Ֆուտբոլային սկաուտ․ Նրանք դեռ Չինաստանում են

Վերջերս չինական «Շանհայի» բրազիլացի հարձակվող Հալկը հայտնել է, որ մտադիր է լքել Չինաստանի սուպերլիգան․ «Շատ ակումբներ են հետաքրքրված իմ ծառայություններով: Նրանցից մի քանիսը խաղում են Չեմպիոնների լիգայում: Չինաստանից էլ առաջարկներ կան, բայց այլևս չեմ ցանկանում այստեղ խաղալ»,- ասել էր կոմիքսների հերոսի անունը կրող ֆուտբոլիստը։ Սակայն հայտնի ֆուտբոլիստներից ոչ միայն Հալկն է ներկայումս հանդես գալիս չինական Սուպերլիագյում․․․

Այս անգամ Ֆուտբոլային սկաուտ շարքում կանդրադառնանք 5 ֆուտբոլիստների, ովքեր հանդես են գալիս հեռավոր Չինաստանի առաջնությունում, սակայն դեռ հնարավորություն ունեն Հին աշխարհ վերադառանալու և իրենց ունակությունները թոփ լիգաներում ցուցադրելու համար։

Ստեֆան Էլ-Շարավի

🇮🇹 Իտալիա
«Շանհայ Շենուա»
27 տարեկան

Իտալացի ֆուտբոլիստը նախորդ տարի տեղափոխվեց Չինաստան, սակայն, կարծես թե, այդպես էլ չհարմարվեց տեղի առաջնությանը՝ չարդարացնելով Շանհայը ներկայացնող ակումբի երկրպագուների սպասելիքները։ Եվ դա էլ բավական չէ, վերջերս ֆուտբոլիստը հայտնվեց սկանդալի մեջ․ իտալացին դժգոհել է երկրի առաջնության առաջին տուրում շուտ փոխարինվելու պատճառով: Փոխարինվելով 55-րդ րոպեին՝ Էլ Շարավին հեռացել է հանդերձարան՝ չմնալով պահեստայինների նստարանին: Ըստ լուրերի, դա առաջացրել է ակումբի ղեկավարության դժգոհությունը և չի բացառվում, որ «Փարավոնը» կլքի Շանհայը։ Դե ինչ, կրկին սպասե՞նք նրան Ա Սերիայում․․․

Ռոջեր Գուեդեշ

🇧🇷 Բրազիլիա
«Լունենգ»
23 տարեկան

Ռոջերը մեր այսօրվա հերոսներից միակն է, ով երբեք հանդես չի եկել Եվրոպայում: Երկու տարի առաջ, հանդիսանալով բրազիլական ֆուտբոլի ամենահեռանկարային ներկայացուցիչներից մեկը, նա «Պալմեյրասից» տեղափոխվում է Եվրասիա մայրցամաքի ոչ թե արևմտյան, այլ՝ արևելյան կողմը։ Պատճառը դժվար չէ գուշակել՝ ավելի շահավետ առաջարկ Չինաստանից։ Ֆուտբոլիստը բավականին լավ տպավորություն թողեց նախորդ մրցաշրջանում՝ դառնալով 12 գոլի և 5 գոլային փոխանցման հեղինակ։ Չի բացառվում, որ շուտով նա կցանկանա իր ուժերը փորձել նաև եվրոպական ֆուտբոլում և մենք նրան կտեսնենք որևէ թոփ առաջնությունում։

Սեդրիկ Բակամբու

🇨🇩 Կոնգո
«Բեյջին Գուոան»
29 տարեկան

Կոնգոլեսցի ռմբարկուին մեր ընթերցողներից շատերը կհիշեն «Վիլյառեալում» տպավորիչ ելույթներով: Աֆրիկացի հարձակվողը բավականին հաջող էր հանդես գալիս Եվրոպայում և թվում էր, որ նրա՝ որևէ ավելի բարձրակարգ ակումբ տեղափոխվելը սարերի ետևում չէ․․․ բայց նա նախընտրեց Չինաստանը։ Այստեղ նա դարձավ առաջնության ամենաարդյունավետ ֆուտբոլիստներից մեկը․ 39 գոլ, 14 գոլային փոխանցում երկու մրցաշրջանների ընթացքում։ Ռմբարկուական հատկանիշներով հարձակվողի թնդանոթում դեռ վառոդ կա և հետաքրքիր կլիներ կրկին հետևել նրա սխրագործություններին որևէ թոփ լիգայի ակումբներից մեկում։

Տալիսկա

🇧🇷 Բրազիլիա
«Գուանչժոու Էվերգրանդ»
26 տարեկան

Տեխնիկապես հիանալի պատրաստված բրազիլացին երկու տարի առաջ համարվում էր Եվրոպայում հանդես եկող բրազիլացի ամենահեռակարային ֆուտբոլիստներից մեկը։ Սակայն «Բենֆիկայի» նախկին ֆուտբոլիստը բավականին անսպասելի որոշում կայացրեց՝ տեղափոխվելով չինական Սուպերլիգա։ Եվ եթե խաղային մայրամուտին մոտ գտնվող ֆուտբոլիստների դեպքում չինական ֆուտբո-դոլարների ետևից գնալը լիովին հասկանալի է, ապա Տալիսկայի դեպքում դա ինչ որ տեղ անակնկալ էր․ նա ուներ բավականին լավ և հեռանկարային առաջարկներ եվրոպական գրանդներից, և այժմ էլ որոշ ակումբներ դեռ շարունակում են հետևել արագավազ «հսկային» (հարձակվողական ոճի կիսապաշտպանի համար բավականին բարձր հասակ ունի՝ 190 սմ), այնպես որ, կարծում ենք, դեռ հնարավորություն կունենանք հետևել Տալիսկայի խաղին Չինական Մեծ պատից այս կողմ։

Օսկար

🇧🇷 Բրազիլիա
«Շանհայ SIPG»
28 տարեկան

Եվս մեկ ֆուտբոլիստ, ով ներկայացնում է բրազիլական սփյուռքը Չինաստանում։ Վերջերս Օսկարը հայտնել էր Չինաստանի քաղաքացիություն ստանալու և այդ երկրի ազգային հավաքականում հանդես գալու մտադրության մասին։ Նա հայտնել է, որ այլևս չի հրավիրվի Բրազիլիայի հավաքական, այդ պատճառով ցանկանում է հանդես գալ Չինաստանի ընտրանու կազմում: Օսկարը Բրազիլայի հավաքականի կազմում անցկացրել է 48 հանդիոպում և դարձել 12 գոլի հեղինակ։
Ժամանակին բրազիլացին համարվում էր իր երկրի ամենահեռանկարային ֆուտբոլիստներից մեկը՝ բավականին լավ խաղ ցուցադրելով Լոնդոնի «Չելսիի» կազմում, սակայն 2017 թվականին նա շատ գրավիչ առաջարկ ստացավ Չինաստանից և․․․ չինական սուպերլիգայում այժմ Օսկարը համարվում է գերաստղ, սակայն միայն դրա՞ն էր արդյոք ձգտում տաղանդավոր ֆուտբոլիստը։ Նա դեռ 28 տարեկան է և բոլորովին ուշ չէ Եվրոպա վերադառնալու, ինչու ոչ՝ ֆուտբոլային «Օսկարներ» նվաճելու համար․․․

Վար Բաբայան

Շարքի նախորդ մասերը

ՌՊԼ-ի ամենահեռանկարային ֆուտբոլիստները

Վալենսիան շարունակում է մնալ ֆուտբոլային քաղաք

Աֆրիկայի ամենաթանկարժեք 5 ադամանդները

5 ռմբարկուներ ոչ թոփ առաջնություններից

ՌԲ Լայպցիգը՝ ապագա աստղերի դարբնոց

Դեղձանիկները դեռ կճախրեն ֆուտբոլային երկնակամարում

Շոտլանդիայի առաջնության ամենահեռանկարային ֆուտբոլիստները

Լավագույնները Ա Սերիայի նկուղում

Ամերիկացիների երիտասարդ դեսանտը Եվրոպայում

Բեռլինում նոր աստղեր են հասունանում