Աբրահամ Խաշմանյան․ Չի բացառվում, որ Արմեն Սանամյանը հաստատվի Լոռիի գլխավոր մարզչի պաշտոնում

Օրեր առաջ «Լոռիի» հիմնադիր Թովմաս Գրիգորյանի խորհրդականի պաշտոնը ստանձնեց հայկական ֆուտբոլում քաջ հայտնի Աբրահամ Խաշմանյանը։ 

Ինչ է իրենից ենթադրում այս պաշտոնը, ինչպիսին է թիմի նոր, բայց ժամանակավոր մարզչական շտաբը, ինչ կարծիք ունի փորձառու մասնագետը թիմի ֆուտբոլիստների մասին ArmSport-ը փորձել է պարզել հենց նրանից։

-Ինչպե՞ս ստացվեց Լոռի տեղափոխությունը։

-Դե, հրավեր եմ ստացել «Լոռիի» հովանավորից, նախագահից, որին շատ հարգում եմ, բանակցություններից հետո որոշել եմ անցնել այս պաշտոնին:

-Արդյոք քննարկվե՞լ է գլխավոր մարզչի պարտականությունները ստանձնելու հարցը։

-Կարծում եմ՝ դա ներքին խոհանոց է:

 -Թիմը գլխավոր մարզչի պաշտոնակատար ունի․ ի՞նչ կարծիքի եք մարզչական շատբի մասին։ 

-Կասեմ, որ շատ լավ մարզչական շտաբ է, շատ կոմպետենտ, շատ պրոֆեսիոնալ:

-Որո՞նք են լինելու Ձեր գործառույթներն այս պաշտոնում։ 

-Զբաղվելու եմ թիմի ամբողջական գործընթացով:

-Կմանրամասնե՞ք:

-Թիմի հետ կապված բոլոր հարցերով եմ զբաղվելու. թե՛ կազմակերպչական, թե՛ եթե իմ կարիքն ունենա մարզչական շտաբը, եթե ունենում են, միջամտում եմ, եթե չեն ունենում, չեմ միջամտում: 

-Թիմը գլխավոր մարզչի ժամանակավոր պաշտոնակատար ունի, այսինքն Դուք նաև նոր  մարզչի փնտրտուքներո՞վ եք զբաղվում:

-Դա քննարկման պրոցես է, մենք զբաղվում ենք հովանավորի, նախագահի՝ պարոն Գրիգորյանի հետ միասին, բայց չի բացառվում, որ Արմեն Սանամյանը առաջնությունից հետո կհաստատվի գլխավոր մարզչի պաշտոնում։ Հիմա մեկ ամիս, 20 օր է մնացել ու մի փոքր դժվար է մարզչական շտաբի համար, մեզ համար, որովհետև միանգամից օպերատիվ անցել ենք աշխատանքի՝ գրեթե ոչ մեկի չճանաչելով։ Ասեմ, որ թիմը ֆունկցիոնալ այդքան էլ լավ վիճակում չէ, դրա համար էլ մարզչական շտաբի համար դժվարություններ կան, բայց կարծում եմ՝ պատվով դուրս կգանք, չնայած գլոբալ բան փոխելու ժամանակ չկա։ Բայց, բնական է, որ աշխատում ենք ինչ-որ բաներ փոխել, որովհետև դա այսօրվա դրությամբ անհրաժեշտ է։

-Պարոն Խաշմանյա՛ն, եթե հաշվի չառնենք, որ երկար դադար եղավ ֆուտբոլում, թիմի խաղացողների որակներն ինչպե՞ս կգնահատեք։

-Նախ, ասեմ, որ այսօր մենք երկրորդ խաղն ենք անցկացրել․ մենք ամեն խաղի 14-15 ֆուտբոլիստով ենք ներկայանում։ Դա արդեն պիտի հուշի, որ բավականին մեծ խնդիրներ կան։ Չունենք այնքան ֆուտբոլիստներ, որ պահեստայինների նստարանը լրացնենք։ 

-Այսինքն, առաջնությունից հետո կզբաղվեք նաև նոր ֆուտբոլիստներով․․․

-Ես ինքս տեսնում եմ, որ կան շատ լավ խաղացողներ, բայց, բնական է, որ այո, առաջնությունից հետո շատ բան կփոխվի։ «Լոռին», կարծում եմ, էլ ավելի ուժեղ կլինի և պետք է որ պայքարի ամենաբարձր տեղերի համար։

-Վերջերս շատ են բողոքում, որ թիմերի մեկնարկային կազմերում հատկապես հայ ֆուտբոլիստների թիվը շատ քիչ է։ Դուք ինչպե՞ս եք տեսնում այս խնդրի լուծումը։

-Գիտեք, դա իմ խնդիրը չէ։ Այդ խոսակցություններն այսօրվա դրությամբ, չեմ կարծում, որ ակտուալ են ու պիտի փոփոխություններ արվեն։ Եթե մարդիկ ուզում են, որ սահմանափակումներ արվեն․․․նախ, այսօր մեր առաջնությունը որակով կամ դիտարժանությամբ չի փայլում, հետո, եթե սահմանափակումներ արվեն, մենք ավելի ցածր ու տխուր առաջնություն կունենանք ու ամենակարևորը, այսօր ակումբների հովանավորները թիմեր են պահում ու շատ-շատերը գումարներն իրենց գրպանից են ներդնում ու թիմերից միայն արդյունք են պահանջում, որովհետև դա բիզնես է ու մարդկանց գումար է բերում։ Հիմա դա ակումբի հովանավորների խնդիրն է։ Եթե կա ակումբ, որը պատրաստ է խնդիրներ չդնել ու երկարատև՝ 5 տարվա ծրագրող աշխատանքներ տանել, ուրեմն նրանց խաղացողների գոնե 50%-ը կարող են լինել հայ խաղացողներ։ Բայց, կարծում եմ, Հայաստանում մեկ-երկու ակումբ կա, որ այդ հնարավորություններն ունի։ Այդ ակումբները հիմնականում ունեն լավ մանկապատանեկան դպրոց կամ ակադեմիա։ Մյուս ակումբները չունեն այդ հնարավորությունը։ Դրա համար հենց այնպես խոսելով, այդ հարցերը չեն լուծվում։ Դա այսօրվա հայկական ֆուտբոլի իրականությունն է։

-Խնդրի լուծումն, ըստ Ձեզ, երկարաժամկե՞տ է, մանկապատանեկան ֆուտբոլի զարգացման շնորհիվ։

-Այլևս այդ թեմայով չեմ ուզում խոսել, որովհետև 20 տարի է այդ մասին խոսում ենք, բայց միայն խոսում ենք։ Անհրաժեշտ է ծրագիր մանկապատենակն ֆուտբոլում, որ մենք զարգանանք։ 

-Առաջնության նոր ձևաչափն իրեն արդարացնո՞ւմ է՝ ըստ Ձեզ։

-Հիմա չեմ կարող կոնկրետ պատասխանել, որովհետև պետք է լավ ուսումնասիրեմ դեռ։ 

Ստելլա Բաբլոյան