Բելգիայից գալիս ես Հայաստան, քայլում Երևանի փողոցներից մեկով, նստարանին պատահաբար նկատում «Փյունիկի» մարզահագուստով 4 ֆուտբոլիստի, մոտենում ու տեսնելով Արաս Օզբիլիսին, Արտակ Եդիգարյանին, Էրիկ Վարդանյանին ու Արթուր Միրանյանին՝ առաջարկում նկարահանվել քո առաջին տեսահոլովակում, նրանք համաձայնում են, իսկ դու․․․ իսկ դու «Փյունիկի» նախկին դարպասապահն ես։ Կասե՞ք ֆանտաստիկայի ժանրից է։ Ո՛չ։
«Փյունիկի» նախկին դարպասապահ Տիգրան Խանջարյանը, որը ծնվել է Ֆրանսիայում ու մեծացել Բելգիայում, 2018 թվականին ուսի ցավալի վնասվածք է ստանում, ինչը ստիպում է նրան մեկընդմիշտ մոռանալ ֆուտբոլային խաղադաշտի մասին։
«Շատ ծանր տարա այդ փաստը և միառժամանակ հետո որոշեցի սիրողական թիմում խաղալ, բայց պրոֆեսիոնալ կարիերայից հետո դրան համակերպվելը բարդ էր ու որոշեցի զուր ժամանակ չվատնել»,- ասում է Տիգրանը։
Նա ծնվել է երաժիշտների ընտանիքում․ հայրը երգիչ է։ Ասում է, որ ինքն էլ միշտ սիրել է երգելն ու վերջերս ավելի հաճախ է սկսել հավաքույթների ժամանակ երգել, զգացել է, որ մարդիկ անտարբեր չեն։ Նոր կարիերա սկսելու «պատճառն» էլ դարձել է ծննդյան տոնակատարության հանդիսավարը․
«Օգոստոսին տատիկիս 70-ամյակն էր։ Որոշեցի անակնկալ անել ու մեկնել Երևան։ Այդտեղ հանդիպեցի հանդիսավար Իվան Տայիրին, որն իմ երգելուց հետո մոտեցավ ինձ ու ասաց․ «Խնդրում եմ գոնե մի երգ ձայնագրիր, ուղղակի ձայնդ ափսոս է։ Ես զարմացած եմ»»։ Հենց այս պահից հետո Տիգրանի մոտ երգ ձայնագրելու ցանկություն առաջացավ։ Նա հստակ որոշել էր․ եթե մի օր երգի, երգը լինելու է իր «սրտի քաղաքի՝ Երևանի համար»։ Հենց այդպես էլ եղավ։ Երգը, որի հեղինակը Մարինա Թագակչյանն է, նկարագրում է այն զգացողությունները, որը Տիգրանն ունեցել է՝ ապրելով օտարության մեջ։
«Երգը միաժամանակ պատմում է իմ անձնական կյանքից, իմ Երևանի կարոտից ու այդ սիրուն քաղաքից»,- ասում է նա։
Իսկ թե ինչպես ու ինչու որոշվեց ֆուտբոլիստների ներառել Երևանի մասին պատմող տեսահոլովակում, Տիգրանն ասում է․
«Ուզում էինք մի քիչ յուրահատուկ տեսահոլովակ նկարել, որը խոսի մեր քաղաքի մասին։ Իսկ ինչն է ավելի լավ ներկայացնում մեր քաղաքը, եթե ոչ նրա անհամեմատելի գեղեցիկ վայրերն ու բնակիչների տարբեր մասնագիտությունները։ Այդ պատճառով էլ որոշեցինք, որ տեսահոլովակում նկարահանվեն տարբեր մասնագիտության տեր մարդիկ՝ բժիշկները, մեր հայ զինվորները և լինելով նախկին ֆուտբոլիստ՝ ուզում էի, որ անպայման իրենց մասնակցությունն ունենային նաև մեր ֆուտբոլիստները»։ Ինչպես արդեն հասկացաք՝ տեսահոլովակում տեսնելու ենք «Փյունիկի» ֆուտբոլիստներ Արաս Օզբիլիսին, Արտակ Եդիգարյանին, Էրիկ Վարդանյանին ու Արթուր Միրանյանին։
Իսկ նկարահանումներն առանց զավեշտալի միջադեպերի, երևի թե, երբեք չեն անցնում։ Տիգրանը ևս անմասն չի մնացել դրանից, թեպետ «կադրն, իհարկե, փչացել է»։
«Ուրեմն կադր պետք է նկարեինք, որտեղ քայլում եմ մի աղջկա հետևից ու երբ արդեն հազիվ հասնում եմ նրան, մի տատիկ խնդրում է՝ օգնեմ փողոցն անցնի։ Այդ կադրում պիտի դեմքի այնպիսի արտահայտություն ընդունեի, որն ասեր․ «Ախր, տատիկ ջան, հազիվ հասնում էի էդ աղջկան, բայց կօգնեմ, կանցկացնեմ»։ Այդ պահին փողոցի մոտ երկու տղա էին կանգնած, որոնք, տեսնելով, որ մտածում եմ տատիկին օգնե՞լ, թե՞ գնալ աղջկա հետևից, ու չիմանալով, որ դա տեսահոլովակի նկարահանում է՝ բարձր ու դժգոհող ձայնով ասացին․ «Արի, տատի ջան, մենք կօգնենք, թող ինքը գնա իրա աղջկա հետևից»»,- պատմում է Տիգրանը։
Տիգրանը նաև վերհիշում է, որ «Փյունիկում» խաղալու տարիներին, երբ թիմը հաղթում էր, տղաները նրան խնդրում էին երգել, անգամ Ազգային հավաքականի պաշտպան Վարազդատ Հարոյանը, որն այն ժամանակ ևս հանդես էր գալիս «Փյունիկում», ամեն անգամ ասել է․ «Տիկ, դու պետքա երգիչ լինեիր»։
Չնայած նրան, որ Տիգրանը մանկուց երազել է ֆուտբոլիստ դառնալու մասին, ասում է, որ այս տեսահոլովակի նկարահանումների ժամանակ այնքան հաճույք է ստացել, որ այդ ասպարեզում կարիերան շարունակելու ցանկություն է արթնացել։
Հետաքրքրվում եմ՝ իսկ մտածո՞ւմ է ֆուտբոլի մասին երգ ունենալու ուղղությամբ․
«Պատկերացրեք, որ այո՛, մտածել եմ այդ ուղղությամբ ու կփորձեմ իրականացնել, բայց առայժմ կենտրոնացած եմ այս տեսահոլովակի վրա։ Դրա ավարտից հետո նոր կմտածեմ երկրորդի մասին»,- պատասխանում է նա ու նշում, որ անպայման ուզում է շնորհակալություն հայտնել ծնողներին իրենց օգնության ու ներկայության համար՝ հավելելով, որ առանց նրանց այս ամենը տեղի չէր ունենա։
«Սիրուն Երևան» կոչվող երգի տեսահոլովակի պրեմիերան կկայանա հաջորդ շաբաթ՝ հստակ օր դեռ չկա։
Խոսքերի և երաժշտության հեղինակ՝ Մարինա Թագակչյան
Բեմադրող օպերատոր՝ Վիկտոր Միխայլով
Օպերատոր՝ Դավիթ Սաֆարյան
Գործիքավորող՝ Վահան Նահապետյան
Հիշեցնենք, որ Տիգրան Խանջարյանը թեև 2013-14 թվականներին հանդես է եկել «Փյունիկում», բայց ոչ մի պաշտոնական խաղ այդպես էլ չի անցկացրել թիմի կազմում՝ հայկական անձնագիր ձեռք բերել չկարողանալու պատճառով։
Կարիերայի ընթացքում նա հանդես է եկել բելգիական մի շարք ակումբների, ինչպես նաև «Փյունիկի» ու «Բանանցի» կազմերում։
Ստելլա Բաբլոյան
