Նոր Պոգբան, սուպերունիվերսալը և Սուարեսի ամբիցիաները․ Մրցաշրջանի ամենահաջողված տրանսֆերները

Թոփ-5 առաջնություններում 2020/21 մրցաշրջանն արդեն հատել է հասարակածը կամ մոտ է այն հատելուն։ Նախորդ տրանսֆերային պատուհանի ընթացքում մենք այդպես էլ ականատես չեղանք սուպերտրանսֆերների, սակայն եղան մի քանի նշանակալից տեղափոխություններ։ 

Այսօր առաջարկում ենք ամփոփել մրցաշրջանի առաջին հատվածը՝ մեր դիտակետում ունենալով ամենահաջողված տրանսֆերային գործարքները․ կանդրադառնանք այն ֆուտբոլիստներին, ովքեր կարճ ժամանակում կարողացան բավականին օգտակար լինել իրենց նոր թիմերին։

⚽ Էմիլիանո Մարտինես

«Արսենալից»՝ «Աստոն Վիլա»․ 17,4 մլն եվրո

Վիճակագրությունը 2020/21 մրցաշրջանում (բոլոր մրցաշարեր) – 18 խաղ

Մարտինեսը նախորդ մրցաշրջանում տպավորիչ հանդես եկավ «Արսենալի» կազմում, երբ վնասվածք էր ստացել հիմնական դարպասապահ Լենոն։ Այդպիսի ելույթներից հետո ակնհայտ էր՝ այսպիսի դարպասապահը չի կարող մաշեցնել պահեստայինների նստարանը։ Կարևոր է, որ արգենտինացին ինքն էլ էր դա գիտակցում և ճիշտ որոշում կայացրեց՝ փոխարինելով Լոնդոնը Բիրմինգհեմով։ «Աստոն Վիլան» նոր մրցաշրջանում շատ լավ է հանդես գալիս, որում իր մեծ ներդրումն ունի նաև Մարտինեսը։ Իսկ այս մրցաշրջանում սեյվերի քանակով ԱՊԼ-ում նա զիջում է միայն «Տոտենհեմի» դարպասների պահապանին՝ աշխարհի գործող չեմպիոն Լյորիսին։

⚽ Աշրաֆ Հակիմի

«Ռեալից»՝ «Ինտեր»․ 40 մլն եվրո

Վիճակագրությունը 2020/21 մրցաշրջանում (բոլոր մրցաշարեր) – 25 խաղ/ 6 գոլ

Մարոկկացի պաշտպանը հիանալի մրցաշրջան անցկացրեց «Բորուսիայում», որտեղ հանդես էր գալիս վարձավճարով։ Վերադառնալ Մադրիդ նա չցանկացավ (կամ էլ Զիդանը նրան չէր տեսնում իր պլաններում), և երիտասարդ աֆրիկացին տեղափոխվեց Ա Սերիա։ Նոր մարտահրավերն Աշրաֆը պատվով ընդունեց և շատ արագ հարմարվեց ապենինյան լիգային։ Եվ, իհարկե, Հակիմին չի մոռացել նաև իր ռմբարկուական հատկանիշները․ 6 գոլ կես մրցաշրջանում՝ շատ լավ արդյունք է, համաձայնե՞ք։

⚽ Ռուբեն Դիաշ

«Բենֆիկայից»՝ «Մանչեսթեր Սիթի»․ 68 մլն եվրո

Վիճակագրությունը 2020/21 մրցաշրջանում (բոլոր մրցաշարեր) – 27 խաղ/ 1 գոլ

«Շեյխերի թիմը» արդեն ոչ ոքի չի զարմացնում՝ աստղաբաշխական գումարներ ծախսելով թիմի պաշտպանությունը ամրապնդելու համար։ Վերջին մի քանի տարվա ընթացքում նրանք «Սիթիի» պաշտպանության վրա ավելի շատ գումարներ են ծախսել, քան որոշ երկրներ իրենց զինված ուժերի վրա։ Պարադոքս։ Բայց ինչևէ, այս անգամ Գվարդիոլան, կարծես թե, գտել է այն ֆուտբոլիստին, ով կարող է առաջիկա մի քանի տարիներին համարվել պաշտպանության հենասյուն։ Եթե Դիաշի տրանսֆերը սկզբնական շրջանում շատերի մոտ կասկած էր առաջացնում, ապա այժմ կարելի է ասել՝ սա հաջողված տրանսֆեր է։

 

⚽ Խամես Ռոդրիգես

«Ռեալից»՝ «Էվերտոն»․ անվճար

Վիճակագրությունը 2020/21 մրցաշրջանում (բոլոր մրցաշարեր) – 14 խաղ/ 3 գոլ

Տրանսֆեր, որը պետք էր երկու կողմերին էլ։ Ռոդրիգեսին պետք էր խաղաժամանակ, «Էվերտոնի» գլխավոր մարզիչ Անչելոտիին՝ բարձրակարգ ֆուտբոլիստ, ում շուրջ կարելի է թիմ հավաքել և ով այդ թիմի կարգը նշանակալիորեն կբարձրացնի։ Հաշվի առնելով նաև այն փաստը, որ կոլումբիացի աստղը լիվերպուլյան ակումբին բաժին է հասել անվճար, վստահորեն կարելի է ասել, որ այս տրանսֆերն ամենահաջողվածներից էր 2020/21 մրցաշրջանում։ Միգուցե, այս պահին նա ԱՊԼ-ի ամենադիտարժան և տպավորիչ ելույթներ ունեցող ֆուտբոլիստներից չէ, սակայն նա ունի «բարձր կարգ», որը, անշուշտ, դեռ շատ օգտակար կլինի թիմին առաջիկայում։

⚽ Վեսթոն Մակքենի

«Շալկեից»՝ «Յուվենտուս»․ վարձավճարով՝ հետագայում տրանսֆերի գնման տարբերակով

Վիճակագրությունը 2020/21 մրցաշրջանում (բոլոր մրցաշարեր) – 21 խաղ/ 4 գոլ

Մենք նախկինում արդեն անդրադարձել էինք այն թեմային, թե ամերիկացի ֆուտբոլիստների ինչ հրաշալի սերունդ է այժմ ներկայացված Եվրոպայում (նյութին կարող եք ծանոթանալ այստեղ), անդրադարձել էինք նաև Մակքենիին՝ կանխատեսելով նրան մեծ ապագա եվրոպական ֆուտբոլում։ Բայց որ դա կլինի այսքան արագ ու այն էլ՝ միանգամից գրանդ ակումբի կազմում․․․ ճիշտն ասած, մենք էլ չէինք սպասում։ 22-ամյա ամերիկացին շատ արագ հարմարվեց նոր թիմին, կարճ ժամանակում կարողացավ ամրապնդվել հիմնական թիմում, իսկ նրա ունիվերսալ լինելը պարզապես մեծ նվեր էր Պիրլոյին։ Նորաթուխ մարզիչը Վեսթոնի այդ հատկանիշն օգտագործում է բավականին հաջող՝ տեղ գտնելով ամերիկացու համար այն դիրքում, որն այս պահին պետք է թիմին։ Պետք է՝ նա կխաղա հենակետային գոտում, մյուս խաղում՝ կիսապաշտպանության որևէ եզրում, իսկ եթե պետք է ենթահարձակվող՝ խնդրեմ, կրկին Մակքենի։ Եվ պատահական չէ, որ թուրինյան ակումբն արդեն իսկ ցանկանում է լիարժեք պայմանագիր կնքել ամերիկացի տաղանդի հետ։ Եվ այժմ մեկ այլ հարց է առաջանում․ եթե կա Մակքենի՝ Պոգբան պե՞տք է «Յուվենտուսին» ։

⚽ Ուեսլի Ֆոֆանա

«Սենտ Էտիենից»՝ «Լեսթեր»․ 35 մլն եվրո

Վիճակագրությունը 2020/21 մրցաշրջանում (բոլոր մրցաշարեր) – 25 խաղ/1 գոլ

Եթե վերը նշված խաղացողներին ճանաչում են գրեթե բոլոր ֆուտբոլասերները, մեր այս հերոսը միայն վերջերս է լսեցնել տվել իր մասին։ 20-ամյա պաշտպանի համար «աղվեսները» մեծ գումար տվեցին «Սենտ Էտիենին», և Ռոջերսը այս տրանսֆերի հարցում չվրիպեց: Նգոլո Կանտեից հետո նա կարող է դառնալ հերթական ֆրանսիացի աստղը, ով իր մեծ քայլերը սկսում է «Լեսթերում»։ Եթե նա շարունակի այդպես վստահ հանդես գալ նաև հետագայում, ապա մեկ-երկու մրցաշրջանից հետո մենք նրան անպայման կտեսնենք որևէ գրանդ ակումբում։

⚽ Լուիս Սուարես

«Բարսելոնայից»՝ «Աթլետիկո»․ անվճար

Վիճակագրությունը 2020/21 մրցաշրջանում (բոլոր մրցաշարեր) – 18 խաղ/ 11 գոլ

Այս մրցաշրջանում շատ հարձակվողներ, ովքեր տեղափոխվել են նոր ակումբներ, իրենց լավ են դրսևորում կամ դեռ կդրսևորեն, սակայն Սուարեսը՝ դա լրիվ ուրիշ մոլորակ է։ Հենց այսպիսի խաղացողն էր պակասում Սիմեոնեի թիմին, և հարցը միայն գոլերի մեջ չէ։ «Աթլետիկոյին» պետք էր հենց այսպիսի ֆուտբոլիտ՝ առաջատար, ով կոգեշնչի խաղացողներին, կփոխանցի չեմպիոնական ամբիցիաներ։ Թե ինչու նա լքեց «Բարսան», դա քննարկման լրիվ այլ թեմա է, և կարծում եմ, դա արդեն այժմ այդքան էլ կարևոր չէ։ Հիմա նա Մադրիդում է՝ լի մեծ ամբիցիաներով և նոր տիտղոսներ նվաճելու ձգտումով, և պարզապես պետք է վայելել նրա խաղը այստեղ և այս պահին։

⚽ Դիեգո Ժոտա

«Վուլվերհեմփթոնից»՝ «Լիվերպուլ»․ 44,7 մլն եվրո

Վիճակագրությունը 2020/21 մրցաշրջանում (բոլոր մրցաշարեր) – 17 խաղ/ 9 գոլ

Ժոտան շատ տպավորիչ էր հանդես գալիս դեռ Չեմպիոնշիփում․ նա օգնեց «Վուլվերհեմփթոնին» դուրս գալ ԱՊԼ, հետո շարունակեց իր արդյունավետ գործողություններով թիմին օգնել հայտնվել եվրագավաթային գոտում։ Ընդամենը ժամանակի հարց էր, թե երբ պորտուգալացին կտեղափոխվի ավելի բարձրակարգ ակումբ։ Եվ ահա, այս մրցաշրջանից առաջ նա «գայլերի ոհմակը» փոխարինեց «Լիվերպուլով» և՝ չսխալվեց։ Չսխալվեց նաև Կլոպը՝ ձեռք բերելով սուպերունիվերսալ ֆուտբոլիստի։ Ժոտան խաղում է հարձակման բոլոր եզրերում, կարող է խաղալ նաև կենտրոնական հարձակվողի դիրքում, պետք է՝  կխաղա նաև կիսապաշտպանությունում։ Հենց այսպիսի ֆուտբոլիստ էր պակասում Կլոպին, ով ցանկացած անակնկալի դեպքում կարող է հաջողությամբ փոխարինել Մանե-Սալահ-Ֆիրմինո եռյակից յուրաքանչյուրին, և ընդ որում՝ դրանից ընդհանրապես չեն տուժի թիմի խաղային որակները։ Մալադեց, Կլոպ․․․

 

Իհարկե, այս ցուցակում կարելի էր ընդգրկել ևս մի քանի ֆուտբոլիստների, սակայն այս անգամ սահմանափակվենք վերը նշված ֆուտբոլիստներով։ Մրցաշրջանի երկրորդ հատվածը դեռ առջևում է, և միանշանակ մի շարք նորեկներ ևս լավագույնս կդրսևորեն իրենց։ Այնպես որ, մրցաշրջանի ավարտից հետո մեզ սպասվում է ևս մեկ այսպիսի անդրադարձ՝ սակայն ավելի մեծ մասշտաբով․․․

Վար Բաբայան