Տարվա լավագույնները․ ինչպես էր քվեարկել ArmSport-ը

Հայաստանի ֆուտբոլի ֆեդերացիան ուրբաթ օրը ամփոփեց «Տարվա լավագույն ֆուտբոլիստ» անվանակարգում 2020 թվականի քվեարկության արդյունքները: Ինչպես հայտնի է՝ 133 միավորով հաղթող ճանաչվեց Հայաստանի ազգային հավաքականի ավագ և իտալական «Ռոմայի» կիսապաշտպան Հենրիխ Մխիթարյանը՝ այս կոչմանն արժանանալով 10-րդ անգամ:

Ինչպես ամեն տարի՝ այս տարի ևս արդյունքների ամփոփումից հետո ֆուտբոլասերները երկու մասի բաժանվեցին. նրանք, ովքեր համաձայն են, որ լավագույնը Մխիթարյանն է, և նրանք, ովքեր կարծում են, որ լավագույն ֆուտբոլիստ պիտի ճանաչվեր ավելի շատ հայկական ֆուտբոլում ներդրում ունեցած խաղացողը: Մեզ մոտ ևս կարծիքների այսպիսի բախում եղավ և ArmSport-ում վերջնական քվեարկությունը կազմվեց խմբագրակազմի անդամների նախապես արված ներքին քվեարկության հիման վրա:

Հենրիխ Մխիթարյան

Մեր հավաքականի ավագի խոսուն վիճակագրությունը տեսնում եք լուսանկարում։ Թեև շատերը կարծում են, որ լավագույնը պետք է լինի այն ֆուտբոլիստը, որը ավելի շատ աչքի է ընկել հավաքականում, մենք կարծում ենք, որ «Տարվա լավագույն ֆուտբոլիստ» անվանակարգը տարվա ընթացքում տվյալ ֆուտբոլիստի հաջող ելույթների ամփոփման արդյունք պետք է լինի։

Մխիթարյանը, որը հավաքականում այս տարի երկու խաղ է անցկացրել, մեկում էլ աչքի ընկնելով գոլով, պարզապես փայլուն ելույթներ է ունենում Ա Սերիայում՝ բարձր պահելով նաև այն նշաձողը, որին պետք է ձգտեն հայ ֆուտբոլիստները։

Տիգրան Բարսեղյան

Տիգրան Բարսեղյանը շատ հաջող տարի անցկացրեց թե՛ ակումբային մակարդակում, թե՛ հավաքականում։ Մեր ֆուտբոլիստը Ղազախստանի առաջնությունում խփած 5 գոլի ու 8 գոլային փոխանցման շնորհիվ արժանացավ մրցաշրջանի լավագույն ֆուտբոլիստի կոչմանը՝ «Աստանայի» երկրպագուների վարկածով։ Հայաստանի հավաքականի ֆուտբոլիստը նաև transfermarkt-ի վարկածով հայտնվեց Ղազախստանի առաջնության տարվա թիմում:

Բարսեղյանը հավաքականի կազմում Ազգերի լիգայի խաղերում ևս իր ներդրումն ունեցավ ու լիովին արժանի էր տարվա լավագույնի ցուցակում տեղ գտնելուն։

Վահան Բիչախչյան

Հայաստանի ազգային հավաքականի նորեկ Վահան Բիչախչյանը հավաքականի մարզչի ուշադրությանն արժանացավ հենց ակումբային հիանալի ելույթներով։ Երիտասարդ ֆուտբոլիստը, որը «Ժիլինայի» կազմում փայլում էր, բոլորիս սովորեցրել էր իր գոլերին։ Ցավոք, Վահանին չհաջողվեց գոլերի հաշիվը բացել հավաքականի կազմում, սակայն նա բոլոր նախադրյալներն ունի ազգային թիմում ամրապնդվելու համար։

Հիշեցնենք, որ ՀՖՖ ամփոփիչ քվեարկությամբ՝ երկրորդ հորիզոնականում է Հայաստանի ազգային հավաքականի և ղազախական «Աստանայի» կիսապաշտպան Տիգրան Բարսեղյանը: Իսկ երրորդ տեղում է Հայաստանի ազգային հավաքականի և Սլովակիայի «Ժիլինա» ակումբի կիսապաշտպան Վահան Բիչախչյանը:

Լավագույն մարզչի մեր եռյակն այսպիսին էր․

1․ Խոակին Կապառոս

2. Դավիդ Կամպանյա

3․ Վարդան Մինասյան

Երևի թե բոլորը կհամաձայնեն, որ այս տարի Կապառոսը Հայաստանի հավաքականի ղեկին աննախադեպ հաջողություն գրանցեց։ Մեր ազգային թիմը Ազգերի լիգայի C լիգայի 2-րդ խմբի հաղթող դարձավ և  B խմբում հանդես գալու իրավունք վաստակեց: Բացի դրանից, իսպանացի մասնագետը մեր հավաքականում ռեկորդային ցուցանիշ գրանցեց․ նա դարձավ առաջին մարզիչը, որի գլխավորությամբ Հայաստանի ազգային հավաքականը չի պարտվել 5 անընդմեջ խաղում: Նշենք, որ դրանցից երեքում ՝ թիմը հաղթանակ է տոնել:

Հայաստանի Բարձրագույն խմբի առաջնության 2019/20 մրցաշրջանում «Արարատ-Արմենիան» հենց Վարդան Մինասյանի գլխավորությամբ հռչակվեց Հայաստանի չեմպիոն։ Ընդ որում, հետաքրքրաշարժ մրցաշրջանում հաղթողը որոշվեց վերջին տուրում, երբ «Արարատ-Արմենիան» 2-0 հաշվով հաղթեց «Նոային»։ Այս հաղթանակի շնորհիվ էլ թիմը հնարավորություն ստացավ մասնակցելու Չեմպիոնների լիգայի որոկավորման փուլին, սակայն արդեն առանց Մինասյանի։ Հաղթական խաղից ընդամենը 3 օր անց ակումբւ հայտարարեց գլխավոր մարզչի հետ համագործակցությունը դադարեցնելու մասին։