Նախկին «Միկա» մարզահամալիրի խաղադահլիճում երեկ իսկական տոն էր կազմակերպվել բասկետբոլի հայ երկրպագուների համար: Ընթանում էր VBET Ա-Լիգայի եզրափակիչ դիմակայության 5-րդ խաղը, որում «Վահագնի Սիթին» դիտարժան պայքարում 87։80 հաշվով առավելության հասավ «Դվինի» նկատմամբ՝ դիմակայության ընդհանուր հաշիվը դարձնելով 5:2 ու դառնալով ընթացիկ մրցաշրջանի չեմպիոն:
ArmSport-ը պատմում է եզրափակիչ դիմակայության ու «Վահագնի Սիթիի» չեմպիոնության մասին.
Հենց սկզբից բոլորը մտածում էին, որ չեմպիոն է դառնալու «Վահագնի Սիթին»
Ա լիգայի նախագահ Արա Պողոսյանը կտրված ձայնով պատասխանեց լրագրողների հարցերին, ասում է՝ ինքն էլ է երկրպագել, բայց՝ երկու թիմերին.
«Ես այն մարդն եմ, որ երկրպագում էի երկու թիմերին էլ: Ցանկանում էի գեղեցիկ բասկետբոլ դիտել, հենց այդպիսի բասկետբոլ էլ տեսանք: Պարզ է՝ թիմերը շատ հոգնած էին, շատ խաղեր էին անցկացրել, որոնք ի դեպ շատ հետաքրքիր էին: Եթե այսօր «Դվինը» հաղթեր, ոչ մեկ չէր զարմանա, քանի որ չնայած նրան, որ «Դվինը» սահմանափակ ռեսուրսներով թիմ ստեղծեց, բայց իրենց անձնուրաց խաղի ու մարզչական լավ աշխատանքի շնորհիվ կարողացան հասնել մինչև եզրափակիչ՝ պայքարից դուրս թողնելով այնպիսի ուժեղ թիմի, ինչպիսին էր «Մեդ Ֆոքսիսը», ու ամեն խաղում պայքարել հաղթանակի համար»:
Ա լիգայի նախագահի խոսքով, առաջնության հենց սկզբից բոլորը կարծում էին, որ հենց «Վահագնի Սիթին» է նվաճելու չեմպիոնությունը, ինքն, այդուհանդերձ, չի սիրում կանխատեսումներով զբաղվել.
«Կանոնավոր առաջնության հենց սկզբից էլ բոլորը մտածում էին, որ «Վահագնի Սիթին» չեմպիոն է դառնալու, այդպես էլ ստացվեց: Բայց ես այդպիսի կանխատեսումներ չէի անում, քանի որ ինչպես տեսաք՝ շատ ուժեղ պայքար էր ընթանում, ու Գավաթի խաղում «Վահագնին» պարտվեց «Մեդ Ֆոքսիսին»: Մենք ունեցանք շատ հետաքրքիր առաջնություն, բոլոր թիմերը պայքարում էին ամեն խաղում ու փորձում էին հաղթել, անչափ հետաքրքիր խաղեր կայացան: Անցած տարի նման պայքար չգնաց, մենք ընդհատվեցինք կորոնավիրուսի պատճառով: Երկու թիմեր ուժեղ էին, մնացածը ոչ այնքան, իսկ այս առաջնությունում «Վահագնի Սիթին» կարող էր պարտվել «Սուպերսոնիքսին» կամ նույն «Դվինին» ցանկացած խաղում»:
Արա Պողոսյանն ուրախ է, քանի որ ինչպես ինքն է նշում, կարողացանք բավականին որակյալ առաջնություն ունենալ.
«Շատ ուրախ եմ, շատ որակով առաջնություն ունեցանք, ու կարծում եմ՝ մեր երկրպագուներն էլ դա գնահատեցին: Մեծ թվով երկրպագուներ ներկա եղան խաղերին, այսօր ևս»:
Ա-լիգայի լավագույն հայ բասկետբոլիստ Թադե Քեշիշյանի կարիերայի առաջին չեմպիոնությունը
Ամերիկահայ բասկետբոլիստ Թադե Քեշիշյանի համար այս չեմպիոնությունն առաջինն է պրոֆեսիոնալ կարիերայի ընթացքում: Ասում է՝ եզրափակիչ շարքի խաղերին մասնակցել է սաստիկ հարբուխով, բայց ուրախ է թիմի ու անձամբ իր նպատակին հասնելու համար.
«Պրոֆեսիոնալ կարիերայիս առաջին չեմպիոնությունն էր, ինչի համար շատ ուրախ եմ: Շատ դժվար խաղեր ունեցանք: Առհասարակ եզրափակիչ շարքի բոլոր խաղերն էին շատ բարդ ինչպես թիմի, այնպես էլ ինձ համար, քանի որ խաղում էի սաստիկ հարբուխով, ինչի մասին քչերը գիտեն: Սպասում էինք, որ «Դվինը» կպայքարի մինչև վերջ, այնպես, ինչպես միշտ է անում: Բայց լավ է, որ մեր թիմում շատ լավ ու փորձառու տղաներ ունենք ու կարողացանք հաջողության հասնել:
Ինչի՞ շնորհիվ կարողացանք առավելության հասնել դիմակայությունում. կարծում եմ՝ գլխավոր գործոնը մեր միասնականությունն է: Մենք թիմակիցներով շատ կապված ենք իրար հետ, իրար շատ ենք օգնում: «Վահագնի Սիթին» շատ յուրահատուկ ու առանձնահատուկ թիմ է»,- ArmSport-ի թղթակցի հետ զրույցում ասում է Թադե Քեշիշյանն, ով ի դեպ ճանաչվել է VBET Ա-լիգայի լավագույն հայ բասկետբոլիստ:
«Իմ նպատակը միշտ եղել է չեմպիոնությունը ,բայց ինձ համար մեծ պատիվ է արժանանալ նաև Ա-լիգայի լավագույն հայ բասկետբոլիստի կոչմանը: Հուսով եմ՝ սա խթան կհանդիսանա, որ Հայաստանում երեխաներն ավելի շատ զբաղվեն բասկետբոլով ու մենք կարողանանք զարգացնել այս մարզաձևը մեր երկրում»:
ՀԳ. Եզրափակիչ հանդիպման ընդմիջմանը «Միկա» մարզադահլիճում իրենց բասկետբոլային ունակությունները ցուցադրեցին նաև Հայաստանի ֆուտբոլի հավաքականի հարձակվող Ալեքսանդր Կարապետյանն ու դարպասապահ Արսեն Բեգլարյանը:
Նրանք նախ իրենց ուժերը փորձեցին նետումներում, ապա բաժանվեցին թիմերի ու խաղացին, որտեղ հաղթանակն Արսեն Բեգլարյանի թիմի կողմն էր:
Հայաստանի հավաքականի ֆուտբոլիստներն իրենց ստորագրություններով գնդակը նվիրեցին տրիբունայից խաղին հետևող երկրպագուներից մեկին՝ զինվորական համազգեստով:
Մանրամասները՝ տեսանյութում:
