In court թենիսի ակումբում տեղի ունեցավ թենիսի Հայաստանի առաջնության եզրափակիչ մրցախաղերը: Հիշեցնենք, որ այս տարի մեծահասակների մրցաշարում մասնակցում էր 13 տղա և 8 աղջիկ:
Աղջիկների պայքարում Հայաստանի չեմպիոնի կոչումը կարիերայի ընթացքում 2-րդ անգամ նվաճեց Իրենա Մուրադյանը, ով եզրափակչում 6:3 6:4 հաշվով առավելության հասավ Հայաստանի 2-րդ ռակետ Գաբրիելա Հակոբյանի նկատմամբ.
«Չեմ կարող ասել, որ հաղթանակը շատ հեշտ ստացվեց: Հետաքրքիր պայքար էր ծավալվել: Ընդհանուր առմամբ, մենք շատ ենք խաղում միմյանց դեմ և ամեն տարի էլ բոլորս ուժեղանում ենք ու պայքարն ավելի հետաքրքիր է դառնում»,- ArmSport-ի հետ զրույցում ասում է Իրենան:
Իրենա Մուրադյանը արդեն ընդունվել է ԱՄՆ-ի համալսարաններից մեկը և կարիերան շարունակելու է ԱՄՆ-ում, սակայն սա չի նշանակում, որ Մուրադյանը չի ներկայացնելու Հայաստանը:
«Ես արդեն Հայաստանում արել եմ հնարավորը, և ժամանակն է դուրս գնալու, քանի որ առանց ֆինանսավորման հնարավոր չէ ավելին անել, իսկ համալսարանը հնարավորություն է տալիս մասնակցել ավելի շատ մրցումների»,-նշում է Հայաստանի չեմպիոնը:
Կանանց Հայաստանի հավաքականի մարզիչ Գայանե Մովսիսյանի խոսքով Հայաստանի առաջնությունում անակնկալ արդյունքներ չեն գրանցվել.
«Կարծես թե ունեցանք այնպիսի արդյունքներ, ինչպիսին մտածում էինք: Այս տարի դժվար տարի էր, քանի որ քիչ ենք մարզվել ու մեծ դադար ենք ունեցել կորոնավիրուսի հետ կապված: Հավաքականը կմնա նույն կազմով: Այս տարի սա մեր վերջին մրցումն էր մեծահասակների համար: Հոկտեմբերին ունենք մինչև 18 տարեկանների միջազգային մրցաշար, և լավ է, որ դա լինելու է Հայստանում ու մեր թենիսիստները նույնպես կկարողանան մասնակցել»,-նկատում է Մովսիսյանը:
Խոսելով Հայաստանում թենիսի խնդիրների մասին՝ կանանց հավաքականի գլխավոր մարզիչն առանձնացնում է հիմնական խոչընդոտները. «Մանկապատանեկան թենիսի վիճակը բավականին լավ է, բայց 15-16 տարեկանից հետո ամեն ինչ բարդանում է, քանի որ թենիսը բավականին ծախսատար սպորտաձև է, ու լուծումները միայն ֆինանսի մեջ է: Սա անհատական մարզաձև է, ու ծախսն ամբողջությամբ ընկնում է մարզիկի վրա: Իհարկե մրցաշարեր կան, որ ֆեդերացիան ֆինանսավորում է, բայց անհատական մարզիկների համար պետք է տարվա կտրվածքով շատ մրցաշարերի մասնակցել, իսկ դա ոչ բոլորն են կարողանում անել իրենց միջոցներով»։
Տղամարդկանց պայքարում Հայաստանի չեմպիոնի կոչումը նվաճեց Արթուր Սողոյանը, ով եզրափակչում 6:1 6:1 հաշվով հաղթեց Աշոտ Գևորգյանին: Սողոյանը երկրորդ անգամ դարձավ Հայաստանի չեմպիոն, իսկ նախորդ տարին բաց էր թողել, քանի որ մարզվում էր Իսպանիայի թենիսի ակադեմիաներից մեկում:
«Մեկ ամիս մարզումներ եմ անցկացրել Իսպանիայում և դա ինձ շատ բան է տվել: Նախորդ տարի մասնակցել եմ Դեյվիսի գավաթի աշխարհի առաջնությանը, ինչպես նաև երիտասարդական շատ մրցաշարերի: Ծնողներս են հոգում ծախսերը միջազգային մրցումներին մասնակցելու համար, իսկ Դեյվիսի գավաթի ծախսերը հոգում է ֆեդերացիան: Հայաստանի պայմաններում դժվար է, ամեն ինչ անում ենք, որ հնարավորինս շատ մրցաշարերի կարողանանք մասնակցել, բայց դա կախված է ֆինանսների հետ»,-ասում է Հայաստանի չեմպիոնը:
Հայաստանի առաջին ռակետ Միքայել Ավետիսյանն այս տարի բավարարվեց բրոնզե մեդալով, սակայն դա չի ազդում թենիսիստի վարկանիշի վրա՝ մնալ առաջինը Հայաստանում: Ավետիսյանը նախորդ տարի է վերադարձել զինծառայությունից և 2 տարվա դադարից հետո հետզհետե գալիս է իր լավագույն մարզավիճակին:
«Այս տարի կարելի է ասելի իմ վերադարձն է մեծ թենիս: 2 տարին շատ մեծ դադար է: Նախ ֆիզիկական առումով, հետո փորձառության հետ կապված խնդիր կա: Բացի Հայաստանի առաջնություններից մենք մասնակցում ենք նաև ֆեդերացիայի կողմից տարբեր մրցաշարերի, և ընդհանուր առմաբ իմ գրանցած արդյունքներից դժգոհ չեմ՝ հաշվի առնելով, որ բաց եմ թողել 2 տարի: Ֆեդերացիայի կողմից անցկացվող բոլոր մրցաշարերը վարկանիշ են տալիս և միայն առաջնությունում 3-րդ տեղը գրավելը չի ազդում իմ վարկանիշի վրա: Հաշվի է առնվում տարվա կտրվածքով ընդհանուր արդյունքները»,-մեզ հետ զրույցում նշում է Ավետիսյանը:
Խոսելով հայկական թենիսի խնդիրների մասին Հայաստանի առաջին ռակետը նույնպես կարևորում է հովանավորների և ֆինանսների դերը:
«Իհարկե, ոչ մեկիս համար էլ գաղտնիք չէ, որ թիվ մեկ խնդիրը մարզիկների ֆինանսավորումն է, մյուս կողմից էլ կարծում եմ, որ լուրջ խնդիրներ ունենք մեր ունեցած ռեսուրսները ճիշտ մոբիլիզացնելու հետ կապված, որպեսզի ստանանք այնպիսի մրցակցություն, որ բոլոր մարզիկները կարողանան առաջ շարժվել: Հայաստանում պրոֆեսիոնալ թենիսիստների թիվը քիչ է, և մեր ընդհանուր մոտեցումը, ընդհանուր մարզումներն ու անընդհատ իրար հետ պայքարի մեջ լինելը այն ճանապարհն է, որ մեզ կարող է առաջ տանել»,-ասում է Միքայել Ավետիսյանը:
Հիշեցնենք, որ առաջնության մեկնարկից առաջ լայնածավալ հարցազրույց էինք ունեցել տղամարդկանց Հայաստանի հավաքականի գլխավոր մարզիչ Վահե Ավետիսյանի հետ, ով խոսել էր Հայաստանում թենիսի մասսայականացման և մարզաձևում առկա խնդիրների մասին:
Երվանդ ՀԱԿՈԲՅԱՆ
