Ես սիրում եմ քեզ, բայց Սաութգեյթին՝ նույնպես. Մի արտասովոր հարսանիքի պատմություն

Հաճախ կարելի է լսել նման մի արտահայտություն. «Ամբողջ օրը նստել ես հեռուստացույցի առջև ու դիտում ես, թե ինչպես են 22 հասուն տղամարդիկ վազում այդ կլոր առարկայի հետևից:

Գլուխս ցավում է այդ բղավոցներից: Այնպիսի տպավորություն է, որ ես գոյություն չունեմ քեզ համար: Ե՞րբ ենք վերջին անգամ զրուցել: Ե՞րբ ես վերջին անգամ մի քնքուշ բառ ինձ ասել… Իհարկե, բացի քո հայտնի «Գոոոոոո՜լ» արտահայտությունից»:

Այո, կանայք հաճախ են նման ոճով բողոքում ֆուտբոլասեր տղամարդկանցից, բայց կան նաև այնպիսինները, որ 1000 տղամարդ ֆուտբոլասեր նրանց չի հավասարվի:

Ահա այդպիսի կանանցից մեկն էլ Ռեյչել Քեյվն է: Անգլիայի հավաքականի մոլի երկրպագուհին երբեք չի դժգոհի ֆուտբոլային մեկնաբանի բղավոցներից: Ավելին, նա կուղղի մեկնաբանի սխալները և դա կանի բավական պրոֆեսիոնալ կերպով:

• 

Ինչպես ասում են ՝ այսպիսի կնոջ հետ ամուսնանալն էլ մեղք չէ:

Ի դեպ, եթե «աչքի պոչով» զննում եք այս շքեղ կնոջը, ստիպված եմ հայտնել ՝ նրա սիրտն արդեն զբաղված է: Զբաղեցնողի անունն էլ Դանիել է: Սա էլ հերիք չէ, ազգանունն էլ Սուրիջ:

Այս սիրահար զույգը հասել էր մի կետի, որին ոչ բոլոր զույգերն են մոտենում:

Նրանք որոշել էին ամուսնանալ: Ինչպիսի օրիգինալ որոշում… Դարեր շարունակ մարդկությունն այդպես էլ մի նոր բան չբստրեց..

Լավ, լավ. կատակում եմ: Ինչպես ասում են ՝ հրաշալի զույգ, հրաշալի կատարում:

Ի դեպ, կատարման մասին.

Պետք էր որոշել հարսանյաց հանդեսի օրը: Իսկ դա կատակ բան չէ, հարգելիներս: Յուրաքանչյուր կնոջ համար դա մի բացառիկ օր է, որին պետք է մանրակրկիտ կերպով պատրաստվել:

Եվ այսպես. օրը որոշված է, ռեստորանը պատվիրված է, հյուրերը հրավիրված են, չհրավիրվածները վիրավորված են. կարծես ՝ ամեն ինչ իր տեղում է:

Բայց, ամեն ինչ փչացրեց Գարեթ Սաութգեյթը: Ո՞ վ է նա.

Անգլիայի հավաքականի գլխավոր մարզիչը: Այդ նրա «մեղքով» էր, որ այդ երկրի հավաքականը հասել էր Մունդիալ 2018-ի քառորդ եզրափակիչ: Ճակատագրի հեգնանքով, հանդիպումը պետք է կայանար Ռեյչելի և Դանիելի հարսանյաց հանդեսի օրը ՝ հուլիսի 7-ին:

• 

Եվ սա այն Անգլիայի հավաքականն էր, որը տարիներ շարունակ ձախողվում էր Մունդիալներում: Իսկ հիմա, որոշեցին հաղթանակներ տանել:

Ինչպիսի «ստոր» քայլ, բարեկամներ: Նման բան անելուց առաջ ինչպե՞ս կարելի էր չմտածել Ռեյչելի և Դանիելի սիրո մասին: Հիմա ի՞նչ պետք է անեն նրանք:

Ձեռքից բաց թողնել սիրելի հավաքականի խա՞ղը, թե՞ ամուսնական երջանկությունը: Ինչպես կասեր այս երկուսի համերկրացին ՝ Thats the question (Սա է հարցը):

Ահա այստեղ, Ռեյչելը որոշումներ կայացնելու «վահանակը» վերցրեց իր ձեռքը և հայտարարեց. «Կամուսնանք քառորդ եզրափակչի ընթացքում: Կուտենք, կխմեմք ու հանդիպումն էլ կնայենք»:

Բրա՜վո, սիրում եմ նպատակասլաց կանանց: Նրանց մեջ մի յուրահատուկ փայլ ու գրավչություն կա:

Լավ, մի պահ շեղվեցի մեր հիմնական նյութից: Վերադառնում ենք մեր սիրահար զույգին ՝ Ռեյչելին և Դանիելին:

Երջանիկ հարսնացուն զանգահարում է ռեստորանի տնօրինությանը և ասում. «Մեզ մեծ հեռուստացույց է հարկավոր»:

Տնօրինությունը նրան հայտնում է, որ նման ծառայություններ չեն մատուցվում, սակայն, հարսնացուն մերժում չի ընդունում: Նրանք ստիպված են լինում պրոեկտոր տրամադրել և հարսանյաց սրահի պատերից մեկը վերածել մեծ էկրանի: 750 ֆունտ էլ գումարվեց արված ծախսերին:

Հարսանիքը սկսվեց ժամը 15:00-ին: Քառորդ եզրափակիչը պետք է մեկնարկեր 45 րոպե անց:

Այսպիսով, հարսն ու փեսան և նրանց 120 հյուրերը հանդիպաման առաջին խաղակեսը դիտեցին ողջ շուքով: Մատուցողները պատրաստում էին սեղանները, դասավորում ուտեստները, իսկ հյուրերն արդեն տոնում էի Հարի Մագուայերի խփած գնդակը:

Սա երևի այն բացառիկ հարսանիքներից մեկն էր, երբ հարսն ու փեսան մղվել էին երկրորդ պլան: Բարեբախտաբար, այդ օրն Անգլիայի հավաքականը հաղթեց Շվեդիային (2-0):

Առաջին բաժակաճառերը նվիրված էի Գարեթ Սաութգեյթի տղաներին, ովքեր երջանկություն պարգևեցին ամբողջ երկրին:

Մնացածն արդեն ընթացավ սովորական հունով: Սա միակ դեպքը չէր. այդ օրը մի քանի զույգ էլ ամուսնական զույգ կազմեցին ՝ ապացուցելով, որ սիրո առջև ոչ մի արգելք չի կարող լինել:

Հիշե՛ք, որ միակ արգելքը ՝ ինքներս ենք: Սիրե՛ք այս խաղը, սիրե՛ք կյանք կոչվող խաղը:

Ինչպես և ֆուտբոլում, այստեղ էլ պետք է արագ և ճիշտ որոշումներ կայացնել: Ռեյչելին և Դանիելին սա հաջողվեց. դե ինչ, տարոսը մեզ:

Նարեկ Գրիգորյան