Կորոնավիրուսն արդեն աննախադեպ վնաս է հասցրել համաշխարհային սպորտին. դադարեցվել են առաջնությունները, թիմերը կարանտինի մեջ են, խաղերն անցնում են առանց հանդիսականի:
Թե ինչ կլինի տարվա կարևորագույն իրադարձությունների՝ Օլիմպիական խաղերի, Եվրոպայի առաջնության ու Չեմպիոնների լիգայի հետ, դեռևս անհայտ է. դրանց տեղափոխման հավանականությունը չափազանց մեծ է:
Ֆուտբոլի Եվրոպայի առաջնություն
2012 թվականին ֆուտբոլային չինովնիկները համաձայնեցին ՈւԵՖԱ-ի նախկին նախագահ Միշել Պլատինիի՝ Եվրոպայի առաջնության 60-ամյակի առթիվ Եվրո-2020-ը 12 քաղաքներում անցկացնելու առաջարկի հետ:
2020 թվականին այս գաղափարն արդեն այնքան էլ լավը չի թվում:
ՈւԵՖԱ-ում պնդում են, որ մրցաշարն անցկացվի նախատեսված ժամանակահատվածում, բայց սրան ազգային ֆեդերացիաներն, ամենայն հավանականությամբ, դեմ կլինեն, քանի որ նրանց համար ավելի կարևոր է իրենց երկրների չեմպիոններին որոշելն, իսկ առաջնությունների գրաֆիկներն արդեն իսկ նվազագույնը 2-3 շաբաթով խախտվել են:
Շատ մարզիչներ արդեն խոսել են այն մասին, որ մարդկանց առողջությունն ավելի կարևոր է, քան այն, թե ով կդառնա չեմպիոն ու որքան գումար կվաստակի:
Սպասվում է, որ մարտի 17-ին ՈւԵՖԱ-ն արտակարգ համաժողովում վերջնական որոշում կկայացնի, թե ինչ անել ազգային առաջնությունների և Եվրոպայի առաջնության հետ:
Տոկիոյի ամառային Օլիմպիական խաղեր
Օլիմպիական խաղերի անցկացման վերաբերյալ դեռևս որոշում չի կայացվել, իսկ մարզիկները պլանային ռեժիմով պատրաստվում են խաղերին: ՄՕԿ-ի չինովնիկները վստահաբար այն չեն անցկացնի առանց հանդիսականի. ֆինանսական վնասը կարող է հասնել 1 մլրդ դոլարի:
Բայց հավանականություն կա, որ այն կհետաձգվի մեկ տարով:
Օլիմպիական խաղերի՝ նախապատրաստության գծով Գործադիր կոմիտեի ղեկավար Հարկի Տակախաշին ասել է, որ իր երկիրը դիտարկում է Օլիմպիական խաղերը մեկ կամ երկու տարով հետաձգելու հավանականությունը:
Չեմպիոնների լիգա/ Եվրոպա լիգա
Չեմպիոնների լիգայի 1/8 եզրափակչի` մարտի 17-ին և 18-ին, Եվրոպա լիգայի`մարտի 19-ին կայանալիք խաղերն, ինչպես նաև ՈւԵՖԱ-ի պատանեկան լիգայի խաղերն արդեն իսկ հետաձգվել են:
Հավանական է, որ ՈւԵՖԱ-ն անցնի «Չորսի եզրափակիչ» ձևաչափին: Նախագիծը քվեարկության կդրվի երեքշաբթի՝ կազմակերպության համաժողովի ընթացքում:
Նախագծի համաձայն, մրցաշարի կիսաեզրափակիչները կանցկացվեն մեկ խաղով՝ չեզոք դաշտում, ինչից հետո այնտեղ էլ տեղի կունենա եզրափակիչը: Այսպիսով, կիսաեզրափակիչ ու եզրափակիչ փուլերի անցկացման համար 4 օր կպահանջվի: Չեմպիոնների լիգայի խաղերը կանցկացվեն Ստամբուլում, իսկ Եվրոպա լիգայի վճռորոշ խաղերը՝ Գդանսկում:
Հիշեցնենք՝ դադարեցվել են նաև եվրոպական գրեթե բոլոր առաջնությունները: Թոփ-5 լիգաներից վերջինը դադարեցվեց գերմանական Բունդեսլիգան: Թե՛ Անգլիայում, թե՛ Իտալիայում, թե՛ Իսպանիայում, թե՛ Գերմանիայում մի շարք ֆուտբոլիստներ ու մարզիչներ են վարակվել, թիմերը կարանտինի մեջ են: Եթե որոշ ժամանակ առաջ դեռ առանց հանդիսականների խաղեր էին անցկացվում, ապա արդեն ի սպառ դադարեցվել են ներքին առաջնություններն ու առհասարակ բոլոր ֆուտբոլային և սպորտային միջոցառումները:
Ֆուտբոլի Հայաստանի առաջնություն/ ֆուտզալ/ Ազգային հավաքականի հանդիպումներ
Մարտի 13-ին ՀՖՖ-ն հայտարարեց ֆեդերացիայի հովանու ներքո անցկացվող բոլոր մրցաշաշերի հետաձգման մասին:
«Հաշվի առնելով Հայաստանում կորոնավիրուսի նոր դեպքերի ի հայտ գալն և դրա հետագա տարածումը կանխարգելելու նպատակով, ինչպես նաև հիմք ընդունելով ՀՀ Կառավարության կոչը՝ Հայաստանի ֆուտբոլի ֆեդերացիան կայացրել է որոշում մինչև մարտի 23-ը դադարեցնել ՀՖՖ հովանու ներքո անցկացվող բոլոր մրցաշարերը:
Ըստ այդմ՝ Հայաստանի Բարձրագույն խմբի առաջնության 18-րդ, Առաջին խմբի առաջնության 22-րդ և 23-րդ տուրերի, ինչպես նաև VBET Հայաստանի գավաթի խաղարկության կիսաեզրափակիչ պատասխան հանդիպումները հետաձգվում են»,- ասվում էր ՀՖՖ-ի տարածած հաղորդագրության մեջ:
Մարտի 16-ին հայտնի դարձավ, որ չեղարկվել են նաև մարտի 26-ին նախատեսված Ուզբեկստան-Հայաստան և մարտի 30-ին նախատեսված Ղազախստան-Հայաստան ընկերական հանդիպումները:
Վաղը՝ մարտի 17-ին, ՈՒԵՖԱ-ի կողմից կլինի հայտարարություն իր հովանու ներքո անցկացվող բոլոր մրցաշարերի վերաբերյալ:
Ամենայն հավանականությամբ, կհետաձգվեն նաև Եվրոպայի մինչև 21 տարեկանների առաջնության որակավորման փուլի՝ մարտին կայանալիք հանդիպումները:
Հայաստանում ապրիլի 16-ից 23-ը անցկացվող ՈւԵՖԱ-ի Զարգացման մրցաշարը ևս հետաձգվել է։
ՈւԵՖԱ-ի ֆուտզալի ԵՎՐՈ-2022-ի որակավորման փուլի՝ ապրիլի 8-ին և 14-ին նախատեսված հանդիպումները Բուլղարիայի և Հայաստանի ազգային հավաքականների միջև հետաձգվել են անորոշ ժամկետով: Հանդիպումների անցկացման վերջնաժամկետը 2020 թ. դեկտեմբերն է:
NBA
Մի քանի օր առաջ «Յուտայի» ֆրանսիացի բասկետբոլիստ Ռուդի Գոբերը կատակեց կորոնավիրուսի տարածման վերաբերյալ. մամուլի ասուլիսից հետո նա դիպչեց սեղանին դրված բոլոր բարձրախոսներին, իսկ մարտի 12-ին հայտնի դարձավ, որ ինքն ու իր թիմակից Էմանուել Մուդիայի թեստերի պատասխանը դրական է եղել:
Այդ նույն օրը NBA-ը որոշում կայացրեց անորոշ ժամանակով դադարեցնել առաջնությունը: Տարբեր թիմերի խաղացողներ կարանտինում են: Թե ինչպես ավարտել առաջնությունը, NBA-ում չգիտեն. այն դեռևս երկու շաբաթով է հետաձգված:
Այն շրջանում, երբ Գոբերի մոտ կարող էր շարունակվել գաղտնի շրջանը, «Յուտան» նրա հետ մի քանի խաղ է անցկացրել:
NBA-ի դադարեցումից ժամեր անց բասկետբոլային Եվրալիգան ևս հայտարարեց, որ դադարեցնում է մրցաշարի անցկացումը:
Նշենք՝ Հայաստանում ևս դադարեցվել են բասկետբոլի Ա, Բ լիգաների և Հայաստանի Գավաթի խաղարկությունները:
NHL
Հոկեյի ազգային լիգան (NHL) կորոնավիրուսի տարածման սպառնալիքի պատճառով դադարեցրել է առաջնությունը:
«Մեր նպատակը խաղերը վերսկսելն է հենց դա կլինի տեղին ու խելամիտ: Մենք կարող ենք մրցաշրջանն ավարտել ու հանձնել Սթենլիի Գավաթը»,- հայտարարել է NHL-ի ղեկավար Գերի Բեթմենը:
Դեռևս հայտնի չէ, թե որքան ժամանակով են հետաձգվել հոկեյի խաղերը:
Ֆորմուլա-1
Ավստրալիայի Գրան-Պրին պետք է կայանար մարտի 14-15-ը, սակայն չեղարկվեց: Մրցաշարի անցկացմանը դեմ էին հենց ավտոարշավորդները:
«Չգիտեմ, թե ինչու ենք մենք այստեղ, ու ինչու են այստեղ այսքան շատ երկրպագուներ հավաքվել»,- ասել էր Լյուիս Հեմիլթոնը:
Մարտի 12-ի առավոտյան Ֆորմուլա-1-ի երկու թիմերի 5 ներկայացուցիչ կարանտինի մեջ էր Մելբուրնում: Օրվա կեսին «Մակլարենի» ևս մեկ ավտոարշավորդի մոտ հաստատվեց կորանավիրուսը:
Մինչ այդ Ավստրալիայի իշխանություններն ասում էին, որ կչեղարկեն մրցաշարը, եթե գոնե մեկ մասնակցի մոտ հաստատվի վիրուսը:
Գրան-Պրիի մյուս երկու փուլերը պետք է անցկացվեն Վյետնամում և Բահրեյնում. դրանց երկուսի անցկացումն էլ հարցականի տակ է:
&width=1600)
Ծանրամարտ / ըմբշամարտ/ բռնցքամարտ/ մարմնամարզություն/գեղասահք
Մարտի սկզբին ծանրամարտի միջազգային ֆեդերացիան Ռումինիայի ծանրամարտի ֆեդերացիայի հետ քննարկումներից հետո որոշեց չեղարկել աշխարհի պատանիների առաջնության անցկացումը. առաջնությունը պետք է կայանար մարտի 14-21-ը, սակայն Բուխարեստում կորոնավիրուսի տարածման և դրա կանխարգելման նպատակով որոշվեց չեղարկել այն:
Այնուհետև, հետաձգվեց ծանրամարտի Եվրոպայի առաջնությունը, որը պետք է տեղի ունենար ապրիլի 4-ից 12-ը Մոսկվայում:
Կորոնավիրուսի տարածման պատճառով ըմբշամարտի միջազգային ֆեդերացիայի կողմից հետաձգվեցին Հունգարիայում և Բուլղարայում կայանալիք վարկանիշային մրցաշարերը: Դրանք կարող են անցկացվել մայիսին կամ հունիսին:
Նշենք՝ Հայաստանի ըմբշամարտի ֆեդերացիան ևս հայտարարեց, որ չեղարկվում են մինչև մարտի 25-ը պլանավորված բոլոր առաջնությունները:
Այս օրերին շատ քիչ մրցաշարեր են անցկացվում, որոնից մեկը բռնցքամարտի վարկանիշային մրցաշարն է Լոնդոնում: Հայաստանի հավաքականը 10 բռնցքամարտիկով է մեկնել Լոնդոն ու պայքարում օլիմպիական ուղեգրերի համար:
Հայ մարմնամարզիկներ Հարություն Մերդինյանը, Վահագն Դավթյանը, Արթուր Դավթյանը և Արթուր Ավետիսյանը մարտի 18-22-ը պետք է մասնակցեին Աշխարհի գավաթի խաղարկության հերթական փուլին, սակայն այն հետաձգվեց:
Մարզաձևի միջազգային ֆեդերացիան նախատեսել է այս մրցաշարն անցկացնել հունիսի 3-6-ը` Դոհայում:
Մարտի 16-22-ն էլ Կանադայի Մոնրեալ քաղաքում պետք է անցկացվեր Գեղասահքի Աշխարհի առաջնությունը: Հայաստանի մարզական դրոշի պատիվը պետք է պաշտպանեին մենասահորդներ Անաստասիա Գալուստյանը, Սլավիկ Հայրապետյանը և Թինա Կարապետյան – Սիմոն Սենեկալ պարային զույգը, սակայն մրցաշարը չեղարկվեց:
Հնարավոր է, որ ընթացիկ տարվա հոկտեմբերին առաջնությունը կրկին անցկացվի Մոնրեալում: Հարցը քննարկման փուլում է:
Ի դեպ, մարտի 13-ին Սլավիկ Հայրապետյանը մեկնել է Լյուքսեմբուրգ՝ մասնակցելու Coupe du Printemps ամենամյա մրցաշարին, սակայն վերջին պահին այն չեղարկվել է, ու Սլավիկը ստիպված է եղել վերադառնալ հայրենիք:
