Արդեն այս շաբաթ, իսկ ավելի ճիշտ՝ օգոստոսի 5-ին, մեկնարկում է Անգլիայի Պրեմիեր լիգայի 2022/23 մրցաշրջանը։
Նոր մրցաշրջանը խոստանում է շատ հետաքրքիր լինել, և հենց առաջնության մեկնարկից մենք կարող ենք ականատես լինել մի շարք անակնկալների․ որոշ ակումբներ մեզ կզարմացնեն, իսկ որոշները՝ կհիասթափեցնեն, բայց չէ ո՞ր հենց դրա համար էլ մենք շատ ենք սիրում ֆուտբոլը․․․
🏆 Գվարդիոլա/Հոլանդ vs Կլոպ/Նունյես
Այսօրվա մեր նյութը սկսենք չեմպիոնական մրցավազքից։ Այստեղ ակնկալվում է, որ առաջին տեղի համար պայքարում նորից կտեսնենք երկու թիմերի միջև գերլարված մրցակցություն։ Եվ, իհարկե, ինչպես նախորդ առաջնությունում, այս մրցավազքում ներգրավված են լինելու «Մանչեսթեր Սիթին» և «Լիվերպուլը», երկուսն էլ ունեն հավասար հնարավորություն հաղթելու մրցաշարը։
Բայց, ի տարբերություն նախորդ մրցաշրջանի, Գվարդիոլայի և Կլոպի համար այս անգամ մի փոքր ավելի դժվար է լինելու, և չեմ կարծում, որ այս մրցաշրջանում ևս մանչեսթերալիվերպուլյան դուետը միավորների ահռելի տարբերություն կունենա 3-4-րդ տեղերի թիմերի համեմատ։ Մի փոքր ուշ դրա պատճառներին ևս կանդրադառնանք։
Օրերս կայացած Սուպերգավաթի խաղում Գվարդիոլայի թիմը 1-3 հաշվով զիջեց մերսիսայդցիներին։ Բայց պետք չէ միանգամից բարձրաձայնել, թե «Լիվերպուլը» մեկ գլուխ այս պահին բարձր է «Մանչեսթեր Սիթիից»։ Ո՛չ, ամենևին էլ այդպես չէ։ Երկու թիմերում էլ կան որոշակի փոփոխություններ, այդ թվում, հավանաբար, կլինեն նաև փոփոխություններ խաղային սխեմաների առումով։ Մեկ խաղով ինչ-որ բան կանխատեսելն ու եզրակացություններ անելը սխալ կլինի, մրցաշրջանը երկար է՝ բաղկացած 38 խաղից, գումարած՝ ՉԼ-ի և գավաթային հանդիպումները։ Այնպես որ, երկու թիմերն էլ մոտ 50 հանդիպում ունեն անցկացնելու առաջիկա մրցաշրջանում։ Իր դերը կխաղա նաև առաջիկա ԱԱ-ն, այս թիմերից շատ ֆուտբոլիստներ մասնակցելու են այդ մրցաշարին, և դեռ հարցական է՝ ինչ մարզավիճակով կշարունակեն խաղացողները մրցաշրջանի երկրորդ հատվածը, չբացառենք նաև վնասվածքները և այլն․․․ Եվ այս ամենն, ի դեպ, վերաբերվում է նաև մյուս թոփ ակումբներին։
«Մանչեսթեր Սիթիից» այս ամառ հեռացան Ռահիմ Ստերլինգը, Ալեքսանդր Զինչենկոն, Գաբրիել Ժեզուսը, Ֆերնանդինյոն։ Փոխարենը թիմը ձեռք բերեց Էրլինգ Հոլանդին, ով ԱՊԼ-ում ամենաբարձր տրանսֆերային արժեք ունեցող ֆուտբոլիստն է (150 մլն եվրո), կիսապաշտպան Կելվին Ֆիլիպսին։ Թիմին միացավ նաև դեռ ձմռանը ձեռք բերված արգենտինացի հարձակվող Խուլիան Ալվարեսը։ Եթե համեմատական տանենք, ապա Գվարդիոլան կարողացավ բալանսավորել կազմը։ Գլխավոր տարբերությունն այն է, որ Պեպն արդեն թիմում ունի մաքուր հարձակվող՝ ի դեմս Հոլանդի։ Եթե նախորդ մրցաշրջաններում թիմը խաղում էր կեղծ ինը համարով, ապա այս դեպքում իսպանացի մասնագետը պետք է ինչ-որ նոր բան մտածի, չնայած, ավելի վաղ նա նշել էր, որ խաղային սխեմայում փոփոխություններ չեն ակնկալվում։ Համենայն դեպս, այս առումով ամեն ինչ պարզ կլինի առաջիկա տուրերի ընթացքում։ Ֆիլիպսը շատ որակյալ ֆուտբոլիստ է և, ամենայն հավանականությամբ, կլինի մեկնարկային կազմում։ Ինչ վերաբերում է Ալվարեսին, ապա նա կա՛մ կլինի Հոլանդի փոխարինողը հարձակման կենտրոնում, կա՛մ էլ կզբաղեցնի եզրերից մեկը․ արգենտինացին աչքի է ընկնում արտակարգ տեխնիկայով և բարձր արդյունավետությամբ։ Հոլանդի մասին ոչինչ չենք ասի, բոլորդ էլ շատ լավ գիտեք նրա խաղային որակների մասին, այնպես որ, շատ հետաքրքիր կլինի հետևել «քաղաքաբնակների» նորեկներին առաջիկա մրցաշրջանում։
Նույնը կարելի է ասել նաև «Լիվերպուլի» նորեկ Դարվին Նունյեսի մասին։ Ի տարբերություն նույն Հոլանդի, Դարվինը կարող է խաղալ ոչ միայն կենտրոնում, այլ նաև եզրերում, նա ավելի բազմաֆունկցիոնալ է և, ինչպես նորվեգացին, աչքի է ընկնում բարձր արդյունավետությամբ։ Շա՜տ հետաքրքիր կլինի հետևել ԱՊԼ-ի նորեկների միջև մրցակցությանը, այս մրցաշրջանի առանձնահատկություններից մեկն էլ հենց դա է՝ ԱՊԼ-ն ստացավ նոր անուններ, հեռանկարային և անչափ տաղանդավոր նոր խաղացողներ, որոնք նոր ինտրիգ կհաղորդեն մրցաշարին։ Այնպես որ, Կլոպը հիանալի փոխարինող է գտել Սադիո Մանեին, ով տեղափոխվեց «Բավարիա»։ Թիմի մյուս նորեկները՝ պորտուգալացի վինգեր Ֆաբիո Կարվալյոն և շոտլանդացի պաշտպան Քելվին Ռեմսին հիմնական կազմի համար չեն ձեռք բերվել, այլ ռոտացիայի։ Օրիգիի, Մինամինոյի, Դևիսի, Գրույիչի և Ուիլյամսի հեռանալուց հետո պահեստայինների նստարանը բավականին կարճ է թվում, և հենց այստեղ էլ թաքնված է Կլոպի և Գվարդիոլայի թիմերի միջև տարբերությունը։ Հիշո՞ւմ եք, վերևում արդեն նշեցինք, որ մրցաշրջանը երկար է լինելու, դեռ կա ԱԱ-ն․․․ Եվ այս մրցաշրջանում մեդալային պայքարի համար որոշիչ կարող է դառնալ հենց պահեստայինների նստարանի երկար լինելն ու որակյալ ֆուտբոլիստների առկայությունը, երբ հնարավորություն ունես առանց խաղային որակի անկման ռոտացիա անել։ Այս առումով, թերևս, Գվարդիոլայի թիմն առավելություն ունի․․․ Այնպես որ, Յուրգե՛ն, թիմին երկու-երեք նոր, որակյալ համալրումներ են պետք։
💥 Կոնտեի տրանսֆերային արշավը
Իսկ ահա այդ ամենի վրա շատ լավ ուշադրություն է դարձնում Անտոնիո Կոնտեն։ «Տոտենհեմն» այս ամառ առանձնապես կորուստներ չունի․ Բերգվեյնի տրանսֆերը «Այաքս» դժվար է նշել որպես մեծ կորուստ, իսկ ահա լոնդոնցիների տրանսֆերային արշավն այս ամառ տպավորիչ է։ Թիմը «Էվերտոնից» ձեռք բերեց հարձակվող Ռիշարլիսոնին, ազատ գործակալի կարգավիճակով Լոնդոն տեղափոխվեց Իվան Պերիշիչը, ում Անտոնիոն շատ լավ է ճանաչում, «Բրայթոնից» գնեցին ԱՊԼ-ի նախորդ մրցաշրջանի լավագույն կենտրոնական կիսապաշտպաններից մեկին՝ Բիսումային, ինչպես նաև «Բարսելոնայից» վարձակալեցին Լանգլեին։ Թիմը համալրել են նաև հեռանակարային պաշտպան Ջեդ Սփենսը, փորձառու դարպասապահ Ֆրեյզեր Ֆորստերը։
Չի բացառվում, որ «Տոտենհեմը» դեռ մեկ-երկու որակյալ տրանսֆեր ևս կիրականացնի, ամենայն հավանականությամբ, պաշտպանությունն ուժեղացնելու համար։ Այսպիսով, Կոնտեն այս պահի դրությամբ արդեն ունի ռոտացիայի լայն հնարավորություն, ինչը կօգնի թիմին պայքարել մի քանի ճակատով՝ ԱՊԼ-ում, ՉԼ-ում, գավաթային մրցաշարերում։ Թիմում մթնոլորտը կարծես թե ևս դրական է, ֆուտբոլիստները հաճախ են իրենց հարցազրույցների ժամանակ նշում մարզչի դրական ազդեցությունն իրենց և թիմի վրա։ Եվ այդ ամենի հանրագումարով, կարծում ենք, որ «Տոտենհեմն» ամենաբարձր հնարավորություններից մեկն ունի լավագույն եռյակում հայտնվելու (եթե ինչ որ բան այնպես չգնա, ապա քառյակում): Իսկ ահա որոշակի հանգամաքների դեպքում, եթե «Ման․Սիթի» և «Լիվերպուլ» զույգից որևէ մեկը «սայթաքի» (ամեն ինչ հնարավոր է), ապա ինչու և ոչ, Կոնտեի թիմը կարող է պայքարել նաև երկրորդ տեղի համար․ չեմպիոնության համար պայքարն անիրատեսական է թվում, չնայած, սա ֆուտբոլ է․․․ Համենայն դեպս, ժամանակն է, որ «Տոտենհեմն» ինչ-որ տիտղոս նոր մրցաշրջանում վերցնի, թեկուզ և գավաթներից որևէ մեկը, թե չէ տիտղոսների թեմայով կատակներն ու մեմերն արդեն բոլորովին զվարճալի չեն թվում։
⚽ Պայքար լավագույն քառյակում հայտնվելու համար
Լավագույն քառյակում հայտնվելու և ՉԼ-ի ուղեգիր ստանալու համար կպայքարեն նաև «Չելսին», «Արսենալը» և «Մանչեսթեր Յունայթեդը»։ Բոլոր թիմերն էլ լավ համալրումներ ունեն, բայց կորուսներ ևս։
«Արսենալը» նախորդ մրցաշրջանի երկրորդ կեսում բավականին կարևոր միավորներ կորցրեց և զրկվեց լավագույն քառյակում տեղ զբաղեցնելու հնարավորությունից։ Դրա պատճառները մի քանիսն էին՝ Տոմիյասուի բացակայությունը վնասվածքի պատճառով, ով թիմի կարևոր դերակատարերից մեկն էր դարձել, որոշ ֆուտբոլիստների խաղային անկումն ու հաճախակի վնասվածքները, հարձակման եզրափակիչ փուլում անարդյունավետ գործողությունները և այլն։ Համենայն դեպս, Արտետան հաշվի կառնի նախորդ մրցաշրջանի այդ նյուանսները և այս տարի թիմն է՛լ ավելի պատրաստված կլինի երկար մրցաշրջանին։ Թիմը որակյալ համալրումներ ունի՝ ի դեմս Ֆաբիո Վիեյրայի, Ալեքսանդր Զինչենկոյի և Գաբրիել Ժեզուսի։ Վերջինս, ընդհանրապես, ֆանտաստիկ անցկացրեց նախամրցաշրջանային փուլը՝ աչքի ընկնելով գերարդյունավետությամբ ընկերական խաղերում։ Հուսանք, նա այս հիանալի մարզավիճակը կպահպանի նաև մրցաշրջանի ընթացքում։
«Չելսիում» փոխվել է ակումբի ղեկավարությունը, թիմից հեռացան մի շարք ֆուտբոլիստներ, օրինակ՝ Լուկակուն, Ռուդիգերն ու Քրիստենսենը։ Փոխարենը, լոնդոնյան ակումբի շարքերը համալրեցին Ռահիմ Ստերլինգն ու Կալիդու Կուլիբալին․ երկու տրանսֆերներ էլ կարելի է հաջող համարել։ Բայց, ամենայն հավանակնությամբ, թիմը կլքեն ևս մի շարք ֆուտբոլիստներ, Տուխելին անհրաժեշտ կլինեն նոր տրանսֆերներ։
Գրեթե նույն իրավիճակն «Մանչեսթեր Յունայթեդում» է, բայց այնտեղ ոչ թե ղեկավարությունն է փոխվել, այլ գլխավոր մարզիչը։ Նոր մարզիչ, նոր փիլիսոփայություն, նոր կազմ․․․ թիմը համալրել է շարքերը մի քանի որակյալ ֆուտբոլիստներով՝ Լիսանդրո Մարտինես, Քրիստիան Էրիկսեն, Տիրել Մալասիա․․․ Կորուստներ ևս կան՝ Կավանի, Պոգբա, Լինգարդ, Մատիչ, բայց հեռացած ֆուտբոլիստների բացակայությունն այդքան էլ մեծ բաց չէ։ Տեն Հագը ցանկանում է իր թիմում տեսնել Ֆրենկի դե Յոնգին («Բարսելոնա»), ում տրանսֆերին հավակնում է նաև «Չելսին», և լոնդոնցիների առավելությունն այս տրանսֆերային մրցավազքում ՉԼ-ում հանդես գալն է, ինչն այս մրցաշրջանում ՄՅՈՒ-ն չի կարող առաջարկել հավանական նորեկներին։ Եվ հենց դա էլ հանդիսանում է գլխավոր պատճառներից մեկը, որ Կրիշտիանու Ռոնալդուն ցանկանում է հեռանալ Մանչեսթերից․ նրա ապագան տեն Հագի թիմում այս պահին մնում է անորոշ։ Ակումբի ղեկավարությունը և մարզիչը ցանկանում են, որ Ռոնը մնա, ֆուտբոլիստը ցանկանում է հեռանալ, առաջացել է հետաքրքրությունների և շահերի բախում, կոնֆլիկտային և ոչ այդքան հաճելի իրավիճակ, ֆուտբոլիստը նույնիսկ մեկ շաբաթից ավել բաց թողեց թիմի մարզումներն ու ասիական շրջագայությունը․․․ Ամեն օր ինչ-որ նոր տեղեկություններ են հայտնվում այս թեմայի վերաբերյալ, երբեմն անհավանական ու անհասականալի, երբեմն էլ տրամաբանական և հավանական․․․ Բայց, արդյունքում, այս ամենն ազդում է նաև ընդհանուր թիմի վրա՝ հոգեբանական տեսանկյունից, իսկ այս պահին, նոր մրցաշրջանից առաջ հանդերձարանում լարված մթնոլորտն ամենաքիչն է անհրաժեշտ թիմին։
Ընդհանրացնելով այս երեք ակումբներում տեղի ունեցող իրադարձությունները՝ ֆուտբոլային և ոչ ֆուտբոլային, թվում է, որ ամեն ինչ լավ է միայն Արտետայի թիմում՝ դիրքային ուժեղացումներ, սկանդալների բացակայություն և այլն։ Այնպես որ, այս պահի, այս րոպեի դրությամբ լավագույն քառյակի համար մրցավազքում «Արսենալը» մի փոքր առավելություն ունի հիմնական մրցակիցների նկատմամբ։
🎁 Անակնկալներ պատրաստողները
Համառ պայքար է ակնկալվում նաև 7-րդ տեղի համար պայքարում։ Այս մրցավազքում մեր թեկնածուներն են «Ասթոն Վիլան», «Վեսթ Հեմը», «Վուլվերհեմփթոնը» և «Նյուքասլը»։
Ամենատպավորիչ տրանսֆերային արշավն անցակացնում է «Ասթոն Վիլան»։ Ջերարդի թիմի շարքերն այս ամառ համալրել են պաշտպան Դիեգո Կարլոսը («Սևիլիա») և հենակետային կիսապաշտպան Բուբակար Կամարան («Մարսել»), որոնց ծառայություններով հետաքրքրված էին մի շարք գրանդ ակումբներ։ Բիրմինգհեմյան թիմը բավականին որակյալ ու մրցունակ կազմ ունի և նույնը կարելի է ասել նաև «Վեսթ Հեմի» մասին, որը նախորդ մրցաշրջանում երկար ժամանակ պայքարում էր վեցնյակում տեղ զբաղեցնելու համար։ Այս տարի թիմը լուրջ կորուտներ չունի և ևս համալրվել է մի շարք որակյալ ֆուտբոլիստներով (Սկամակա, Ագեր)։ Ջերարդի և Մոյեսի թիմերը, հանգամանքների որոշակի դասավորվածության պայմաններում, կարող են նույնիսկ ցատկել վեցնյակ՝ խառնելով գրանդ ակումբներից որևէ մեկի ծրագրերը։
Իսկ ինչ վերաբերում է «Վուլվերհեմփթոնին», սա ամուր թիմ է, վերջին տարիներին միշտ պայքարում է եվրագավաթային գոտու համար, բայց այս տարի, բացի Նաթան Քոլինզից, որևէ խոշոր տրանսֆեր դեռ չի իրականացրել․․․ նշենք՝ դեռ․․․ այդ իսկ պատճառով չենք բացառում, որ այս տարի «գայլերը» նորից կլինեն «մեծ խաղի» մեջ։
Իսկ ահա «Նյուքասլը»․․․ այս թիմն, անկեղծ ասած, մի փոքր զարմացնում է։ Շատերը սպասում էին, որ պոտենցիալ ամենահարուստ ակումբը (հաշվի առնելով, ով է ակումբի սեփականատերը) շատ ակտիվ կլինի տրանսֆերային շուկայում։ Բայց ոչ, նավահանգստային քաղաքում տրանսֆերային անշլագ չկա, բայց դա դեռ առայժմ։ Մյուս կողմից դա նաև լավ է, քանի որ ակումբը, կարծես թե, չի պատրաստվում վարել «փողի պարկի» քաղաքականություն՝ ձեռք բերելով աստղային, բայց ոչ անհրաժեշտ նորեկներ։ Ընդհակառակը, ակումբում հաշվում են ամեն մի կոպեկը և չեն պատրատվում վերավճարել որևէ խաղացողի տրանսֆերի համար։ Հաուն, ով գլխավորեց թիմը ձմռանը, շատ լավ ու գրագետ աշխատանք կատարեց այս ընթացքում՝ ձեռք բերելով խաղացողներ անհրաժեշտ դիրքերի համար, և եթե հաշվի առնենք մրցաշրջանը ձմեռային տրանսֆերային պատուհանից հետո, «Նյուքասլը» վաստակած միավորների քանակով 4-րդն էր առաջնությունում․․․ 4-րդը․․․ Այնպես որ, արդեն առկա ռեսուրսներով թիմը կարող է եվրագավաթային գոտում հայտնվելու ակնկալիքներ ունենալ։ Բայց, կարծում ենք, 3-4 նոր խաղացողներ Հաուն դեռ ձեռք կբերի այս ամառ և ավելի լուրջ մրցակցություն կպարտադրի մրցակիցներին։
Ինչ վերաբերում է «Լեսթերին», դժվար է ինչ-որ բան կանխատեսել այս թիմի առումով։ «Աղվեսները» միակն են, որ դեռ ոչ մի նորեկ չունեն այս ամառ։ Իսկ կորուստներ արդեն կան․ թիմի լեգենդներից մեկը դարձած դարպասապահ Կասպեր Շմեյխելն օրերս լքեց ակումբը։ Դանիացին միացավ ֆրանսիական «Նիցային»։ Թիմից կարող են հեռանալ նաև Մեդիսոնն ու Տիլեմանսը, ովքեր ևս համարվում են կարևոր խաղացողներ Ռոջերսի համար։
🌳 Առաջնության նորեկները
Նոր մրցաշրջանում ԱՊԼ-ում կտեսնենք արդեն ծանոթ թիմերի՝ «Բորնմութին» և «Ֆուլհեմին»։ Իսկ ահա «Նոթինգհեմի» վերադարձին մենք երկար սպասեցինք։ Հաճելի է, որ այնպիսի թիմ, որը երկու անգամ հաղթել է ՉԼ-ում, ժամանակին ուժեղագույններից մեկն էր Եվրոպայում, նորից հանդես կգա էլիտար դիվիզիոնում։ Այս երեք ակումբներից տրանսֆերային շուկայում ամենաակտիվը հենց «Նոթինգհեմն» է և դա զարմանալի չէ․ նախորդ մրցաշրջանում թիմի կազմի մի մասն այլ ակումբներից վարձակալած ֆուտբոլիստներ էին։ Թիմի նորեկներից կառանձնացնենք Ջեսի Լինգարդին։
ԱՊԼ-ի նորեկների մասին՝ տեսանյութում․
Նշենք, որ տրանսֆերային պատուհանը մոտ մեկ ամիս դեռ բաց է։ Գրեթե բոլոր թիմերում էլ կտեսնենք ևս մի քանի նորեկների, իսկ ոմանք էլ կարող են կորցնել առաջատարներին։ Այնպես որ, չնայած մրցաշրջանի առաջին 4-5 տուրերի ընթացքին, շատ թիմերում սպասվում են փոփոխություններ, և չի բացառվում, որ դեռ ականատես կլինենք անակնկալների, իսկ որոշ թիմեր էլ կզարմացնեն իրենց հավակնություններով․․․
Վար Բաբայան
