեհների մարման աշխատանքների համար հավաքվեց 4,826,014 դոլլար։ Ինչպես ասաց Ռոջեր Ֆեդերերը․«Ես ուրախ եմ, որ օգնել եմ Ավստրալիային, բայց ուրախ չեմ, որ նման օգնության կարիք է առաջացել»։
Եվ իսկապես․ թենիսիստների գլխավոր ասելիքը բարեգոծությունից զատ այդ օրը կայանում էր նրանում, որ Ավստրալիան շարունակում է մնալ մի երկիր, որտեղ կարելի է այցելել ու լավ ժամանակ անցկացնել․․․
Ու ակնհայտ է, որ այս ամիսների ընթացքում բարդ էր Ավստրալիայում գտնել մի կետ, որտեղից երջանկության, դրական ու բացասական էմոցիաների չափաբաժիններ կարտանետվեն․․․Այդ կղզյակը հիմա, առանց տարակուսանքի, Մելբուրն է։ Այնտեղ երկու շաբաթ շատ լավ է լինելու։
Սպորտային ամենահայտնի հեռուստաընկերություններից մեկը արդեն մեկ տարի է որդեգրել է մի քաղաքականություն՝ Մեծ սաղավարտի մրցաշարերը անվանելով թենիսային խելագարություն։ Բաց մի՛ թողեք թենիսային խելագարությունը Մելբուրն պարկից։
Ու վերջում դարձյալ զուգահեռներ թենիսի ու կյանքի միջև․ ինչպես ասել է ավստրալացի լեգենդար թենիսիստ Ռոդ Լեյվերը, ում անունով էլ հենց կոչվում է Մելբուրն պարկի գլխավոր կորտը․
«Հաջորդ միավորը․ ահա թե ինչի մասին դու պետք է միայն մտածես»։
Արամ Սահակյան
