Marvel-ի կամ DC-ի ֆիլմերում և կոմիքսներում մենք նկատում ենք մի օրինաչափություն` սուպերհերոսները հայտնվում են միշտ ամենակարևոր և ամենաբարդ իրավիճակներում: Եվ այս դեպքում կարծես թե հենց այդ իրավիճակն է… Ավարտվեց վերջին երկու ամիսների գլխավոր տրանսֆերային սագաներից մեկը. Զլատան Իբրահիմովիչը տեղափոխվեց «Միլան»:
Իտալացի հայտնի սպորտային լրագրող Ֆաբրիցիո Ռոմանոն տեղեկացնում է, որ 38-ամյա ֆուտբոլիստն իր նախկին ակումբի հետ կնքել է 6 ամսվա պայմանագիր, որի ընթացքում կվաստակի 3 միլիոն եվրո: Եվս 500 հազար նա կստանա, եթե ակումբը հայտնվի եվրագավաթների գոտում: Նշվում է, որ պայմանագիրը կարող է երկարաձգվել ևս մեկ տարով:
Իբրայի վերադարձը կտա՞ Միլանին դրական արդյունք. եթե անկեղծ՝ դժվար է ասել: Չպետք է մոռանալ, որ Զլատանն արդեն 38 տարեկան է, ինչպես նաև արդեն որքան ժամանակ է չի խաղացել Եվրոպայում։ Ամենևին չթերագնահատելով MLS-ի մակարդակը, եկեք անկեղծ լինենք`Ա Սերիան մի քանի անգամ ավելի բարդ առաջնություն է՝ ներկայացված ավելի բարձրակարգ ֆուտբոլիստներով համալրված ակումբներով, իսկ հանդիպումներն անցնում են լիովին այլ տեմպերով և ծանրաբեռնվածությամբ: Պատահական չէ, որ միլանյան ակումբն ու ֆուտբոլիստը կնքել են ընդամենը կես տարվա պայմանագիր: Ո՞վ ավելի շատ կշահի այս տրանսֆերից… Եկեք չշտապենք, ամեն ինչ պարզ կլինի այս մրցաշրջանի ավարտին:
Միլանն իմ տունն է…
Հիշեցնենք, որ Իբրահիմովիչը «Միլանում» հանդես է եկել 2010-12 թվականների ընթացքում: Նրա վերջին ակումբը MLS-ը ներկայացնող «Լոս-Անջելես Գելաքսին» էր: «Ես միշտ ասել եմ, որ սա իմ տունն է, և ահա, ես վերադարձա։ Հիշում եմ, որ մի քանի տարի առաջ նույն տեղում նստած էի։ Ամենակարևորը, որ հիմա ես այստեղ եմ։ Ես շատ երջանիկ եմ։ Վերջապես, այստեղ եմ։ Սպասեք ինձ «Սան-Սիրոյում», և մենք կստիպենք նրան նորից թռնել»,- «Միլանի» հետ պայմանագիր կնքելուց հետո Իբրան կիսվել է էմոցիաներով:
Իբրան դրական ազդեցություն կունենա երիտասարդ ֆուտբոլիստների վրա
Սա շատ կարևոր գործոն է… Իբրայի նման ֆուտբոլիստի առկայությունը թիմում ոչ միայն կարևոր է խաղադաշտում, այլ նաև դրանից դուրս` հանդերձարանում, մարզումների ընթացքում, պարզապես առօրյայում:
«Միլանի» նախկին հարձակվող Անտոնիո Կասանոն խոսել է Զլատան Իբրահիմովիչի վերադարձի մասին։ «Նրա թիմակիցներից 80 տոկոսը արժանի չեն «Միլանում» խաղալուն։ Բայց ես վստահ եմ, որ Իբրահիմովիչի ժամանումը կստիպի նրանց ավելի լավ աշխատել։ Մարզումներին նա ստիպում է քեզ քրտնաջան աշխատել։ Եթե Իբրան տեսնում է, որ ինչ-որ մեկն այնպես չի մարզվում, ինչպես որ հարկն է՝ բարձրացնում է իր ձայնը։ Երբ նա բարձրացնում է ձայնը, պետք է վախենալ նրանից»,-Կասանոյի խոսքերն է մեջբերում Sky Sports Italia-ն։
Եվ դա չի թաքցնում նաև հենց ինքը` Զլատանը. «Ես երկու երեխա ունեմ: Ես գիտեմ, թե ինչպես ստիպել երիտասարդներին աճել: Մենք ստիպված կլինենք շատ աշխատել»:
N21
Շվեդ հարձակվողը կողմնորոշվել է, թե որ խաղային համարի ներքո հանդես կգա «Միլանում»: Հունվարի 2-ին, միլանյան ակումբի մամուլի քարտուղարությունը հայտնել է, որ 38-ամյա ֆուտբոլիստն ընտրել է 21 համարի մարզաշապիկը: 21-ը Իբրահիմովիչի անվան առաջին տառերի հղումն է: 2-ը հարձակվողի անվան առաջին տառն է (Z), իսկ 1-ը՝ նրա ազգանվան առաջին տառը (I):
«Այս համարն ընտրել է իմ որդին: Ես նրան ցույց տվեցի հասանելի տարբերակները, և նա ընտրեց 21-ը»,- իր հերթին խաղային համարի ընտրությունը մեկնաբանում է Զլատանը:
Իբրահիմովիչը նաև առաջին գոլն է խփել Միլան վերադառնալուց հետո. «Միլանը» ընկերական խաղում 9:0 հաշվով հաղթեց «Ռոդենս» ակումբին: «Միլանի» կազմում գոլերից մեկը խփեց շվեդ հարձակվող Զլատան Իբրահիմովիչը: 38-ամյա հարձակվողը խաղաց առաջին խաղակեսը:
Զլատանը կարող է վերադառնալ հավաքական
Շվեդիայի ազգային հավաքականի գլխավոր մարզիչ Յան Անդերսոնը նշել է, որ իտալական «Միլանի» հարձակվող Զլատան Իբրահիմովիչը կարող է վերադառնալ ազգային հավաքական, տեղեկացնում է Fotbollskanalen-ը:
«Այն ֆուտբոլիստները, ովքեր նախկինում չեն ցանկացել հանդես գալ ազգային հավաքականում կարող են կապվել ինձ հետ, եթե փոխել են իրենց տեսակետը: Այո, Զլատանի հետ խնդիրներ ունեցել եմ, բայց դա կարևոր չէ: Եթե նա պետք է Շվեդիայի հավաքականին, ուրեմն նա կարող է վերադառնալ», — նշել է Անդերսոնը:
Վար Բաբայան
